14
Hosea In Israel Kun
1 Israel mite aw, Topa na Pathian nelah kikleh un. Na sualnak uh hang bahin, lum zo uh ci.
2 Topa lakah kikleh unna, hi bangin thungen un: “Ka sualnak uh hempoh ngaidam zal inna; ka thungetnak uh sansakin, ka thutiamsa uh bangin pahcawi tuk ung hi.
3 Assiria in pan thei cuang tukma, ka cipuhleng uhte vangin pan zo cuang haw tukma hi. Khut tuah bawlmi milim tei nelah nang cu, ka Pathian uh hi ci, tin ti tukma toh ung. Topa bawmtu nei ngawl tei nelah hehpihnak pia litu nangmah hi ci tin ti un.”
Topa In Israel Ca Tukin Nunnak Thak Tiam
4 Topa in hi bangin ti hi.
“Ka miphunte cu
ka nelah kiklehtik tung.
Ka lungmu ngangai tuah itleh tung.
A muh tei humah
ka thinukleh tukma toh ing.
5 Israel tei ca in ngamko a,
nguahtui bang hi tung hi.
Lily pak bangin pak haw tuk a,
Lebanon thingkung bangin
kho zetin poto haw tuk hi.
6 A zik thak tawtmi
olif thingkung bangin
mawi haw tuk hi.
Lebanon ngam a,
sidar thing kung bangin
namtuizet tuk hi.
7 Keima humhimnak sungah
ankungte cingin,
sabit huan sung a, sabittui bangin
a min haw thang tuk hi.
8 Israel mite cu milim tuah
pehdunnak neileh
haw tukma toh hi.
A thungetnak haw ngai in,
cingkhawi leleng tung hi.
A ceh a hing lelengmi
thingkung pi bangin
ka lim nuai ah
koih tung hi.
Keimah cu
a muicu ngahnak
bulpibel ing hi tin,”
ti hi.
9 Micip hempoh ten hih laingatmi hi theitumin, a lungmu sung hawah cing leleng haw hen. Topa i lampi cu manin, midik hempoh ten zui haw hi. Mahnaven misual ten mah lampi a zui haw ngawl hangin bahin lum haw hi.