2
Deidatnak Nei Pahsuh Un
1 U le nau aw, sunloihnak tuah a dimmi Topa Jesuh Khrih umtu na hih uh hangin ituk mahten mi deidatnak nei pahsuh un.
2 Thu tehkipnakin mi pa khat cu sui zungbut le nikcen puansilh phazet tuah khawmnakah hungin, mi ca-ngahpa cu vansilh bal liamluam tuah hung bok hi.
3 Mahten van phazet a silhtu cu upatin, a lakah, “Hi khunnak phabelah khungin hi,” ti uh ci: mahten mi ca-ngahpa cu, “Hilai lamah khin dingto: mah ahimata ka kebul suat humah khungin,” na ti uh tale,
4 nangmu lakah deidat dunnak nei uh ci. Mahtibang lungmu sehuainak hangin thukhennak bawl uh ci.
5 Ka ihmi u le naute aw, ngai hih un, Pathian in, mi ca-ngah hi upnak lamah mi hausa hi tukin le amah a ittu tei lakah a tepsami a uknak cotu tukin teng hi.
6 Mahnaven nohten ca-ngah nautat uh ci. Akua kaw noh a zawnsaktu le thusontu tei mai ah a kai litu khi? Mihaute hi haw ma maw?
7 Pathian i piakmi min pha a sonsiatu vang mihaute hi.
8 Lai Thiangtho sungah na inn nelte cu nangmah na ih bang bokin it in, tihmi Pathian Uknak i daan cu na zui thei tale, a manmi bawl ci.Ref 2:8 Thiam 19:18;
9 Mahnaven a pualam i muhnakin mi na deidan tale sual ci a, daan pahbal hi zo hi.
10 Mahten a kuakua hei hihen thukham pa khat a pahbal tale thukham venghawng pahbaltu hi.
11 Itahim titale, “Nupa sualnak bawl pahsun a titu in, mithat pahsun,” ti bok hi. Nupa sualnak na bawl ngawl vangin mithat na hi tale daan a pahbaltu hi ci.Ref 2:11 Suah 20:13-14; Daan 5:17-18;
12 Eimuh luatnak a piatu daan i thukhen tuk mite bangin na ziaza le na thil bawl zia cu hi tahen.
13 Mi hehpihnak a nei ngawlmi cu Pathian in, a thu a son ten a humah hehpihnak neileh bok tukma hi, mahnaven thukhennak cu hehpihnakin neh hi.
Upnak le Dehnak
14 U le naute aw, mi pa kha khatin upnak nei ing a ti hei in, a dehnak tuah a lak thei ma tale i nemcuam him? Mah upnakin nunpan thei tuk maw?
15 Nangmu Khristian unau lakah pano hihen, numei hihen, nikcen puansilh a sammi le eih tuk a nei ngawlmi um tibang ahin;
16 Mahmi tei lakah, “Pathian in thupha pia tahen, khawlumno in um unna, an phano in ei un!” tin na tih uhmi cu amu nunnak ca in, a kulmi na pia uh ma tale i nemcuam him?
17 Mahti bang bokin upnak vang hi bok hi. Dehnak a tel ngawlmi upnak cu a thi hi.
18 Mahnaven mi khenkhat ten, “Mi pa khatin upnak nei in, a dang pa khatin dehnak nei hi,” ti haw tuk hi. Ka donlehnak cu, “Dehnak um ngawlin upnak bek na neihmi lak inna, kei vangin ka dehnakin ka upnak lak tung,” tih hi, hi.
19 Pathian pa khat bek um tih sang uh cim maw? Mahtin na san uh cu phazet hi. Mahnaven khawhuaite hei in Pathian pa khat bek um tih khi sang bok haw a, lau in can tawtok bok haw hi.
20 Misilte! Dehnak tel ngawlmi upnak cu zolthu hi tih lak nang, nuam uh cim?
21 Ita a pupi uh Abraham in Pathian tuah lemdunnak nei thei him? A capa Isaak cu a Pathian biaknak tuk biakpiaknakin, a man ten, mah a piaknak hangin lemdunnak co hi ma maw?Ref 2:21 Pian 22:1-14;
22 Mahmi cu thei ma uh cim? A upnak le a dehnak cu hawh langkhat hi. A dehnak hangin a upnak cu cangkim hi.
23 Mahten Lai Thiangtho in, “Abraham cu Pathian umin, mah a upnak hangin Pathian in midikin sang hi,” a tihmi kim hi. Mah hangin Abraham cu, “Pathian i ngualcam,” tin sammi hi.Ref 2:23 Pian 15:6; 2Khang 20:7; Isa 41:8;
24 Mah a hih hangin mihing cu a upnak bek hang hi ngawlin a dehnak hangin Pathian tuah lemdunnak co hi tih thei uh ci.
25 Numei pha ngawl Rahab thu ah vangin mahtibang lelengin hi. Israel mi vilvengtute khi komzetno in, a zoh ceng ten lampi dang a, taivawknak tukin bawm hi: mahtibang a dehnakin Pathian tuah lemdunnak co hi.Ref 2:25 Josh 2:1-21;
26 Mah a hih hangin taksa pumpi cu hawvang a tel ngawl ten a thih bangbokin, upnak vang dehnak a tel ngawl ten a thi hi.