20
Israel Ten Benjamin Mite Do Haw
1 Israel miphun, saklam Dan pen hanglam Beersheba tian le nisuahnak lam Gilead ngun tian, a venghawng tul haw a, lungmu munkhatno in, Topa i mai Mizpah ah tawkdun khawm haw hi.
2 Hi bangin Pathian mihing a khawmmi lakah Israel miphun tei hotu kimno in tel haw hi. Ke ngalkap bebek thawng za li haw hi.
3 Israel miphun hempoh Mizpah ah hawh khawng haw tih Benjamin ten za haw hi.
Israel miten, “Na zineu a thahnak haw thu hilh hemin,” tin Levi mi pa cu dong haw hi.
4 Levi mi pa in, “Ka zineu le keimah cu Benjamin ngamsung Gibeah khua ah zancam tukin hawh ung.
5 Gibeah mite hung haw a, keimah thah tumin ka camnak inn cu zanin kim khawng haw a, Ka zineu saw sualpih haw in thi hi.
6 a luang cu pua in, ka lemcelh ten Israel ngam khua hempoh ah kuat ing. Hi khua miten thilpha ngawl le ningdelhhuai a hum uhah bawl haw hi.
7 Hi mun a hengmi Israel mi nguakcang hung hi. Iti bangin bawl ahin pha tuk hi, tin ngaisung uh cim?” tin ti hi.
8 Mipi venghawng cu munkhatah ding haw in, “Kuamah innah pin tukma hung. Puanbuk sung a ummi ahi uh vang, inn ngangai sung a ummi ahi uh vangin pin tukma hung.
9 A bawl tuk uhmi cu hi tin hi tuk hi: Gibeah khua dotu tukin aisannak bawlin mi teng tuk hung.
10 Israel mihing khen sawm khenkhatin, a ngalkap tei ca tukin an pua nung hi. Adang hempohin Israel ngam sungah a mawi ngawlmi na a bawl haw hangin Gibeah mite bawlsia tuk hung,” tin ti haw hi.
11 Mah hangin Israel mi hempoh cu thu khat hualin Gibeah khuapi sim tukin khawm haw hi.
12 Israel miphun ten Benjamin miphun ngamsung khua hempoh ah mi hah haw a, “Itihzah thilpha ngawl kaw na bawl uh?
13 Gibeah khua sung a, mi huatsuakte ka lak uhah hawhpih un; thatin Israel ngam thiangtik tuk ung hi,” ti haw hi. Mahnaven Israel tei ot cu Benjamin miten imah sial haw ma.
14 Benjamin ngamsung a, khuapi hempoh pen mi tampi cu Israel do tukin Gibeah khua ah hung haw hi.
15 Mah ni bebekin, a khuapi pen ngalkap thawng sawm nih le thawng luk sam haw hi. Mah hum pen Gibeah khua mitei a ten tuam haw ngalkap za salih khawm haw hi.
16 Ngalkap hizah sung pen a ten tuam haw mi veilam mang mihing za salih cu a venghawng haw in muidin lamah samzang pa khat hei khelh ngawlin a kha thei mite haw hi.
17 Israel miten Benjamin mi sialngawl ngaldo thiam zetmi namsau cawi ngalkap thawng za li sam khawm haw hi.
Benjamin Minam Do Haw
18 Israel mite cu Bethel khua Pathian biaknak munah hawh haw in Pathian nelah, “A koi hinnamin kaw Benjamin hinnam do masabel tuk?” tin dong haw hi.
Topa in, “Judah hinnam ten do masa hen,” tin ti hi.
19 Mah hangin Israel mite cu a zingten tho in, Gibeah khua elah ngiak haw hi.
20 Benjamin do tukin thok haw a, ngalkapte cu Gibeah khua zawn pen panmun la haw hi.
21 Benjamin ngalkapte cu khuasung pen tul haw in, dodun haw a, mah ni-in Israel ngalkap thawng sawm nih le thawng nih that haw hi.
22-23 Israel mite cu Bethel ah hawhin, Topa i mai ah taklam tian thasia le khawngai in kap haw hi. Amuh ten, “Ka unaupih uh Benjamin do tukin hawh leleu ni ung maw?” tin Topa dong leleu haw hi.
Topa in, “Hawh unna, do leleu un,” ti hi.
Mah hangin Israel ngalkapte cu a tha haw tholehin masa a dodunnak mun leleng haw pen dodun haw hi.
24 Benjamin mi cu do tukin a vei nih hawhnak haw hi.
25 masa bang lengin, Benjamin ngalkap cu Gibeah khua sung pen tul haw in Israel ngalkap ngaldo thiamzette cu thawng sawm le thawng liat that leleu haw hi.
26 Israel mi hempoh Bethel ah hawhin, lungsia in kap leilui haw hi. Topa i mai ah ni taklam tian an hei ei ngawlin khung haw hi. Pawlkom biakpiaknak le halkang biakpiaknakte Topa i lakah pia haw hi.
27 Pathian Thutiam Kuang cu Bethel ah umin,
28 Eleazar i capa Finehas in thiampi dek hi. Eleazar cu Aaron i capa hi. Topa i lakah thudongleh haw in, “Ka unau uh Benjamin mite do tukin tholeh ni ung maw ahimata cawl tuk kam nung?” ti haw hi.
Topa in, “Do un zingten nehnak na humah pia tung,” ti hi.
29 Mah hangin Israel miten Gibeah elkim pen ngalkap khenkhat pangkuhtik haw hi.
30 a ni thumnakin Benjamin do tukin hawh haw naven masa bang lengin, a ngalkapte cu Gibeah khua mai ah panmun la haw hi.
31 Benjamin ngalkapte cu masa bang lengin, a khuasung haw pen tul haw a, Israel ngalkap khenkhatte Bethel lampi, Gibeah lampi pen that haw hi. A thah haw mi cu ngalkap sawm thum haw hi.
32 Benjamin ngalkap ten, “Masa bangin neh tuk hung ngei,” ti haw hi.
Mahnaven Israel miten, “Nunglamah kik pepel nung inna, Benjamin ngalkapte a khua haw tulsan khawng hih hawta henna, zinpi hi zui haw hen,” ti haw hi.
33 Mah hangin Israel ngalkap tam saw cu nunglamah kikin, Baaltamar ah khawmleh khawng haw hi. Gibeah khua elah a ngelh kuh ngalkap cu a ngelhnak haw pen tul haw hi.
34 Israel mi lak pen adangno tentuammi ngalkap thawng sawm ten Gibeah khua cu nam tawtok haw a, nase zetin dodun haw hi. Mahnaven Benjamin miten sung tuk hung tih cu thei haw ma hi.
35 Topa in Israel tei lakah Benjamin ngalkap tei humah nehnak cu pia zo hi. Israel miten ni khat sungin Benjamin ngalkap thawng sawm nih le thawng nga le za khat that haw hi.
36 Mahbek ten Benjamin miten sung ung tih thei haw hi.
Israel Tei Nehnak
Israel miten Gibeah elkim a ngelh ngalkap khenkhatte a muansan haw hangin Benjamin ngalkap tei mai ah nunglamah kik pepel haw hi.
37 Hi a ngelhmi a ngalkap cu thakhatin Gibeah khua sungah khenkhekin, a tum nung haw ten khuasungmi hempoh cu that khawng haw hi.
38 Israel mite le a ngelhmi a ngalkapte cu tepdunnak nei haw hi. A tepdunnak haw cu: Gibeah khuasung pen meikhu tamzet vanah kai amu haw tale,
39 Israel mite ngal a donak hawah nunglam kik ngawltohin, mailam nawk tuk tihnak hi tuk hi. Benjamin miten hi tianah Israel mi sawm thum that zo haw hangin amuh le muh “Masa bangin neh hung ngei,” tidun li haw hi.
40 a tepdun sa haw bangin Gibeah khuasung pen meikhu liangluang cu mu haw hi. Benjamin ngalkap ten nunglam a zohkik haw ten khua bupin, kang li amuh haw hangin lamdangsazet haw hi.
41 Mahbek ten Israel ngalkap cu heklehin, nawt tawtok haw a, Benjamin ngalkap cu a lung haw sil khawng hi; itahim titale, a ci uh mittik khawng haw tuk hei tih thei haw hi.
42 Nunglamah kikin, hampa lakah tai haw hi. Mahnaven tai suak thei haw ma. Israel ngalkap honpi le khuasung pen a hungmi ngalkap ten sep tawtokin sat hum haw hi.
43 Israel miten a seh hup khawng haw ten hil haw a, Gibeah pen nisuahnak lam tian hil pepel haw in, lamtuan that pepel haw hi.
44 Benjamin ngalkap phabel thawng sawm le thawng liat that haw hi.
45 Adangte cu Rimon a Suangpi lamah tai haw hi. Lamtuanah thawng nga that haw hi. A tanglaih mite cu Israel miten Gidom tian hil haw in, sat hum thah pepel haw laih hi. Mahlai ah thawng nih that haw hi.
46 A venghawng komin Benjamin ngalkap ngalphazet bebek hi thawng sawm nih le thawng nga that haw hi.
47 Mahnaven mihing za luk cu Rimmon Suangpi lam hampa lakah taivawkin, mahlai ah ha li um haw hi.
48 Israel mite cu kiklehin, khuasungah hawhin pano hihen, numei hihen, naupang le a nganhing haw tian, amuh haw mi hempoh that khawng haw hi. Mah elkim a khua hempoh vang haal khawng bok haw hi.