9
Abimelek
1 Gideonnote 9:1 Gideon cu Jerubbaal tih hei in sam haw hi. i capa Abimelek cu a nu i unau pih tei umnak Shekhem khua ah hawh hi.
2 A nu i unau pih tei lakah, “Hi khuasung mite hi Gideon capa mihing sawm salih tei uk tuk deih uh cim maw? Ahimata mihing pa khat i uk deih saw uh cim? tin dong un. Kei cu nangmuh tei thi le sa loli ka hihnak hi phawk ngil pahsuh un,” ti hi.
3 A nui unau pih ten khuasung mitei lakah a tih bangin hilh haw hi. A sangngam a hih tak khuasung miten Abimelek teng saw haw hi.
4 Baalberith biakinn sung a, ngun tangka sawm salih pia haw hi. Abimelek in mah tangka tuah amah zuitu tukin nemcuamnak nei ngawl mi vaktham sawm salih zawng hi.
5 A pa i khua Ofrah ah hawhin, a pa Gideon i sungsuak loli a unau sawm salih cu suang pa khat humah that khawng hi. Mahnaven a nautabel haw Jotham cu a ngelh hangin suakca ngah hi.
6 Shekhem khua le Bethmillo khua sungmi cu khawmdun khawm haw in, Shekhem khua a, sasua kungah a hawh nung haw ten Abimelek cu kumpi in bawl haw hi.
7 Mah thu cu Jotham in, a zak ten hawhin, Garizim muallekah dingin, a aw neih zah tuah “Maw Shekhem khua mite, ngai zal unna, Pathian vangin ngai zal tahen.
8 Tanglaihin thingkung ten amu ca tukin kumpi teng haw hi. A venghawng haw in olif kung cu, ‘Ka kumpi bawi hi in hi,’ tin ti haw hi.
9 Olif kungin, ‘Nangmuh uktu tukin pathian le mihing upatnak tukin ka thau hi suah ngawlin um phal tung maw?’ ti hi.
10 thingkung ten theikung lakah, ‘Nang ka kumpi uh hi in,’ ti haw hi.
11 Mahnaven thei kungin hi tin don hi, “Nangmuh uktu tukin ka ngah ukzet hi ngah ngawlin um phal tung maw?” ti hi.
12 thingkung ten sabit ngui lakah, “Nang bek ka kumpipa uh hi in,” tin ti haw hi.
13 Mahnaven sabit ngui in hi tin ti hi, “Nangmuh uktu tukin pathian le mihingte lungdamtiktu ka sabittui colhphal tung maw?” tin ti leleu hi.
14 Mah hangin thingkung ten lingcampi lakah, “Nang bek ka kumpipa uhin cang vele,” tin ti haw hi.
15 lingin, “Na kumpipa tukin na deih ngangai uh ahi tale hung unna, ka nilimah cawl un hi,” ti hi. ‘Na cawl ma uh tale ling campi sung pen mei alh tulto tuk a, Lebanon a ummi sidar thingte kangtum khawng tuk hi,’ tin ling campi in ti hi.
16 “Na lungmu ngangai tuah le lungmu thiangno in, Abimelek hi kumpi in koih uh cim maw? Gideon le a innkua humah thil dik bawl ung hi tin, ngaisung uh cim? Na pha a dehnak hangin a ngah takmi ngah hi tin um uh cim?
17 Komno in ciing un, ituk zahin kaw ka pa in nangmu ca in ngal a do? Midian mitei khutsung pen na suahcaknak tuk uhin, ama nunnak hei ngaisung ngawl cu ven!
18 Mahnaven tuni in noh ten a innkua cimittik uh ci. A capa sawm salih cu ni khat sungin suang pa khat humah that uh ci. Mah hum pen a salnu tuah a hin haw mi a capa Abimelek saw cu na unaupih uh a hihnak thong hangin, Shekhem kumpi bawi in bawl uh ci.
19 Pha hi, tuni Gideon le a innkua tei hum a, na bawl uhmi hi lungmu takin le lung thiangno in, na bawl uh ahi tale Abimelek humah na lung uh kim poh un. Amah Abimelek hei na hum uhah lungdam tahen.
20 Mahnaven, mah tin ahimata, Abimelek in mei tultik henna, Shekhem le Bethmillo mihingte cu kangtum khawng haw tahen. Shekhem le Bethmillo tei lak hei pen meitul henna, Abimelek cu kangtum zal tahen,” tin au leilui haw hi.
21 Mahnung ten Jotham cu tai vawkta hi. A unau Abimelek a lau hangin Beer ah um hi.
22 Abimelek in Israel cu kum thum sung uk hi.
23 Pathian in Shekhem khua mi le Abimelek huadun tukin lungmu aiki dunnak pia in, khua sung mi le Abimelek cu ngaldun haw hi.
24 Hi bang a hihnak cu Gideon i capa sawm salih thattu Abimelek humah le mithat tukin Abimelek a sosuahtu Shekhem khua sungmi tei humah phu la tukin Pathian i bawlmi hi.
25 Abimelek pang tukin Shekhem khua miten mualhumah mi hah haw hi. A hahmi haw ten mah lampi a zuitu hempoh cu a na lonsak haw in Abimelek vangin mah thu cu thei hi.
26 Ebed i capa Gaal cu a unaute tuah Shekhem khua ah heng haw in, Shekhem khuasungmi ten Gaal cu muangzet haw hi.
27 Mah hangin a lo hawah hawh haw in, a sabit ngah thawi in, sabittui tuah puai bawl bengbung haw hi. A pathian biakinn hawah hawhin, a in, a eih nung haw ten Abimelek cu awn kha tuah tam haw hi.
28 Gaal in, “Ita Abimelek i na a deh lih uh? Shekhem khua mite cu i hi cuang peng haw kaw? Amah cu i mihing kaw? Gideon i capa hi poh ma maw? Ama thuno in, a nungmi cu Zebul bek poh ma maw? Ita Abimelek i na cu a deh lih uh? Na cikhaihtu uh Hamor i mihing tei na dek saw nung.
29 Aw, hi miphun tei hotu hi nuam veng aw! Abimelek lakah, ‘Na ngalkap uhte tuah tul unna, tawngdun pah nung,’ ti tung a, Abimelek cu a thakiam tuk poh ven,” ti hi.
30 Gaal i awn cu Shekhem khua uktu Zebul in, a zak ten a thinukzet hi.
31 Arumah a, Abimelek lakah mi hahin, “Ebed i capa Gaal le a unau cu Shekhem ah hung haw in, khuasung mite nangmah langpang tukin so li haw hi.
32 Atu-in ngalkap tuah a zan a zanin thok unna, hampa lak pen pang un.
33 Zingten nisuak bek le tho unna, upmawh ngawlpi in Shekhem khua cu nam un, Gaal le a ngalkap ten a do haw tale nase zetin do un,” tin cah hi.
34 Mah hangin Abimelek le a ngalkap cu a zan, a zanin thok haw a, hon li in Shekhem khua elkimah ngelh haw hi.
35 Gaal cu khuasung pen hawhin, khuadai ah ding hi. Abimelek le a ngalkap cu a ngelhnak haw pen tul haw hi.
36 Abimelek le a ngalkap cu Gaal in, amuh ten Zebul lakah, “Zo in, mualhum pen hung li khi,” ti hi.
Zebul in, “Hi khi cu mualhum a muallimte hi, mihing na sak thong hang,” ti hi.
37 Gaal in, “Zo hemin, mual kawn pen hung li khi, a hek cu Pol sasua kung tihmi lampi pen hung li haw,” tin ti leleu hi.
38 Zebul in Gaal lakah, “Tuangkhawng li vecin, itin kaw? Ita Abimelek na cu dekli tuk kam hung titu cu nangmah hi ci. Hite cu nuihsuak bawlnakin, na manlihte haw poh si. Hawh inna, do vele!” tin ti hi.
39 Gaal in Shekhem khuasung mite cu pui in Abimelek cu do haw hi.
40 Abimelek in nehin, Gaal cu taivawk hi. A ngalkapte tampi thi haw in, a khuadai haw tian a luang haw cu lum teptup haw hi.
41 Abimelek cu Arumah ah kikleh hi; Gaal le a unau cu Shekhem khua ah um thei tuk ngawlin Zebul in hawlvawk hi.
42 A zingten Shekhem khuasung mite cu hampa lakah hawh haw in, mah thu cu Abimelek in mu hi.
43 Abimelek in, a ngalkap sam khawng a, mun thumin, a khen nungten hampa lak pen pang haw hi. Khuasung pen a tul haw cu Abimelek in mu in, a pannak haw pen tulin do hi.
44 Abimelek le a ho mi ngalkap hon khat cu manlang zetin mai ah not haw a, khuapi tumnak kongka lam pen tang haw hi. Adang ngalkap hon nih ten a ngal haw cu do tawtok haw in, hampa lak pen that khawng haw hi.
45 Abimelek in khuasung mite cu sun thalengin do hi. Mah khua cu la in khuasung mite that khawng hi. A khuapi haw siatsuah khawngin, a leibup cu ci in khuh khawng hi.
46 Shekhem khua ngalvilnak inn sangpi sung a ummi khuasung upa ten a zak haw ten Baalberith pathian biakinn kulhpi sungah ngelh haw hi.
47 Shekhem khuasung upate ngelh haw tih thu Abimelek lakah hilh haw hi.
48 Mah hangin a ngalkap tuah Zalmon mualhumah kai haw hi. Heipi la in thingkang a talh nungten a ko tuah pua hi. A ngalkapte vang amah bangin bawl tukin thupia hi.
49 Mah hangin thingkang cu cawm tek haw in, Abimelek zui in kulhtian inn mawkah seh haw hi. Mei tuah haal haw in, Shekhem kulhtian inn a ummi hempoh thi khawng haw hi. A thi mite cu numei, pano a venghawngin thawng khat bang kim haw hi.
50 Mah nungten Abimelek cu Thebez khua ah hawhin, a kip khawng nungten mah khua cu la hi.
51 A khuasung hawah a khoh zetmi ngalvilnak tausang umin, a sungah numei hihen, pano hihen a hotu tianin ngelh khawng haw hi. A sunglam pen kongkalhin, innkuul humlamah kai haw hi.
52 Abimelek in mah tausang cu do hi. Mei tuah haal tukin kongka lam nek hi.
53 Mah laih takin numei pa khatin humlam pen cangngawinak suangpeekpi tuah a lu sepkeh hi.Ref 9:53 2Sam11:21;
54 Abimelek in, a hiamnam cawitu tangvalpa cu manlang zetin samin, “Na ngalnam dawk inna, keimah thatin hi. Numei khutin thi hi, tin, a son haw tuk nuam mang,” ti hi. Mah hangin tangvalpa in Abimelek cu namin dawthum hi.
55 Israel ngalkap ten Abimelek thih amuh haw ten a inn ten hawah pin khawng haw hi.
56 Mahti bangin a unau sawm salihte thatin, a pa i humah sualnak a bawlmi hangin Pathian in Abimelek cu lulleh hi.
57 Mahtibang lengin, a nunsualnak haw hangin Shekhem khua mite vang Pathian in lulleh bok hi. Gideon i capa Jotham in, a tamsiat bangin a hum hawah kim khawng hi.