2
Bokhim Ah Topa i Vancungmi
1 Topa i vancungmi cu Gilgal pen Bokhim a, Israel tei lakah, “Izipt ngam pen suakcatikin, na pu le pa tei lak a ka tepsami ngamah henpih ing. Na lak uh a, ka thutepmi cu siatsuah tuk mang.
2 Nohte hei in hi ngam a um miphun dangte tuah thutiam bawl pahsuh unna, a biaklandawh cu siatsuah saw un, tin ka tih zo toh khi! Mahnaven ka tih bangin bawl ma uh ci. Na bawl saw uhmi hi zo hem un!Ref 2:2 Suah 34:12-13; Daan 7:2-5;
3 Mah hangin ciangno in hilh ing; mai na nawt uhten hi mihingte cu hawlvawk tuk mang. Na ngal uh hi haw tuk a, nangmu ca in, a pathiante cu a awktu thang hi haw tuk tin,” ti hi.
4 Topa i vancungmi in Israel mi hempoh humah hithu a hilh ten kap leilui haw hi.
5 Mah hangin mah mun cu Bokhim note 2:5 Bokhim tih cu Hebru awnin, a kaptute tihnak hi. tin sam haw hi. Topa i lakah mahlai pen biakpiaknak bawl haw hi.
Joshua i Thihnak
(Josh 24:29-33)
6 Joshua in Israel mite cu pintikin, amu co mi ngam tekah pin haw hi.
7 Joshua a nun sung hempoh Israel miten Topa cu bia in, a thih nung hei ten Israel tei ca in Topa i na bawlmi hempoh a theitu upa tei nun sung vangin Topa cu bia leleng haw hi.
8 Nun i capa Joshua, Topa i salpa cu kum za le kum sawm a kim ten thi hi.
9 Amah cu Gaash mual pen saklam, Efraim mualhum ngam a ummi ama ngamsung, Timnath Serah ah vui haw hi.Ref 2:9 Josh 19:49-50;
10 mah khan a Israel mite vang thi haw in, mah nung a suakmi khangthak ten Topa hihen, Topa in Israel tei ca in, a bawlmi hempoh vang thei haw hi.
Israel In Topa Nunghek
11 Topa i mai ah Israel mite sual haw in, Baal pathian bia saw haw hi.
12 Izipt ngam pen amuhte a puitultu a pu le pa tei Pathian Topa cu nunghek haw hi. Amu elkim a ummi pathian dang bia haw hi. Mah pathian tei mai ah a kun haw hangin Topa cu a thinuktik haw hi.
13 Topa cu zamsanin, Baal pathian le Astartes pathiante saw bia haw hi.
14 Mah hangin Israel tei humah Topa a thinuk zetin damiah le nguca tei ngukmi le suammi in suaktik hi. A elkim a ngal haw ten not pepel haw a, Israel mite cu amuh le muh hei hupdun thei haw ma toh hi.
15 Israel miten ngaldo tuk a hawh sial haw ten Topa in, a hilhhamsa bangin nung hek hi. Mah hangin Israel mite cu vancaukapin um haw hi.
16 Topa in, mi na sut thei tei khutsung pen him theihnak tukin Israel tei lakah thukhentute pia hi.
17 Mahnaven hi thukhentu tei thu vang ngai leleng haw ma hi. Topa i ca in, numei suaksual bang hi haw a, pathian dang bia haw hi. A pu le pa ten Topa i thupiakmi zui haw naven, hi khangthak mihing ten zui haw ma hi.
18 A mu ca in hotu a piakmi tei nunsung cu Topa in umpihin, a ngal tei khutsung pen luattik leleng hi. Itahim titale a ngal tei bawlsiatnak hangin a kah haw Topa in, a zak ten hehpih hi.
19 Mahnaven a hotu pa i thih bek ten Israel mite cu a nuncan lun haw lengah kiklehin, masa laih sangin sia saw haw hi. Adang pathian zui in, a mai ah kunin bia haw hi. Mahti bangin a nuncan sia haw cu vawkphal ngawlin zui lo haw hi.
20 Topa cu Israel tei humah thinuk zetin, “A zui hihim haw tukin a pu le pa tei lak a, ka tepmi thutepnak cu hi miphun ten siatsuah khawng zo haw hi. Mahti bangin ka thu a zui haw ngawl hangin
21 Joshua a thih tuk ten a zammi miphun dangte cu hawlvawk tuk mang.
22 A pu le pa ten ka thu a zui haw bangin zui haw tuk maw, zui haw tukma him tih Israel mite zohnakin hi miphun dangte cu mang tung,” ti hi.
23 Mah hangin Topa in hi miphun dangte cu Joshua khut sungah pia ma hi, manlang hei in hawlvawk ngawlin mahlai munah umtik hi.