5
Deborah le Barak i La
1 Mah sunin Deborah le Abinoam i capa Barak ten hi la sa haw hi.
2 Topa cu thangphat un!
Israel hotu nase zetin
panmun la haw a,
Israel miten thatho zetin
ngal a do haw hangin
Topa cu thangphat un.
3 Maw kumpi ngai hem un!
Maw uktu mengden hem un!
Topa lakah tumnging tumin,
Topa, Israel i Pathian nelah
lasa tung hi.
4 Topa aw, Seir mual pen tulin,
Edom ngam na hawh ten
leipi hing dudumin,
van pen nguahzu hi;
Hi zuh hi, meingo pen tui cak hi.
5 Sinai Mual a Topa i mai ah
mualte hing hi.
Topa, Israel mi Pathian mai ah,Ref 5:5 Suah 19:18;
6 Anath i capa Shamgar khan le
Jael i khansungah,
khualzinnak lampite khing diudeu hi.
khual a zin ten
lamneu zui haw hi.
7 Israel khuapi khing
diudeu khawng hi.
Khaw-ngaih huai in
dai diudeu thongta.
Israel i nu, Deborah
na hen laih ngawlin hi.
8 Israel in pathian thak
a ten haw ten,
a do tuk ngal a khua kongka ah
heng haw hi.
Israel mi thawng sawm li lakah,
lumphaw le ceipi cawitu
pa khat bek um haw a maw?
9 Ka lungmu cu
Israel ngalbawi tei lakah
cam leleng hi.
Lungtho zetin ngal a dotu
Israel tei lakah, Topa cu
thangphatin um hen.
10 Hi thu cu hilh ten un.
Laak ngo hum a khung mite,
Cipuh khunnak hum a khung mite le,
ke tuah a hawhtute hei in
hilh ten un.
11 Ngai un! Tuikhuk elah
khawmin, a au thawm haw cu,
Topa i nehnak
Israel miphun i nehnak cu
Topa i mihingte cu
a khua haw pen hawh haw hi.
12 Tho in, Deborah, tho inna,
pui in hi!
Tho in, lasa thahin pui in hi.
Abinoam capa Barak,
na mat mite pui in hi!
13 Israel mite cu a hotu lakah
hung haw hi.
Topa i mihing ten
ngaldo tukin hung haw hi.
14 Efraim pen hungin
munlawn heng haw hi.
Benjamin hinnam ten
zui haw hi.
Machir pen ngalbawi heng,
Zebulun pen bawite
hung haw hi.
15 Issakhar hotu le Deborah tuah
hung haw hi.
Hi zuh hi, Issakhar vang hung a,
Barak tuah munlawn ngamah
zuidun haw naven,
Reuben hinnamte cu
khendun haw.
Hawh bok tukin thusoncat
thei haw ma hi.
16 Ita tuucingte i nunglamah
ding leleng haw him?
A tuu haw samnak aw
ngai tukin maw?
Hi zuh hi, Reuben hinnamte cu
khenkhekdun haw hi.
Telbok tukin khencat
thei haw ma.
17 Gad hinnam, Jordan khatlam ngalah
um haw hi.
Dan hinnam cu ngan tatnak
ngamah um haw hi.
Asher hinnam cu Tuipi mawkah
um haw hi.
Tuimawkah umthong
leleng haw hi.
18 Mahnaven Zebulun le
Naftali hinnam cu
ngal le sa lakah nunnak
pia ngam haw hi.
19 Kumpi hungin ngaldo haw hi,
Megiddo tui el Taanach khua ah:
Kanaan kumpi ten
do bok haw hi.
Mahnaven sumpai lonmi
nei haw ma.
20 Van aksi hei in
van a hawhnak haw pen.
Sisera cu do bok haw hi.
21 Kishon ngun tuilunin
tai khawng hi.
Kumkhua luangmi Kishon in,
ngil sesem tukin mai ah
not tung.
22 Cipuh cu tai duaduamin,
a ke tin haw in lei vat haw hi.
23 “Meroz cu thusia piak hi tahen.
Khuasung mi humah
thusia um tahen,
itahim titale Topa bawm tukin
tul haw ma hi.
Topa i ngaldo haw ma,” tin
Topa i vancungmi in ti hi.
24 Jael cu numei lak pen
a bawngphabel hi;
Ken mi, Heber i zi cu
puanbuk a um numei lak pen
Jael cu mi sunglawibel hi.
25 Sisera in tui ngenin khuinawi pia hi,
kuang manpha tuah
khuinawi lap pia hi.
26 A veilam khutin puanbuk
khetnak ngolhzum cawi in,
a taklam khutin,
nadektu i sobul cawi hi.
Sisera cu sepin, a lu keh hi.
A lu cu paih letin sun hi.
27 Sisera cu hoi lawluai in,
lum hi, Jael i ke bulah lum hi.
A kebulah hoi in lum hi,
28 Sisera i nu in tukvelh neuno pen
khua cuan hi.
Pang awng pen khua zo kaw kawi hi.
“Ita a cipuhleng heng
ma laih heng?”
“Ita a cipuh khuanu haw heng?”
tin ti hi.
29 A numei lak pen a cipbel ten
don haw, a hilhmi cu
amah in hilhkik pepel hi.
30 “A lon haw mi sum le pai sem haw,
ngalkap pa khat ca tukin
khanglai pa khat maw, pa nih maw,
Sisera ca tukin puancoih manpha,
Kumpi nui ngawng-awh tukin
puancoih mantam,” ti haw hi.
31 Mah hangin, Maw Topa na ngal cu
lalthong haw tahen.
Mahnaven nangmah a ittu cu,
Zinglam a tulmi ni bangin,
vak haw tahen.
Mah ngam sungah
lemdaihnak kum sawm li um hi.