13
Pathian Lungdamnak
1 Khristian u le nau na hih uh bangin pa khat le pa khat itdun leleng un hi.
2 Na inn uhah mikhual tungtikin it un hi. Mahti bangin a bawltu cu a theih haw ngawlin vancungmite zintungtik mek haw hi.Ref 13:2 Pian 18:1-8; 19:1-3;
3 Thawngtate phawkngil thong pahsuh un; Amuh tuah thawngta langkhat bangin ngaisung un. Haksatnak a thuaktute phawkngil pahsuh un; amuh tuah a thuak bangin ngaisung un.
4 Huaidunnak cu kua hempoh i upat maizah tukmi hi. Nupi le pasal cu muantakin um veve haw hen. Nupa sualnak a bawltu le angkawm sualnak a bawltu cu thukhennak tawk haw tuk hi.
5 Sum le pai deih leita pahsuh un; na neih zahno uhin lungkim un. Itahim titale, Pathian in, “Taisan tuk mang, zamthong tuk mang,” ti hi.Ref 13:5 Daan 31:6,8; Josh 1:5;
6 Mahtibang a tih hangin,
“ Topa cu keimah bawmtu hi,
imah lau tuk mang hi.
Miten ka humah i hum
a tih theih haw tuk?”
tin tituk hung.Ref 13:6 Saam 118:6;
7 Pathian i thu a hilhtu, ni dang laih a, nangmuh lampuitu khi phawk leleng un hi. A nunsung haw in, a umdan haw le a thihnak haw thu khi ngaisungleh unna, a upnak haw vang cung un hi.
8 Jesuh Khrih cu zantaak, tuni le kumkhua in kheeldun awng ngawlmi hi.
9 Zilhnak phun dadang ten a dikmi lampi pen pui sual haw pahsuh hen. A lungmu, thazaang cahnak uh cu an eih cungcangah eih tuk le eih tuk ngawl tihmi daan zuinak pen ngahmi hi ngawlin Pathian i hehpihnak sung pen ngahmi hi saw hi. Daan a zuitute cu a zui haw mi daan in bawm cuang ma hi.
10 Judah ten Pathian a biak haw ten nadektu thiampi tei biaklandawh hum a biakpiaknak piakmite khi amu nuanuamin ei thei haw ma hi.
11 Nganhing thisan cu Judah Thiampi Sang ten sualhah biakpiaknak ca in Mun Thiangthobel ah tumpih haw hi; mahnaven mah ngan cu ngiahbuk pualamah mei tuah haal haw hi.Ref 13:11 Thiam 16:27;
12 Mah hangin Jesuh vang a thisan cu mipi tei sual thiantiknak tukin khuapi pualeu lamah thi hi.
13 Mah hangin eimuhte vang ngiahbuk pawleu ah hawhin, a thuakmi zahcaknak thuak bok tukmi hung hi.
14 Itahim titale hi leihumah kumkhua a kho mi khuapi nei ma hung; a heng tuk laihmi khuapi bek cuan hung hi.
15 Mah hangin a biakpiaknak uh ai-in, thangphatnak cu Pathian nelah pia leleng nung; mahtin a piak uhmi cu a kam uh pen Jesuh cu a Topa uh hi tin, a phuannak uh hi.
16 Pa khat le pa khat bawmdunin, phatnak bawlsakdun tuk phawkngil pahsuh un, itahim titale mahmi cu Pathian lungdamtiktu biakpiaknak hi.
17 Nangmuh lamhuaitu tei thu ngai unna, a thupiaknak haw bangin zui un. A nadeh dan haw cu Pathian mai pen phuangleh khawng tuk a hih tak cawlngawlin, a cinkhawinak haw hi. A thu haw na ngai uh tale lungdam thatui in, a nadek haw tuk hi; a thu na ngai uh ma tale thasiatnak tuah dek haw tuk a, mahmi cu noh tei ca nemcuamnak um hihim tukma hi.
18 Keimu ca in thungen leleng un hi. A dikmi khi bawl nuam leleng ka hih uh hangin sia le pha khencelnakah ka lungmu uh thiang hi.
19 Nangmu lakah Pathian in, a henleh paltik theihnak tukin, nasezetin thungen un, tin kun ing.
Thupha Piaknak le Nuksatnak
20 Biakpiaknak tukin a nun a piaknak hangin Tuucing ngengbel Topa Jesuh cu Pathian in thihnak pen tholehtik zo hi; mahten a thihnak hangin kumkhua thutiamnak cu khotik zo hi.
21 Lemdaihnak Pathian in ama deihmi na bawl theihnak tukin, na kul uhmi thilpha hempoh khi pia zazal tahen; Jesuh Khrih hangin a deihmi cu bawl zal hen. Kumkhua pen kumkhua tian Khrih cu sunloih hi tahen! Amen.
Tawpnak Thunget
22 U le naute aw, ka laikuat hi a sau leita ngawl poh hangin thapiaknak thu ka hilhmi hi thinsau zetin ngai un, tin ngen ing.
23 A unau uh Timote cu thawnginn pen suakleh zo toh hi tih khi theitik nuam ing. A heng man tale nangmuh tawk tukin ka hun ten pui thah tung hi.
24 Nangmuh lamhuaitu le Pathian i mitei venghawng lakah nuksatnak hilh sak un hi. Italy ngam a ummi a unau uhte hei in nuksat haw hi.
25 Pathian i hehpihnak thupha cu na venghawng uh humah um tahen.