7
Gideon In Midian Mi Neh Hi
1 Gideon le a mite cu zingtungno in tho haw a, Harod ciktui elah ngiahbuk sam haw hi. A sak haw a, Moreh mual el munlawn cu Midian mitei ngiahbuk hi.
2 Topa in Gideon lakah, “Midian mite neh tukin na lak a, mihing tam leita hi. Keima sunloihnak hi saw ngawlin, amu zaangtha tuah nehtuk heng sa in, tuangkhawnnakin mang sual haw kawn.
3 Na mihing tei lakah than inna, launak neimi hempoh cu Gilead mual pen innah kik haw hen,” ti hi. Mihing thawng sawm nih le thawng nih kikin, mihing thawng sawm tang haw hi.Ref 7:3 Daan 20:8;
4 Topa in Gideon lakah, “Na mite tam leita haw laih hi, lui ah hawhpih inna, keimah in khensak tung. Na lakah hawh hen ka tihmi cu hawh hen hi. Na lakah hawh pahsuh hen ka tihmi cu hawh pahsuh hen,” ti hi.
5 Gideon in lui ah hawhpihin, Topa in, “Uico bangin a lei tuah tui liakin, a intute le khukdinin tui a intute khenkhuai in,” tin ti hi.
6 Khut nihno tuah intuk tui la in, a intu cu a venghawngin, mi za thum haw hi. Adangte hempoh cu khukdinin tui cu in tek haw hi.
7 Topa in, “Bawm tung a, khut nihno tuah intuk tui la in, a intu mihing, za thum tuah Midian cu neh tuk uh ci. Adang cu pin haw hen,” tin Gideon lakah ti hi.
8 Mah hangin mihing za thum sial ngawl a dang Israel mi hempoh cu a inn ten hawah pintik hi. Mahnaven a sunsiah le pengkul cu zam khawng haw hi. Midian mitei ngiahbuk cu a umnak haw pen nuailam munlawn sungah hi.
9 Mah zan cu Topa in Gideon lakah, “Thakhatin hawh inna, Midian mitei ngiahnak hawah namin hi. Itahim titale na khut sungah nehnak pia tung hi.
10 Mahnaven na lau tale na umlawhpa Purah tuah hawh masa hih un.
11 A ot haw na zak uhten do ngam tuk uh ci,” ti hi. Mah hangin Gideon le a umlawhpa Purah cu ngal tei umnak el, tawh masakbel ngalvilnak mun tian hawh haw hi.
12 Midian mi, Amalek mi le phillawn miphun cu mah munlawnah a lung a lei in, khaau hon bangin dim haw hi, a kalauk tei tamdan ngen cu tuipi mawk a philnel zah haw hi.
13 Gideon mah mun a hen ten mi pa khat pan mangmanin, mah a mang cu a ngualcam pa khat lakah a hilhmi za hi. “Ngai kekin! ka mangin barli sangvut tuah bawlmi cangho zawl khat a ngiahbuk uhah cangsuk hi. A ngiahbuk a, puanbuk pa khat delh ngahin, mah puanbuk cu cimin, a lingletin leihumah phalh,” ti hi.
14 A ngualcam pa in, “Na mang i sullam cu Joash i capa, Israel mi Gideon i ngalnam hi; a tih nuammi cu thildang kha hihim tukma. Midian mite le a ngalkap hempoh uh cu Pathian in Gideon khutah pia zo hi!”
15 Mah a mang i sullam cu Gideon in, a zak ten khukdinin Topa bia hi. Israel tei ngiahbukah hawhin, “Tho un! Midian ngalkap tei humah, Topa in nehnak nohte pia tuk,” ti hi.
16 A ngalkap za thum cu khen thumin khen a, pengkul pa khat ten le a sungah mei koihmi beel pa khat ten pia hi.
17 Midian ngalkap tei ngiahnak el, a hen uhten keimah zui unna, ka bawl bangin bawl un.
18 Keimah le ka mihing ten pengkul ka tum uhten, a ngiahbuk haw kimin, pengkul tum ten un hi, ‘ Topa ca tuk le Gideon ca tuk,’ tin au un hi,” ti hi.
19 Gideon le a mihing za khat cu zanngil laih ngawl deuhin, Midian ngalkap tei ngiahbuk el tawh masakbel ngalvilnak mun heng haw in, ngiahbuk cingtu na thekdun ceng sem haw hi. Pengkul cu tumin, a ken haw mi beel cu sukeh tawtok haw hi.
20 A hon thumin, a pengkul haw cu tumin, a beel sukeh haw hi. A veilam khut tuah mei cawi haw a, a taklam khut tuah pengkul cawi haw hi, “ Topa i ca tuk le Gideon ca tuk ngalnam tin au tawtok haw hi.”
21 A ngiahbuk haw el a dinnak mun tenah ding haw hi. Midian ngalkapte thinsu linglawngin, au thahin tai keh bengbung haw hi.
22 Mah bangin mihing za thum pengkul a tum lih laihtak haw in, Midian ngalkap cu Topa in amuh le muh thatduntik hi. Tai haw in, Zererah lamah Beth Shittah tian, mahten Tabbath el a, Abel Meholah khua tian tai haw hi.
23 Naftali miphun, Asher miphun le Manasseh miphun sung pen ngalkap samdun haw in, Midian mite cu hawlvawk haw hi.
24 Gideon in Efraim mualhum ngam hempoh ah mi hahin, “Hung unna, Midian mite do un. A taivawk haw ngawlnak tukin Jordan ngun le luidang pen Bethbarah tian kham un hi,” tin cah hi. Efraim mite cu samkhawmin, Jordan ngun le ngun dang pen Bethbarah tian khah khelhin, tai haw hi.
25 Midian hotu upa pa nih, Oreb le Zeeb cu man haw hi. Oreb suangpi ah Oreb cu that haw a, Zeeb cu sabit ngawinakah that haw hi. Midian mite cu hil pepel haw in, Oreb le Zeeb tei lu cu Jordan ngun ngal Gideon lakah hen haw hi.