JAMES
Lak pen Laikuat
(The Letter from James)
Thulamsial
James laikuat hi leihum khua hempoh ah a lengkekmi Pathian i mihing tei lakah a kuatmi hi. Khristian nuncan, umdan, ziaza hilhnakte khop khawmmi hi. Lai ngantu in, a hilh nuammi theihcel theihnak tukin tehkipnak tampi mangin hauhsaknak le zawn le ngaunak, sualsohnak, mi deidatnak, upnak le dehnak, niamkhiatnak, midang sonsiatnak, ultunnak, thinsaunak le thungetnak tihte vang ciang zetin langtik hi.
Hi laikuatin Khristian biaknak sungah upnak tuah zui in, deh le bawlnak a thupi dan langtik hi.
1
1 Pathian le Topa Jesuh Khrih i sila keimah James in leihum khua hempoh ah a lengkekmi Pathian mihing nangmuh tei lakah laikuatin nuksat ing.Ref 1:1 Mt 13:55; Mk 6:3; Nung 15:13; Gal 1:19;
Upnak le Cihnak
2 U le naute nangmu lakah haksatnak a phunkim a hen ten mi bawngpha hung tin ngaisung un.
3 Itahim titale na upnak uh tuah mahtibang khingkhainak le haksatnak na neh uh ten thuakzawhnak heng hi tih cu thei un hi.
4 Tingsapnak um ngawlin a cangkim le a pitungmi na hih theihnak tukin a dawltawpnak tian a thuak theitu hi tukin zuam un:
5 Nangmu lakah cih le thiamnak a tingsammi na um uh tale Pathian nelah ngen henna, Pathian in pia tuk hi. Itahim titale akua i lakah hei hihen Pathian in phal zetin le hehpihnak tuah pia hi.
6 Mahnaven mahtin a nget ten lungmu aicannak um ngawlin, ngah loli tung tin upnak tuah ngen hen. Lungmu aicannak a neitu cu huih i mun hempoh amuh vawkmi tuicawk bang hi.
7-8 Mahtibang mihing cu lungmu phun nih a ho mi le a dehnak hempoh ah ciangkai ngawl a hih hangin Topa i lak pen na pa kha khat ngah tukin muang pahsuh hen.
Zawn le Hauhnakte
9 A tingsammi Khristian unau pa kha khat cu Pathian i bopnak hang neinungin, a um ten a lungdam tahen.
10 Mahten a hausa zo Khristian unau khi mi ca-ngahin, a umleh tale a lungdam leleng hen. Itahim titale mihaute cu hampa lak a, pak bangin thiim haw tuk hi.Ref 1:10-11 Isa 40:6-7;
11 Nisuak sa ten pak kung cu thiimin, a mawinak bo hi. Mahti bang bokin mihaute cu nanok zetin, a um haw laih takin thamthong haw tuk hi.
Thiatha Zohnak le Sualsohnak
12 Thiathazohnak a tawh hun ten khim zetin a ding theitu cu mi lungdammi hi. Itahim titale mahtibang haksatnak a neh theih hangin Pathian in amah a ittu tei ca in, a tepsami nunnak cu laksawngin co tuk hi.
13 Mahtibang thiatha zohnak a tawktu ten, “Pathian in thiatha zo hi,” tin ti pahsuh hen. Itahim titale Pathian cu sualnak tuah thiathazoh theih ma hi. Amah vangin kuamah i thiatha zo ma hi.
14 Mahnaven mihingin sualsohnak a tawh ten ama tisa deihnakin leem cihin, lampialah hawhpih hi. Mi pa kha khatin ama deihnak bangin a ngamtat ten sualnak piangtik hi.
15 Tisa deihnakin nau bang pai in, a hintulmi cu sualnak hi: mahten sualnak cu khangin, ngah a ngah ten thihnakah heng hi.
16 Ka ihmi u le naute aw, zol sang pahsuh un.
17 A phami le a cangkimmi laksawng hempoh cu vancung pen a hung mite hi. Vancung a, vaknak bawltu Pathian lak pen hung haw hi. A bawlmi nate kheel naven Pathian cu kheel awng ma hi. Hun le cante a hel li vangin Pathian lak pen khuathim tih um awng ma hi.
18 Ama lungkimnakin, a bawlmi hi hung a, eimuh a semsuahnakah thutak awnkam mang hi. Mah hangin a semsuahmi na hempoh lak pen ohte cu a ngah masabelmi hung hi.
Zaknak le Bawlnak
19 Ka ihmi u le naute aw, hi thu hi cing leleng un. A kuakua hei hihen, thu theih nuamnak lamah a zuan ngangmi hi unna, ot tuk le thinuknak lamah zuancum mi hi un.
20 Mihing tei thinuknakin Pathian i tumtahmi diknak suaktik thei ma hi.
21 Mah hangin a nawngkai le a ninmi ngamtat pha ngawl hempoh cu vawk khawng un. Pathian nelah ap unna, nangmuh nunpan theitu thudik cu nangmu lungmu sungah khumin pom un.
22 A thu ka theih nungsang tawk tih thongin nangmuh le nangmuh zoldun ngawlin dek suak tukin ngaisung un.
23 A ngaitabek zamin a deksuak ngawltu cu thalang sungah mel a zoduntu bang hi. Mahpa cu thalangah a mel zodunin, a hihnak bangkekin mu hi.
24 Cel zetin, a zohdun ceng ten hawhin, ka mel iti bangta him tih thei lehma toh hi.
25 Mahnaven mi a luattiktu a cangkimmi daan khi tihtak zetin, a ngaisung lelengtu cu a ngai thawthongtu le a phawkngiltu hi ngawlin a bawl suaktu hi. Mahtin a bawlsuak hangin Pathian in thupha pia tuk hi.
26 Biaknak lamah hantiam ing tin, a titu um uh cim? Mi pa kha khatin Khristian ing, ti thah lengin, a awnkam a sup zo ngawltu cu amah le mah zolduncopin, a biaknak cu thawnthong hi.
27 Pathian mai pen a thiangthomi biaknak cu, nu le pa nei ngawl ca-ngah le meivong haksate cawm le vaktu, a cingkhawitu le hi leihumpi i siatsuah ngawlte khi hi.