8
Midian Mite Nehnak Nungdawlbel
1 Efraim mite cu Gideon lakah hung haw in, “Midian do tukin na hawh ten ita keimu zawmma nge cim?” Mi simsial ngawl leita ci? tin nase zetin siat haw hi.
2 Gideon in, “Na bawl uhmi tuah tehkip ten kei ka bawlmi hi, imah kha ma poh si. Noh Efraim mitei bawlmi na neuno hei, ka miphun tei bawlmi hempoh sangin thu pi saw hi.
3 Midian mitei hotu Oreb le Zeeb cu Pathian in, na khut sung loli uhah pia hi. Hi tuah tehkip tak tukin kei ka bawlmi i kaw a um?” tin ti hi. Mah a zak haw ten a thindaileh haw hi.Ref 8:3-5 Saam 83:11;
4 Gideon le ngalkap za thum cu hung haw in, Jordan ngun a kaltan nung haw ten cawlzet haw naven, Midian cu hil pepel leng haw hi.
5 Sukkoth khua a hen haw ten khua sungmi tei lakah, “Midiante kumpi Zebah le Zalmunna ka hilnak uhin ka ngalkap cawlzet zo haw hi. Hehpihnakin ka ngalkap tei ca in cangho pia zal un,” tin Gideon in ngen hi.
6 Mahnaven Sukkoth khua hotu ten, “Zebah le Zalmunna cu na khutsung um zo bangin son sisi; ita na ngalkapte cangho pia tuk laih ung kaw? Man ngah ma laih si uh si,” tin ti haw hi.
7 Mah hangin Gideon in, “Pha ei! Zebah le Zalmunna cu Topa in ka lakah a piak ten phillawn a ummi ling le so in, na taksa uh kiatbal khawng tung,” ti hi.
8 Gideon cu Penuel ah hawhin, khua sungmi tei lakah an ngen leleu hi; mahnaven Sukkoth khua mite bang lengin el bok haw hi.
9 Mah hangin a lak hawah, “Damno in ka kihleh ten na ngalvilnak inn uh siatsuah khawng tuk pah ing cuh,” ti hi.
10 Zebah le Zalmunna cu a ngalkapte tuah Karkor ah um haw hi. Phillawn miphun ngalkap hempoh sung pen thawng sawm le thawng nga bek tang haw hi. Thawng za khat le thawng sawm nih cu thi khawng zo haw hi.
11 Gideon cu Nobah le Jogbehah pen nisuahnak lampi zui in deubuk a ummi tei lampi zuito in, mah ngalkapte ngalling ngawlin a um haw laihtakin, thakhatin nam hi.
12 Midian kumpi Zebah le Zalmunna cu tai haw; mahnaven Gideon in hilin, a pa nih haw a mat ten a ngalkapte cu lengkek khawng haw hi.
13 Joash i capa Gideon cu a ngaldonak mun pen kikin, Heres Mual kawn pen hawh hi.
14 Sukkoth khua tangval pa khat manin, thu dong hi. Mah tangval pa in Sukkoth khua le khuasung upa sawm salih le salih tei min ngatsak khawng hi.
15 Gideon cu Sukkoth khua ah hawhin, khuasung mitei lakah, “Keimah dodalin, na nautat uh hi cing lai uh cim? Zebah le Zalmunna cu na khutsung um zo toh bangin na son! Ita na ngalkapte cangho ka piak lalam tuk uh na tih uh khi? Atu-in, zo un, a pa nih haw in hilai ah um,” ti hi.
16 Phillawn a um ling le so cu la ngangai a, Sukkoth khua upa bawlsiatnakin mang hi.
17 Mah hum pen Penuel khua a, tausangpi cu siatsuah khawngin, khuasung mi pano cu that hi.
18 Zebah le Zalmunna cu Gideon in, “Tabor ah na thah uhmi mihing cu akua kaw?” tin dong hi.
Amuh ten, “Nangmah bang hi haw hi. A venghawngin kumpi capa bang khawng haw,” ti hi.
19 Gideon in, “Ka unau ngeh haw hi; ka nu i capate loli haw hi. Topa i min salin hilh ing. Amuhte na that uh ngawlta ahin nangmuhte vang that bok tukma naveng,” ti hi.
20 a capa upabel Jether lakah, “Tho inna, thatin hi,” tin hilh hi. Mahnaven Jether in, a nam hei dawk ma hi. Tangval tungno a hih hangin a lau hi.
21 Zebah le Zalmunna in, “Hung inna, nangmah in that vele, Papi that tukin papi kul bok,” ti hi. Mah hangin Gideon in Zebah le Zalmunna cu thatin, a kalauk tei ngawng a khaihmi na manpha la hi.
22 Mah ceng ten Israel miten Gideon cu, “Keimuh uktu hi in, nangmah le na capa, na casuan tianin! Midian mitei khut sung pepan suak zo uh ci,” tin ti haw hi.
23 Gideon in, “Nohte uktu tuk cu kei hi tuk mang, ka capa hei hi tukma. Noh uktu tuk cu Topa hi tuk,” ti hi.
24 Mahnaven a lak hawah, “Na pa khat ngen tung hi; ngal tei lak pen na lon uhmi bengbet pia thei ni uh cim?” tin ti hi. (Midian mite cu phillawn mi hi haw in, sui bengbet mang haw hi.)
25 Mipi ten, “Lungdam thatui zetin pia tuk ung hi,” tin ti haw hi. Puan pa khat phah haw in, ngal tei lak pen a lon haw mi, sui bengbet mah puan humah sung susuih haw hi.
26 Gideon i ngetmi sui bengbet cu a venghawngin pawng sawm luk ngit hi. Hih sung pen a awh haw mi na manpha khi-nguite le Midian kumpi tei silhmi puan manpha le a kalauk tei ngawngah a khaih haw mi na manpha tel ma laih hi.
27 Gideon in sui tuah milim bawlin, a khuapi Ofrah ah koih hi. Israel mi venghawngin Pathian nunghekin, mah khua ah hawhin, milim cu bia haw hi. Gideon le a innkua tei ca in mah milim cu thangsiahmi bang hi.
28 Mah bangin Midian mite cu Israel miten nehin, Israel mi ca in lau tuk ngal umleh ma toh hi. Gideon a nun sung, kum sawm li sung cu Israel ngam sungah lemdaihnak um hi.
Gideon Thi
29 Joash i capa Gideon cu pinin ama innah um hi.
30 Zi tampi a neih hangin capa sawm salih nei hi.
31 Shekhem khua hei ah zineu pa khat nei in, mah nu in capa pa khat hin hi, a capa cu Gideon in, a min Abimelek sa hi.
32 Joash i capa Gideon cu mi khan phazet hi. A thih ten Abiezer hinnam tei khua Ofrah ah a pa Joash i khanah vui haw hi.
33 Gideon a thih nungten Israel miten Pathian nunghek haw in, Baal pathian bia haw hi. Baalberith cu a pathian haw tukin bawlin, bia haw hi.
34 A elkim ngal tei khut sung pen a pan suaktu Topa a Pathian haw cu theileh haw ma toh hi.
35 Israel tei ca in, a bawl theih sungin thil nemcuamzet tampi a bawltu Gideon innkua tei hum hei ah lungdamnak thiam haw ma hi.