5
Mihau Tei Ngallinnak
1 Noh mihaute, ka hilhmi hi ngai un. Na hum uhah a heng tukmi haksatnak hangin kapin tauli un.
2 Na hauhsaknak uh cu pai khawngin, na nikcen puansilh uhte leikhalawnin eihsakin, muat khawng tuk hi.Ref 5:2-3 Mt 6:19;
3 Na sui le ngun uhte cu salkai khawngin, mah salkaimi in nangmuh a mawhsiattu tetti in cang tuk a, meikang bangin na taksa uh a eitu hi tuk hi. Tu in, a dawlbel hunah a lalthong khawng tukmi sum le pai khawl uh ci.
4 Na lo uh a nadektu tei lawhman pia ma uh ci. Mah hangin na an latu tei phuk lihnak le kamtamnak cu Cungnungbel Topa Pathian in za zo hi.Ref 5:4 Daan 24:14-15;
5 Hi leihumah nunnopzet le lungnop zetin nung zo uh ci. Thah tukmi ngamsa bangin thah ni ten thauzet tukin cawmdun zo uh ci.
6 Sualnak nei ngawlte sual na not uh i humah a doleh thei haw ngawl vangin that uh ci.
Thinsaunak le Thungetnak
7 U le naute aw, a Topa uh a hunleh laklawh thinsau zetin um un, lobung pa khi ngaisung teh un, a lo pen a sunglawi mi an a suah laihngawl sung zong thinsau zetin ngak hi. Khuapi nguah le cuk nguah heng tuk hi, tin thinsau zetin ngak hi.
8 Mahti bang bokin nangmuh vang thinsau zetin um un, na muansannak uh khohtik un. Itahim titale Topa i hennak ni nai zo hi.
9 U le naute, pa khat le pa khat mawhsiatdun pahsuh unna, Pathian in mawhsiat bok tukma hi. Thukhentu heng awndiak toh hangin ngallingin um un hi.
10 U le naute aw, Pathian minin, a awntu profette khi phawk leleng un. Haksatnak humah thinsau zetin, a thuak theitu a hih haw hangin amuhte khi na zohteh tuk uhmi hi.
11 A thuak theih haw hangin mi lungdammi hi haw tuk tin ti hung hi. Job i thinsaunak cu thei zo uh ci. Pathian in, a dawlbel ten cangkim zetin pia tihvang thei hung hi. Itahim titale Pathian cu hehpihnak a neitu hi.Ref 5:11 Job 1:21-22; 2:10; Saam 103:8;
12 U le naute aw, thu na tepdun uhten tamsiatnak tuah bawl pahsuh un, van hihen, lei hihen, thil dadang hei hihen, a min salin tamsiatnak tuah bawl pahsuh un. Mah hi, tin na ti nuam uh tale, ‘Mah hi,’ ti inna, mahma hi tin na ti nuam uh tale, ‘Mahma hi,’ tin ti in, mahtin na titale Pathian in mawhsiat tukma hi.Ref 5:12 Mt 5:34-37;
13 Nangmu lakah haksatnak a tawktu um uh cim? Na um uh tale thungen hen. A lungdam mi um uh cim? Na um uh tale thangphatnak la sa hen.
14 Nangmu lakah a na mi um uh cim? Na um uh tale pawlpi upate samin, Topa i min tuah sathau noihin, thunget sak haw tuk hi.Ref 5:14 Mk 6:13;
15 Upnak tuah thungetnakin tina cu damtik tuk hi. Topa in tidamnak pialeh tuk a, sualnak a bawlmite vang ngaidam tuk hi.
16 Mah a hih hangin na sualnak uhte pa khat le pa khat phuangdun unna, thungen langkhat un. Mahten damnak ngah tuk uh ci. Midik tei thungetnak cu mual nei hi.
17 Elijah cu eimuh bang mihing hi bok hi. Mahnaven nguahzu tuk ngawlin thintak zetin thu a nget ten a ngam sungah kum thum le alang sung nguahzu ma hi.Ref 5:17 1Kum 17:1; 18:1;
18 Mahceng ten thungen lehin, nguahzuleh hi. Mahten leipi pen tui le ante suakleh hi.Ref 5:18 1Kum 18:42-45
19 U le naute aw, nangmu lak pen pa kha khatin thutak pen pialin, a dang pa khatin, a pui kikleh tale,
20 lampialnak pen misual a pui kiklehtu in, mah misual i hawvang cu thihnak pen nunpatnak ngahin, a sualnakte a tamzet vangin ngaihthiamnak ngahtik thei tih cu cing leng un hi.Ref 5:20 Thup 10:12; 1Pet 4:8