6
Gideon
1 Topa i mai ah Israel mite cu a sual lelem haw hangin Midian mitei khut sungah Topa in kum salih sung umtik hi.
2 Midian mi in Israel mi cu a neh dikdek haw hangin, Israel mi cu mualhum suanghol, leikua le himnak mun hempoh ah ngelh haw hi.
3 Israel mi in lo a ngih haw ten Midian mi, Amalek mi, le phillawn miphun hungin do mek haw hi.
4 Israel ngam sungah ngiahbuk samin, a an po hempoh haw cu hanglam ummi Gaza khua el tian siatsuah khawng mek haw hi. Israel tei pumcawmnak tukin tuu, khui le laak pa khat hei khawih ngawlin lonsak khawng mek haw hi.
5 Mihing bek hi ngawlin a nganhing le a puanbuk tuah thawn haw in, a tam dan haw cu khaau hon zatnote 6:5 Khaau hon zah tih ten, mah hun laihin khaau cu ahon honin tul haw a, ankungte vang eih sak khawng thei haw hi. A len haw ten ni lim tham haw hi. haw hi. Amuh le a kalauk cu sialcelh haw ma. Israel ngam cu siatsuah ngangai haw hi.
6 Israel miten bawl theih imah nei ngawlin, phe hei phe zo haw ma hi.
7 Midian miten a bawlsiat haw hangin Israel miten Topa cu sam haw a,
8 Topa in, a lak hawah profet pa khat hah hi. Mah profet in Israel i Topa Pathian thu cu a lak hawah hi ti bangin hilh hi, “Sal na tannak uh Izipt ngam pen keimah in suah ing.
9 Izipt mite le nangmuh a dotu tei khutsung pepan ing. Na mai uh pen na ngal uhte cu hawlvawkin, a ngam haw nangmuh pia ing.
10 Keimah cu Topa na Pathian uh ing hi, a ngamsung a, na umnak uh pen Amor mitei pathian cu bia pahsuh un, tin ciang zetin hilh zo ing. Mahnaven ka thu ngai ma uh ci,” ti hi.
11 Topa i vancungmi hungin Abiezer hinnam Joash i khua Ofrah a tih haw mi khua el a, sasua kung nuai ah khung hi. Joash i capa Gideon cu Midian tei muh tuk a lau hangin ngelh a, sabittui suknak sungah sangvut cil li hi.
12 Topa i vancungmi cu a lakah langin, “Nangmah cu mi ngalpha hi ci, Topa na lakah um,” ti hi.
13 Gideon in vancungmi lakah, “ Topa thu pa khat dong tung. Topa Pathian cu keimuh tuah a um ngangai tale ita hiti bang nate ka hum uhah heng him? Izipt ngam pen Topa in suahin, tin ka pu le pa tei hilhmi Pathian i nalamdang a bawl mite atu ilai ah um khawng haw kaw? Topa in kohte cu nunghek zo hi. Midian mitei khutsungah kohte cu vawkthongta,” ti hi.
14 Topa in “Hawh inna, na ngilnak hempoh suahin, Israel mite cu Midian tei khutsung pen suakcatikin hi. Keimah in tik ing hi,” tin thupia hi.
15 Gideon in, “Mahnaven, Topa iti bangin Israel mite cu suakcatik thei tung kaw? Manasseh hinnam sung pen kohte cu a nawmtambel ung hi. Ka hinnam sung uh hei pen kei cu ca-ngah nautabel ing hi” tin ti hi.
16 Topa in, “Keimah in ka umpih hangin bawl thei tuk ci. Midian cu mihing pa khat neh bangin, baihno in neh khawng tuk ci,” ti hi.
17 Gideon in, “Na mai pha ka co ahi tale ka lak a, awntu hi nangmah tatak ci tih ciangtik tukin thil pa kha khat ka lakah langtikin hi.
18 Hehpihnakin, na lakah piak tuk laksawng ka ken laklawh, hi mun pen hawhsan zal pahsun tin ngen hi.”
Vancungmi in, “Na kihleh laklawh um tuk poh ing,” ti hi.
19 Mah hangin Gideon cu hawhin, keelno cik huanin, bawm sung a cangho vam vawh khat cu naman tel ngawl cangho bawl hi. A huanmi keelcik cu a bawm sungah koihin, beel tuah tuihang kengin, sasua kung nuai a, Topa i vancungmi lakah hawhpihin pia hi.
20 Vancungmi in, “Cik le cangho cu hi suang humah koih inna, na kenmi tuihang cu a humah leihin,” ti hi. A thupiaknak bangin Gideon in bawl khawng hi.
21 Topa vancungmi in, a khut suahtulin, a khut i cawimi thingkang lek tuah cik le cangho cu tok hi. Mahbek ten suang pen mei alh tulin cik le cangho cu kang khawng hi. Vancungmi cu langleh ma toh hi.
22 Gideon in, Topa i vancungmi ngangai hi tih a theih ten, “Aw hoi! Cungnungbel Topa Pathian vancungmi maicang mu ing,” tin can thahin ti hi.
23 Mahnaven Topa in, “Na thinsu pahsun, lungmuang zetin umin hi. Thi tukma ci,” tin Gideon cu ti hi.
24 Topa i lakah Gideon in biaklan dawhin, “ Topa cu lemdaihnak hi,” tin minsa hi. (Biaklandawh mi cu Abiezer hinnam tei khua Ofrah ah tusun tian umlaih hi.)
25 Mah zanin, Topa in Gideon cu, “Na pa i khuicang le a dang khuicang kum salih mi la in, Baal biaknak tukin dawhmi na pa i biaklandawh cu phia inna, a el a phutmi thing tuah bawlmi milim Asherah cu phukin hi.
26 hi mualkulah Topa na Pathian ca tukin khohzet le pha zetin biaklan dawhin hi. Khuicang pa nih cu ngo inna, a humah meihal biakpiaknak bawlin; a halnak tukin na phuhmi milim Asherah thing cu mangin,” ti hi.
27 Gideon in umlawh sawm pui in Topa i hilh bangin bawl khawng hi. A unau sangngam le khuasung mitei muh tuk a lau hangin sunah bawl ngawlin zanah bawl hi.
28 A zing, zingtungno in khuasung mite tho haw a, Baal biaknak tuk biaklandawh le milim Asherah phelet khawngin mu haw hi. Mah hum pen mahlai a dawhmi biaklandawh humah khuicang meihal mi vang mu bok haw hi.
29 “Akua kaw hi ti bangin a bawl?” tin pa khat le pa khat dongdun haw hi. A thu la dongkan pepel haw in, a nungdawlbel ten Joash i capa Gideon in bawl hi tih thei haw hi.
30 Joash lakah khuasungmi ten, “Na capa cu hilai ah suahtul inna, that tuk ung, Baal biaklandawh pheletin, a el a, milim Asherah phuk hi,” tin ti haw hi.
31 Mahnaven a lak a, zuantu mipi tei lakah Joash in, “Baal lam dingin maw na ot uh? Baal pan tuk uh cim? Baal a pantu hempoh cu zingtungno in thah khawng hi tuk uh ci. Baal cu pathian ngangai ahi tale, a biaklandawh a phiatlet haw hangin amahno pandun hen,” ti hi.
32 Mah pepan Gideon cu Jerubbaal tin ti haw hi, itahim titale Joash in, “Baal cu amah le mah pandun hen; ama biaklandawh poh si a phiat haw,” a tih hangin hi.
33 Midian mi, Amalek mi le phillawn mi hempoh khawmdun haw in, Jordan ngun a kaltan ceng haw ten Jezreel munlawnah ngiak haw hi.
34 Topa i hawvang cu Gideon humah nase zetin heng hi. Tuucangki pengkul tumin, Abiezer hinnam cu amah zui tukin sam hi.
35 Manasseh hinnam tei ngamsung hempoh ah mi hahin, amah zui tukin sam khawng hi. Asher hinnam, Zebulun hinnam le Naftali hinnam tei lak hei ah mi hahin, amah zui tukin zuan susuih haw hi.
36 Gideon in Pathian nelah, “Israel pantu tukin nangmah mang nuam ing hi, ti hi.
37 Pha hei, na mang nuam ngangai tale sangvut ka cilnak munah tuumul koih ing. Zingten tuumul hum bebekah daita umin, a nuai leiko in, a um tale Israel mi pan tukin mang nuam ngangai ci tih thei tung hi,” ti ci.
38 A tih bangin cang ngangai hi. A zing zingtungno in Gideon cu tho in tuumul cu a suuk ten daita kuang khat suuk hi.
39 Gideon in Pathian nelah, “ Topa na thinuk zal pahsun. Vei khatno in, na lakah awn hih nuam ing. Hehpihnakin tuumul tuah aisannak bawl hih tung. Tu tum cu tuumul saw hulin, leihumah daita saw hen,” ti hi.
40 Mah zanin, a tih bangin Topa in bawl khawng hi. Tuumul bek hulin, a nuai a lei cu daita in kawt khawng hi.