3
Awnkam Ngalling Tuk
1 U le naute aw, zilhtu dek nuamtu tam leita pahsuh un. Itahim titale na theih uh bangin, kohtei zilhtute hi midang sangin nase saw deuhin thukhennak tawk tuk ung hi.
2 Ka venghawng uhin khial kha mek ung. Mahnaven a awnkamin, a khial ngawlmi cu a tisa pumpi a ukdun theitu mi cangkim hi.
3 Cipuh cu eimu thu zui tukin a kam kingkalh hung a, hawh hen tih a deihnak uhah hawhtik hung.
4 Ahimata tinbaw khi ngaisung unna, ngengpi naven, a hum a, huihtheu pi in hawhtik hi; mahnaven a hottu ngangai cu timbaw hotnak neuno poh hi. Mahmi in hawl kawkawi a, timbaw mawngtu in, a deihnakah hawhtik hi.
5 Kam sung a, lei vang mahtibang bokin neuno naven thu ngengpite suaktik thei hi.
Thing le hampate iti bang takin ngam zalzet ahi vangin meithem neuno in, a kangtik khawng theih khi ngaisungta un. Mahten lei cu meithem tuah bangve hi.
6 Lei cu a pha ngawlmi hi a; pumpi sungah umnak mun nei in mahlai pen phat ngawlnakte tisa pumpi venghawng sungah zalhtik hi. A nunnak uh cu a zung tian mei tuah kangin mah meipi cu hell mun pen a tulto mi hi.
7 Mihingin ngamsa hempoh a hilh theih ngawlmi umma hi. Ngamlak a, ngamsate, vanote hei hihen, a bok a vakmi ngamsa le tuisung ngasate hei hihen hilhin, kem thei khawng hi.
8 Mahnaven kamsung a lei cu kem theitu ngangai kuamah umma hi; lei cu a pha ngawlmi le uk theih ngawlmi hi. Mithat thei ngu sia neimi hi.
9 A lei uh cu Topa le Pa Pathian thangphatnakah mang hung a, ama mel suunin, a bawlmi a mihingte tamsiatnakah mang leleu hung hi.Ref 3:9 Pian 1:26;
10 Thangphatnak awnkam le tamsiatnak awnkam cu kam pa khat sung pen tul hi. U le naute aw, hitih bang tukmi kha ma hi.
11 Ciktui put pa khat sung pen tui hum le tuikha suak kawm awng ma hi.
12 U le naute aw, theikung pen olif ngah awng ma hi. Sabit kung pen thei ngah awng ma hi. Ciktui al pen tui hum suak thei ma hi.
Humlam Pen A Hungmi Cihnak
13 Nangmu lakah cihnak le theihnak a neitu um uh cim? Na um uh tale ngamtat pha in langtik hen na, niamkhiatnak le cihnak tuah a bawlmi na pha tuah langtik hen.
14 Mahnaven nangmu lungmu sungah iksiknak, mihuatnak le mai matan ca ngaihsutnak bek a dim tale cip ing tin, ultung pahsuh un, thutak humah sualnak a bawl limi hi saw uh ci.
15 Mahtibang cihnak cu vancung pen a hungmi kha ma hi. Leihum cihnak cu hawvang dotu cihnak hi in, dawi siasuak cihnak saw khi hi.
16 Iksiknak le hampumnak bek umnakah buainak le phat ngawlnak a phunkim um bok hi.
17 Mahnaven van pen a hungmi cihnak cu i dang sangin a thiangmi cihnak hi. Mah i humah lemdaihnak tuah dim hi. A lungnemin miphial thiam hi. Hehpih ningnatnak nei in, nadeh pha ngah suahpih hi. Deidatnak le iksiknak nei ngawlin ultunnak vang nei ma hi.
18 Mahten lem bawltu tei lemdaihnak tuah a cinmi anci pen a lak haw mi a ngah cu phatnak hi.