19
Levi Pa le A Zineu
1 Mah hun laihin Israel mite cu kumpi nei haw ma hi. Efraim mualhum ngam dengah Levi mi pa, pa khat umin, Judah ngam Bethlehem khua numei pa khat cu a zineu in la hi.
2 Mahnaven vei khat cu a pasal humah thinukin Bethlehem khua a pa i lakah tai in, ha li sung um hi.
3 a pasal cu a umlawhpa khat le laak pa nih kengin puileh tukin hawh hi. A zineu in, a pa i innah phano in zintungtik hi. A pa hei in thatui zetin muak bok hi.
4 A sungpa in, a henhih hangin ni thum sung cam hi. A zineu tuah tui le an, in le ei ngelin cam haw hi.
5 A ni linak zing cu tho in, hawh tukin tuangtim haw hi. Mahnaven a sungpa in, a makpa lakah, “An ei masa hih unna, na tha uh a um ten hawhleh tuk si uh si,” ti hi.
6 Mah hangin a sungca haw khung langkhatin, ei le in kawmin um haw hi. A pu in, “Tuzan cu camhihin, nopzetno in umhihin,” ti hi.
7 Levi pa cu thawn tum lelengin um hi; mahnaven a sungpa in, a henhih hangin cawllehin zan khat camleh hi.
8 A ni nganak zing cu khawmano tho in hawh tukin tuangtim hi. Mahnaven a sungpa in, “Kiallep bek ei-ta in, nuamno in um hih un hi. Taklam ninem ten hawhleh tukma uh cim,” ti in, a pa nih haw in, an ei ngel leleu haw hi.
9 Levi mi pa, a zineu le a umlawhpa cu thawn pan haw in, a sung pa in, “Zo teh un, taklam zo si, tu zan cu camhih poh un, a ngei ngawlin khuathim paih tuk hi. Tuzan cu camhih unna, um hiahhuah hih un. Zingten zingtungno in tho unna, pinleh un,” tin hen lehleu hi.
10-11 Mahnaven Levi mipa in zan khat camhih tuk cu nuam ngawltohin, a zineu tuah a laak pa nih humah khunnak phah kawmin, hawh tul haw hi. Jebus khua (Jerusalem tihmi) el a hen haw ten khuathim awn toh a hih tak a umlawhpa in, a bawipa i lakah, “Ita tuzan hi Jebus khuapi ah hin a cam uh ngawl?” tin dong hi.
12 A bawipa in, “Israel miphun um ngawlnak khua ah cam tukma hung. Hawh vawk nung inna, Gibeah ah hawh tuk hung.
13 Hung un, hawh hih nung, Gibeah ah ahi ma tale Ramah ah ngiak tuk hung,” ti hi.
14 Mah hangin Jebus khua cu kalvawkin hawh haw hi. Nitum ten Benjamin miphun tei ngamsung Gibeah khua ah hawh haw hi.
15 Mah khua ah ngiak tukin zuan haw hi. Levi mi pa cu khuasungah hawhin, zan ngiahnak tuk tun inn a tawh haw ngawl hangin dawngah khung hi.
16 Mahlai takin, putek pa khat cu a lo nadehnak pen pin hi. Mahpa i suahnak cu Efraim mualhum ngam hi naven Gibeah khua ah a ummi hi. Gibeah khua mite cu Benjamin miphunte haw hi.
17 Mikhual pa dawng a khung cu putekpa in amuh ten, “Ilai pen hung kam? Ilai hawh tuk cim?” tin dong hi.
18 Levi mi pa in, “Judah ngam Bethlehem khua pen hung ung, ka umnak uh Efraim mualhum ngammawkah hawh tuk ung. Bethlehem zin ing, atu-in innah a pin lam ing. Ngiahnak tuk tun inn mu ma ung.
19 Kalauk eih tuk an le hampa nei ung; ka zineu, keimah le ka umlawhpa tei eih tukin cangho le sabittui nei ung. Ka kulmi hempoh nei khawng ung,” tin don hi.
20 Putekpa in, “Lungmuang zetin um unna, ka innah ngiak un. Na sapmi hempoh uh keimah in pia tung. Hi dawngah cam pahsuh un,” ti hi.
21 Mah hangin a innah hawhpihin, a laakte cu an pia hi. Mikhual cu a ke haw somin, takeih ei haw hi.
22 Mahti bangin nop zetin, a um haw laihtakin, khuasung mihuatsuak ten a inn cu kimin, kongka a seh nung haw ten inn neitu putekpa cu, “Na inn a, zintungpa suahin: sualpih nuam ung,” tin au leilui haw hi.Ref 19:22-24 Pian 19:5-8;
23 Mahnaven putekpa cu pualeu ah tulin, “Mah ma hi, u le naute aw! Hehpihnakin! Hi bang thil sual bawl pahsuh un, hi pa cu ka mikhual hi.
24 Zo teh un: hilai ah ka canu khanglai le hi pa i zineu um hi. Atu-in tulpih tung a, nangmu mihingte haw hi. Na deih bangin bawlin, sualpih un. Mahnaven hi putekpa i humah imah bawlsia pahsuh un,” ti hi.
25 Mahnaven a thu cu ngai nuam hihim haw ma hi. Mah hangin Levi mi pa in, a zineu cu inn pualeu ah tulpih hi. A zineu cu manin zan khua in bawlsia haw hi.
26 Zinglam vak miamiai ten numei nu cu hungin, putekpa i inn, a pasal ngiahnak inn kongka el a hen ten lum hi. Nisuak nung tian mahlai ah umlaih hi.
27 A pasal cu zingtho in, a innah pin tukin kongka a hon ten a zineu cu kongka elah a khutin kong biang len thahin bokin, a lup leng cu mu hi.
28 A pasalin, “Tho in, hawh tuk hung,” ti li naven donleh ma toh hi. A pasalin, a luang cu la in, laak humah suanin, a innah pin hi.
29 A inn a hen ten inn sungah tumin nam la in, a zineu i luang cu khen sawm le khen nihin, a can nungten Israel ngam khua hempoh ah kuat hi.Ref 19:29 1Sam 11:7;
30 Mah amutu hempohin, “Hi bang mu awng ma ung. Israel mi Izipt ngam pen a tul uh pepan hi bang thu um awng ma hi. Ngaisung teh un! Pa kha khat bawl tukma hung maw?” tin ti ten haw hi.