3
A Tangmi Miphun Dangte
1 Kanaan ngamsung a ngal a do laih ngawlmi Israel khingkhainak tukin hi ngam sungah Topa in minam dang demno tangtik hi.
2 Israel mi khenkhat tei ngaldo hi iti bang him tih a theih awng laih ngawl ten ngaldo a zilnak haw tukin le a theihnak haw tukin a tantik himmi hi.
3 Kanaan ngam sungah a tangmite cu Filistin khuapi pa nga, a venghawngin, Kanaan mi, Sidon mi le Baal Hermon Mual pen Hamath mualkawn tian, Lebanon Mual a um Hiv mite hi.
4 Topa in, a pu le pa tei lakah Moses mangin, a thupiakmi Israel miten zui haw maw, zui haw ma him tih theihciannak tukin mah minam dangte cu umtik hi.
5 Mah hangin Israel miten Kanaan mi, Hit mi, Periz mi, Hiv mi le Jebus mitei lakah ummun khualin um haw hi.
6 Huaidun, ladunin, a pathian vang bia bok haw hi.
Othniel
7 Israel miten Topa a Pathian haw cu phawkngil haw hi. Topa i deih ngawlmi bawl haw a, sualin Baal pathian le Asherah pathian bia haw hi.
8 Mah hangin Topa cu Israel tei humah thinukin, Mesopotamia kumpi Kushan Rishathaim cu nehtik hi. Israel miten Mesopotamia kumpi cu kum liat sung a na dehsak haw hi.
9 Israel mite cu Topa i lakah a au haw ten Topa in amuh suakcatik tukin mi pa khat hah hi. Mahmi pa cu Kenazi capa Othniel hi.
10 Othniel cu Topa i hawvangin umpihin, Israel tei hotu in suak hi. Othniel cu ngaldo in, Mesopotamia kumpipa i humah nehnak Topa in pia hi.
11 Israel ngam cu kum sawm li sung ngaldai hi. Kenazi capa Othniel cu thi hi.
Ehud
12 Israel mite cu Topa i ngaihmawh zawngin sual leleu haw hi. Itahim titale Moab kumpi Eglon cu Topa in Israel sangin ngil sawtik hi.
13 Eglon in Amon mi le Amalek mite zawm a, Israel miten nehin, Ung kung khuapi a tih haw mi Jerikho khua la haw hi.
14 Israel miten Moab kumpi Eglon i na cu kum sawm le kum liat sung dehsak haw hi.
15 Israel mite cu Topa i lakah auto leleu haw in, amuh suakcatik tukin mi pa khat hah leleu hi. Amah cu Benjamin hinnam sung pen Gero ih capa veilam mangpa Ehud hi. Israel miten a siah piak haw tuah Ehud cu Moab kumpi Eglon lakah hah haw hi.
16 Ehud in, a lang nih hiammi ngalnam pa khat, dong khat sau, ama tatuk bawlin, a taklam angki cep sungah kencih hi.
17 a siah piak haw mi cu Ehud in Eglon pia hi. Eglon cu thau pehpuh hi.
18 Ehud in, a piak ceng ten siah pua tute cu pintik hi.
19 Mahnaven amah cu Gilgal suangphut pen kiklehin, “Kumpipa aw, thukuh pa khat hilh tuk nei ing.”
“Nangma ca in Pathian lak pen thu pa khat puak ing,” ti hi. Kumpipa in, a sal tei lakah, “Midang cu tul khawng un,” tin thupia hi. A tih bangin tul khawng haw hi.
20 Kumpipa cu mah ti bangin amah bek a inn hum a dap zetmi colhnak khanah a umlaihin, Ehud cu a lakah hawhin, “Nangma ca in Pathian lak pen thu pa khat puak ing,” ti hi. Kumpipa cu ding hi.
21 A din laihtakin Ehud cu a taklam a, a selmi nam cu a veilam khut tuah dokin, kumpipa i thinah sun hi.
22 A nam cu tum khawng hi, a kung tian tumin, a langlamah paihlet vawk hi. Ehud in, a dawh kikleh theih ngawl ten a nam cu a thau in khuh khawng hi.
23 Ehud cu pualeu lamah tulin kongkhah a kalh ceng ten zamsan hi.
24 Kumpipa i umlawh hungin, kongkhah kalh khawng amuh haw ten, kumpipa inn sungah awnghawh laih tuk, tin ngaisung haw hi.
25 Ngeipi ngak haw naven kongka cu a hot cuang ngawl hangin tawhcang la in hong haw hi. A bawipa haw cu suat humah thi lengin mu haw hi.
26 A umlawh ten a bawipa haw a ngah haw sungin, Ehud cu tai in Khermi suangphut kalvawkin Seirah ah tai hi.
27 Seirah a hen ten Israel miten ngal tho tukin Efraim mualhum ngamah tuucangki tum haw hi. Mah mual pen amah loli in lamhuai hi.
28 “Keimah zui un, Topa Pathian in, na ngal uh Moab mitei humah nehnak pia zo,” ti hi. Israel miten zui tawtok haw in, Moab mite Jordan ngun a tan haw tuk ten man khawng haw hi. Pa khatno hei Jordan ngun tan mantik haw ma hi.
29 Mah ni-in, a ngil zetmi Moab ngalkap thawng sawm that haw hi. Kuamah suakca haw ma.
30 Mah ni-in Israel miten Moab mite neh haw hi. Israel ngamah kum sawm liat sung lemdaihnak um hi.
Shamgar
31 Ehud ceng ten a hotu haw Anath capa Shamgar hi. Shamgar in Filistin mi za luk cu khuivahnak ngolhkang hiam tuah vat hum khawng hi. Amah vang Israel mi pansuaktu hi.