14
Samson le Timnah Khanglai
1 Samson cu Timnah khua ah lengin, mahlai ah Filistin khanglai pa khat mu hi.
2 Innah a pinleh ten a nu le pa i lakah, “Timnah khua ah Filistin khanglai pa khat mu ing. Dotsak zal un. Huai nuam ing,” ti hi.
3 Mahnaven a nu le pa ten, “Ita vunceptan ngawl Filistin mitei numei cu zi tukin deih ngelcel cim? Eimu unau pih le miphun lakah, na deihmi khanglai pa khat hei um haw ma maw?” tin ti haw hi.
Mahnaven Samson in, “Huaisak tukin ka deihmi cu amah pa khat bek hi. Amah bek ka deihmi hi,” tin, a pai lakah ti hi.
4 Filistin mite do tukin Topa in hunpha a zei hangin, Topa in Samson cu hi bangin bawltik hi tih a nu le pa ten thei haw ma hi. Mahlai in Israel mi uktu cu Filistin mite hi.
5 Samson cu a nu le pa tuah Timnah ah hawhsuk haw hi. Timnah sabit huanah a um haw laihin, Samson cu pawpino pa khatin thum hi.
6 Topa i hawvang cu Samson humah nasezet hengin, keelno bawhkek bangin kiosa cu a khut tuah bekin, botkek khawng hi. Mahti bangin a bawlmi cu a nu le pa hilh ma hi.
7 Mahten khanglainu lakah hawhin, thu son kawmin, lungkimzet hi.
8 Ngei um ngawlin mah khanglai huai tukin Samson cu hawh leleu hi. A hawh laihtakin, a thahmi kiosa luang zo tukin lampi pen dawm pialin, a zoh ten kiosa luang sungah khuai bu khat a hum tuah mu hi.
9 Khuaihum cu la in hawh thahin, ei pepel hi. A nu le pa i lakah hengin khuaihum cu pia bok hi. Amuh vang ei haw hi; mahnaven kiosa luang sung pen ka lak hi tih a nu le pa hilh ma hi.
10 Samson i pa cu khanglai nu i innah hawhin, mah hun laihin, tangval tei bawl mek daan bangin Samson in puai bawl hi.
11 Filistin miten Samson amuh haw ten a lakah um tukin tangval sawm thum pia haw hi.
12-13 Samson in, a lak hawah, “Thu polh tung hi. Zi huai puai ni salih sungin ka thu polhmi na hilh thei uh tale puancoih zun sawm thum le angki cual zun sawm thum pia tung hi. Mahnaven na hilh thei uh ma tale, puancoih zun sawm thum le angki cual zun sawm thum pia tuk uh ci,” ti hi. A muh ten,
“Na thu polh cu hilh vele.
Ngai pah nung,” tin ti haw hi.
14 Samson in, “Eitu sung pen eih tuk tul. A ngilzet sung pen a hummi tul,” ti hi. Ni thum sung a thu polhmi cu ngaisung li haw naven thei zo haw ma hi.
15 A ni linakin Samson i zi lakah, “A thu polhmi hi na lakah hilh tukin na pasal hi lemin hi. Mahti bangin na lem ma tale na pa i in halin, nangmah vang halcih tuk ung hi. Hi puai a sawmmi hi ca-ngah khawng haw tahen tih deihnak hangin maw?” tin ti haw hi.
16 Mah hangin Samson lakah a zi cu kapthahin, “Kei hi deih ngangai ma ci, hua ci, ka ngualte thu polhin, keimah loli hei hilh nuam ma sisi,” ti hi.
Samson in, a zi lakah, “Ngai sung bok kekin! keimah hingtu ka nu le pa hei hilh mang hi. Nang itin hilh thei tung kaw?” tin don hi.
17 Ni salih sung puai a celh lak lawh nisialin, a pasal cu kapin ngen hi. Catngawlin a kut lo hangin ni salihnakin, a sullam cu a zi lakah hilh hi. A zi in, a ngualte hilh pepel hi.
18 Mah hangin ni salih ni a zaunak khansungah Samson a tum laih ngawlin, khuasung mite in,
“Khuaitui sangin
a hum saw i um tuk him?
Kiosa sangin,
a ngil saw i um tuk him?”
tin, a thu polhmi cu
hilh kik haw hi.
Samson in,
“Ka khuino tuah
leilet ma le uh ci
thei tukma nave uhcin,” ti hi.
19 Topa i hawvangin Samson cu nase zetin umpih hi. Ashkelon ah hawhin, mahlai ah mihing sawm thum thatin, a puan silh haw la khawngin, a sullam hilh theitute cu pia hi. Thinuk zetin, a pa i innah pinleh hi.
20 A zi cu Samson i ngualcam phabel, a zi huai laihin, a dinpihtu pa pia hi.