18
Mikah le Dan Miphun
1 Mah hunlaihin Israel ngamah kumpi um haw ma. Dan hinnam cu ngam luah tuk zei li haw hi. Itahim titale mah laihin Israel mi lakah ngam luah tuk co kha haw ma hi.
2 Mah hangin a hinnam sung a, ngam zo tuk le vilveng tukin hah haw hi. Hawh haw in, Efraim mualhum ngam hengin, Mikah innah cam haw hi.
3 Mahlai a um sung haw in, mah inn a, um tangvalpa cu a aw cawi in, Levi mi hi tih cu thei haw hi. Amah cu zuan haw a, “Hilai ah ikaw na bawl? Akua kaw hilai ah a puitu? Itakaw hilai ah na um?” tin dong haw hi.
4 Amah in, “Mikah tuah thutepnak nei ung hi. Ama thiampi dek ing a, ka thaman pia haw,” ti hi.
5 Amuh ten, “Ka khualzinnakah tuangtung tuk ung maw, tuangtung tukma ung kaw tih Pathian dot sak hemin,” tin ngen haw hi.
6 Thiampi in, “Lungmuangno in hawhta un. Na hawhnak uhah Topa in cingkhawi leng,” ti hi.
7 Mah hangin a pa nga haw in, hawh haw a, Laish khua heng haw hi. Mahlai a ummi mihingte a zoh haw ten thinsuknak imah nei ngawl, Sidon mite bangin lungmuang zetin, a um haw cu mu hi. Pa khat le pa khat humah thunei cuang um ngawlin ailemzet le mengdenin um haw a, sapmi imah nei ngawlin a nungmi haw hi. A umnak haw cu Sidon mitei umnak pen khawla zetin, miphun dangte tuah pehzomdunnak nei haw ma hi.
8 Mi pa nga cu kik haw in Zorah le Eshtaol a hen haw ten, a phunpih haw ten a muhmi le a tawh haw mi thu cu dong haw hi.
9 Amuh ten, “Hung unna, Laish cu do tuk hung. Ngam ka zoh uhten ngampha ngangai hi. Ita um hiahhuah thong uh cim? Manlang zetin thok un! Hawh paih unna, a ngam haw cu luahtum nawnawm nung.
10 A mun na hen uhten poisak hei nei cuam ngawl, lungmuang zetin, a ummi haw hi, tih cu mu tuk uh ci. A ngam haw zal zetin, Pathian in, nangmuhte a piaksa mi ngam hi. Mihing tei kul mi na hempoh a kimin umnak ngam hi,” tin ti haw hi.
11 Zorah le Eshtaol khua pen Dan hinnam mihing za luk cu hiamnam kimno kengin hawh haw hi.
12 Hawhto haw in, Judah ngamsung Kiriath Jearim pen nitumnak lamah ngiak haw hi. Mah hangin tusun tianin, mahlai mun cu Dan Ngiahbuk tin sam vawk haw hi.
13 Mahlai pen hawh leleu haw in, Efraim mualhum ngam a um Mikah innah heng haw hi.
14 Laish elkimah ngam a zotu le a vilvengtu mihing pa nga ten a ngualcam tei lakah, “Hi na muh uhmi inn pa khat sungah thiampi angkicual le thingtuah bawlmi milim le sunmi milim um hi tih thei uh cim maw? Itin kaw a tih tuk uh ngaisung hem un?” tin dong haw hi.
15 Mah hangin Levi tangval pa i umnak Mikah i innah hawh haw a, “Dam laih cim maw?” tin nuksat haw hi.
16 Mahlai ah ngaldo tukin a mansa Dan ngalkap za luk cu kongka elah ding haw hi.
17 Vilvengtu mi pa nga cu thakhatin, Mikah inn sungah tumin, thiampi pa cu ngalkap za lukte tuah kongka ah um haw hi.
18 Mi pa nga tei Mikah inn sung pen milim a lak haw amuh ten thiampi pa in, “Ikaw na bawl lih uh?” tin dong hi.
19 Amuh ten, “Mengdenno in um pohin hi. Kam khat hei awn pahsun, ka lak uhah hung inna, ka thiampi pa le thusontu hi in hi. Mihing pa khat innkua ca in thiampi hih sangin, Israel miphun hinnam khat i thiampi hi tuk nuam saw ma cim?” tin ti haw hi.
20 Mah a theih ten thiampi pa cu lungdam zetin, a milim la in, a lak hawah zui bok hi.
21 A khua lamah kik haw in, a casuante, a ngan le a vante cu a mai ah khol pepel haw hi.
22 Mikah i inn pen khawla thim, a hen haw ten Mikah in, a inn nelte cu ngaldo tukin sam hi. Dan ngalkapte hilin,
23 au pepel haw hi. Dan ngalkapte cu nunglam hekin, Mikah amuh haw ten, “Ita hil kam uh ci? Mihing hi zazah ita pui kam?” tin dong haw hi.
24 Mikah in, “Ka thiampi le ka bawlmi milim ka pathiante nangmu lakah taipih den nei pah ci. ‘I na deihnak kaw?’ Ita keimah hil kam uh ci?” tin ti ngam lalaih si uh ci,” ti hi.
25 Dan ngalkap ten, “Au pahsun! Umden saw in, hi ngalkap a thin na uktik tale nangmah le na innkua venghawngin thi kha tuk uh ci,” tin ti haw hi.
26 Mahnung ten Dan mite cu hawh haw hi. A tha haw a ngilzet tak, do theih tuk hi kha ma tih Mikah in amuh ten a innah kikleh hi.
27 Dan miten Mikah i bawlmi nate le thiampi cu taipihin ngamdaizet le mi lungmuang tei khua Laish cu do haw hi. Khua sung mite cu thatin, haal haw hi.
28 A khua haw cu Sidon khua pen khawla zetin pawlkom tuk le zop tukmi kua mah a neih haw ngawl hangin pantu kuamah nei haw ma hi. Laish khua cu Bethrehob khua el kuam a ummi hi. Dan miten mah khua cu tungdingleh haw a, mahlai ah amuh um haw hi.
29 Amuh ten mah khuapi min cu Jakob casuan a piannak haw Dan i min la in, mah khua cu Dan tin minsaleh haw hi. A laih ngawlin Laish tin, a sam leleng haw mi hi.
30 Dan miten a sek haw milim cu amu ca tukin phut haw a, Moses i tupa Gershom i capa Jonathan le ama capate cu Dan hinnam tei ca tukin thiampi dek haw hi.
31 Pathian i Puanbuk Shiloh ah a um sung hempoh cu Mikah i milim vang mahlai ah um leleng hi.