4
Deborah le Barak
1 Ehud a thih nungten, Israel mite cu Topa i mai ah sual lehleu haw hi.
2 Mah hangin Topa in Hazar khuapi a ummi Kanaan kumpipa Jabin cu Israel mite nehtik hi. Kumpi Jabin i ngalkap hotubel cu Gentail tei khuapi Harosheth a um Sisera hi.
3 Jabin in thik cipuhleng za kua nei in, Israel mite cu hehpihnak nei ngawlin kum sawm nih sung bawlsia hi. Israel mite cu Topa i lakah auto lehleu haw hi.
4 Mahlai in Israel tei thukhen saktu cu Lappidoth i zi, numei profet Deborah hi.
5 Efraim i mualhum ngam Ramah le Bethel laklawhah tuumkung pa khat um hi. Mah tuumkung nuai ah Deborah cu khung mekin, Israel tei thu cu a khensak hangin, Israel miten mah munah zuanmek haw hi.
6 Ni khat cu Deborah in mi hahin, Naftali ngam Kedesh khuapi a ummi Abinoam i capa Barak samtikin, a lakah, “ Topa Israel Pathian in, nangmah thupia hi, “Hawh inna, na mihingte cu Tabor mualah pui in, Naftali le Zebulun hinnam tei sung pen ngalkap thawng sawm la in, ti hi ma maw?
7 Nangmah do tukin Jabin ngalkap tei hotu Sisera cu Kishon Ngunah hunpih tung. Cipuhleng le ngalkapte tuah hung tuk naven, a humah nehnak cu pia tung hi,” ti hi, tin hilh hi.
8 Barak in, “Ka lakah na hawh ahi tale na hilh bangin hawh tung, na hawh ma tale hawh bok tuk mang,” tin Deborah cu don hi.
9 Deborah in, “Pha hei, nangmah tuah hawh tung, mahnaven ngal a neh uhten minthannak ngah tukma ci, itahim titale Topa in Sisera cu numei khut sungah pia tuk,” ti hi. Deborah cu Kedesh ah Barak tuah hawh haw hi.
10 Zebulun le Naftali mitei sung pen Barak in ngalkap thawng sawm la in Kedesh ah hawhpih hi. Deborah vang amuh tuah hawh bok hi.
11 Mah laihin, Ken mi pa Heber in, Kedesh el Zanannim a ummi Sasua kung elah puanbuk sa hi. Beber cu Moses i makpa Hobab i casuan Ken minam tei lak pen thawnin, Kedesh elah heng hi.
12 Sisera lakah, Abinoam i capa Barak cu Tabor mualah heng zo hi tin, a hilh haw ten,
13 a thik cipuhleng za kua le a ngalkap hempoh samkhawmin, Gentail khuapi Harosheth pen Kishon ngun tian hawh haw hi.
14 Deborah in Barak lakah, “Hawhin hi; tuni hi Topa in Sisera na khut sungah a hentik ni hi. Topa in nangmah lamhuai,” ti hi. Mah hangin Barak cu a ngalkap thawng sawm tuah Tabor Mual pen hawh hi.
15 Barak le a ngalkap ten nam haw a, Sisera i cipuhleng le a ngalkap cu Topa in buaitik khawng hi. Sisera cu a cipuhleng hum pen manlang zetin tolhin, a ke tuah tai hi.
16 Barak in Sisera i cipuhleng le ngalkapte cu Gentail khuapi Harosheth tian hilngutin, ngalkap pa khat hei khawih ngawlin that khawng hi.
17 Sisera cu tai ngutin, Ken mi, Heber zi Jael i buk lamah zuan hi: itahim titale Hazor kumpipa Jabin le Heber innkua cu lemdunzet haw hi.
18 Jael cu Sisera muak tuk hawhin, a lakah, “Hung tumin, ka bawipa, ka buk sungah tumin; imah lau tuk umma,” ti hi. Mah hangin Sisera cu hawhin, Jael in puanbuk zak limah sel hi.
19 Sisera in, “Ka dangdum tui pia in,” tin kun hi. Jael in saphaw tuithawl hongin, khuinawi la in, pia; a in khawng ceng ten selleh hi.
20 Sisera in, “Buk kongka ah dingin, na mi pa kha khat hungin, buk sungah akua bek um haw maw, tin, a dong tale, um haw ma tin donin,” ti hi.
21 Sisera cu a cawl leita hangin a hihbuh cizet hi. Jael in sobul le puanbuk khetnak ngolhzum cawi thahin, ti dedenno in, a beng pen lei khong tian a khetcih ten Sisera cu thi hi.
22 Barak cu Sisera zei in, a hun ten Jael in muakin, a lakah, “Hi laiah hung inna, na zei lihmi pa cu lak nang,” ti hi. Barak in Jael cu zui in, a lu ah ngolhzum mungcih lengin, leihumah Sisera thi cu mu hi.
23 Mah sunin Israel tei ca in Topa in Kanaan kumpi Jabin cu neh hi.
24 Israel miten kumpi Jabin cu nawk dedeuh haw a, nungdawlbel ten siatsuah haw hi.