JOEL
Laibu
(The Book of Joel)
Thulamsial
Profet Joel thu cu theihnak dawmno bek um hi. Itih hun hawngin um him tih cu ciang ma hi. Mahnaven hi laibu cu Persia Khan Sung 500 BC pen 400 BC laklawh sung ngatmi hi ol hi. Joel in Palestine ngam khaau tei siah suah thuleh nguah zuk ngawl hangin ihempoh ko khawngin, a umnak thu son hi. Hiti bang a piannak sung pen Pathian in, a deihnak a zui ngawl mite a dantat tuk hun, Topa i ni, tihmi tiamtehnak cu muh theih hi. Na sualnak uh sik unna, thupha muicu pia tung hi tin hi. Topa i tihmi cu Joel in, a miphun tei nelah hilh hi. Hi laibu sung a sialsiah takbelmi cu Pathian in, a Haw vang cu pano, numei, khangno le upa a venghawng hum hawah hengtik tung hi tihmi thu hi.
1
1 Hithu cu Pethuel capa Joel nelah Topa i hilhmi hi:
Khaaumawng Ten Ngam Siatsuah
2 Noh, khanghamte ngai hih un;
Judah ngamsung
a ummi ten thei ten un.
Na khan sung uh le
na pu le pa tei
khan hei ah hiti bang thu
piang awng a maw?
3 Hithu hi na ca tei lakah hilh unna,
na ca uhten khang khat nung
khang khat hilhdun pepel haw hen.
4 Thing eitu khaaumawng tei
eihbang cu a honpi a ummi
khaaumawng ten ei haw hi.
A hon, a honin, a ummi
khaaumawng tei
eihbang cu a dawk pepelmi
khaaumawng ten ei haw hi.
A dawk pepelmi
khaaumawng tei
eihbang cu thingnget
khaaumawng ten
eitum khawng haw hi.
5 Noh zukham misilte tho unna,
kap un; sabittui khamtute
tau li un.
Na zu intuk uhte
6 Khaaumawng honpi in,
a ngam uh sim hi.
Amuh cu ngilzet haw a,
sialcelh ngawlin tam haw hi.
A ha haw cu kiosa ha bang le
a tinte cu kiosa tin bang hi.Ref 1:6 Mang 9:8;
7 Ka sabit kungte
siatsuah khawng haw,
ka theipi kungte
ek khawngin,
a ceh nei ngawlin
bawl haw;
A ngah thawi khawngin,
a hawng tian hawk khawng haw;
A kangkak nangawn
heuh ciang khawng pilpial haw hi.
8 Noh mihingte, a pasal tuk
tangval pa i thihsanmi
khanglai nu bangin kap un.
9 Topa i Biakinn ah piak tukmi
sabittui le sangvutte
umleh ma toh hi.
Topa i nadektu
noh thiampite kap un!
10 Lo hempoh sia khawng zo in,
lo ngamah imah tang ma toh,
ankungte sia khawng haw zo.
Sabittuite kangin, sathaute
11 Lobungte, thasia un;
sabit cingkemtute,
thasia in kap un.
Sangvut le barli sangvutte
um haw ma toh.
An cop tuk imah umma hi.
12 Sabit kungte thiimin,
thei kungte ko hi.
Tale kungte, Ung kungte,
apple kungte le
thingkung dangte vang
ko khawng zo haw hi.
Mihing tei ca in lungdamnak
bota hi.
13 Biaklandawh hum a nadektu,
noh thiampite
thangkhau puan
silhin kap un!
Biakinn ah hawhin,
zankhua kap un.
Pathian ah na piak tuk uh
an le sabittuite bo khawng zo.
14 An can ni bawl unna,
nadeh ngawl ni-in bawl un!
Topa i Biakinn sungah
upa le ngamsung
mihing hempoh
sam khawng un.
Topa Pathian nelah
a kapthahin,
hehpih kun un.
15 Topa i ni cu nai zo hi.
Mah ni cu lauhuai leita!
Cungnungbel el pen a nase zetmi
siatnak heng tuk hi.Ref 1:15 Isa 13:6;
16 A mitmuh lengin
ante bo khawngin,
Pathian inn sung pen
lungdamnak le lungnopnakte
bo khawng zo ma maw?
17 Lei ngamko in, ancite
thi khawng haw hi.
An koihnakte sia khawng zo hi.
18 Nganhingte vang hamin kap li haw,
khuicangte lungbingin
van zoto thong haw hi.
Itahim titale eih tuk
hamhing umma toh hi;
Tuuhonte vang
thi li thong haw hi.
19 Topa aw, nangmah sam ing.
Itahim titale meipi in,
hamhing le thingkungte
kangtum khawng hi.
20 Ngamsung a um ngamsate vangin
nangmah kinzet haw hi.
Itahim titale ciktuite
kang khawngin,
hampa hempoh mei in
kang khawng zo hi.