13
Samson Suahnak
1 Topa i mai ah Israel mite cu a sual leleu haw hangin Topa in, Filistin tei khutnuai ah kum sawm li sung Filistin ten Israel mite uk haw hi.
2 Mahlai in Manoah a tih haw mi pa na um hi. Amah cu Zorah khua mi Daan hinnam hi. A zi cu cacawi ngawlmi a cing hi.
3 Topa i vancungmi cu a zi lakah langin, “Nang cu micing na hih hangin ca nei ma ci; mahnaven tu pepanin naupai tuk ci a, capa hing tuk ci.
4 Ngalling zetin um inna, sabittui le beer inviang pahsun. Eih thiang ngawlmi an ei pahsun.
5 Mah na capa cu a sam met pahsun hi, itahim titale a suah ni pepan Pathian lak a piakmi hi tuk a, Nazirnote 13:5 Nazir tih cu Pathian lakah thutiam bawlin, zu in ngawl le an thiang ngawl ei ngawlin le sam met ngawlin ummi hi. mi hi tuk hi. Amah cu Filistin khut sung pen Israel mi pan suah tukin a pantu hi tuk,” ti hi.Ref 13:5 Mipum 6:1-5;
6 Manlang zetin hawhin, a pasal lakah, “Pathian mihing pa khat ka lakah hungin, amah cu Pathian vancungmi bang hi a, maizah upat tak ngangai hi. Ilai lam pen hung kam tih hei dong mang; amah vangin a min hilh bokma.
7 Mahnaven naupai tuk ci a, capa nei tuk ci,” tin hilh hi. Sabit tui le beer inviang pahsun; eih thiang ngawl an hei ei pahsun, itahim titale mah na capa cu Pathian lakah piakmi hi tukin, a nun sung hempoh ah Nazir mi hi tuk,” ti hi.
8 A pasal Manoah in Topa i lakah thungenin, “Maw, Topa, hehpih zal inna, na hahmi na mihing cu keimu lakah hah lehin, ka neih tuk uhmi capa cu iti bangin cingkhawi tuk ung kaw, hilh zal hen,” tin ngen hi.
9 Manoah i thungetnak cu Topa in zain, vancungmi cu Manoah i zi lakah hungleh hi. Mah hunin Manoah i zi cu lo sungah khung hi; a lakah a pasal umma hi.
10 manlang zetin, a pasal lakah tai in, “Zo in, nung a, ka lakah a hungpa khi hungleh hi,” tin ti hi.
11 Manoah cu tho in, a zi cu zui hi. Mipa i lakah Manoah in, “Ka zi lak awntu nangmah cim?” tin dong hi.
Mahpa in, “Hi ing,” tin donleh hi.
12 Manoah in, “Mah ahi tale na hilhmi a kim ten naupang pa cu itin umin, ibawl tuk kaw?” tin dong hi.
13 Topa i vancungmi in, “Ka hilh bangin zui khawng tukin na zi cu cingcai zetin um hen.
14 Sabit ngui pen tulmi hempoh imah ei pahsuh hen. Sabittui hihen, beer hihen inviang pahsuh hen, eih thiang ngawlmi an hei ei pahsuh henna, ka hilhmi hempoh cu bawl khawng hen hi,” ti hi.
15-16 Topa i vancungmi hi tih thei ngawlin Manoah in, a lakah, “Hawh hih zal pahsun. Na ca in keel dawnno ngo tuk ung,” ti hi.
Mahnaven vancungmi in, “Ka um hih vangin, na an cu ei tuk mang. Mahnaven keel na ngo tale meihalin, Topa i lakah biakpiaknak bawlin,” ti hi.
17 Manoah in vancungmi lakah, “Na hilhmi a kim ten upat maizahnak ka piak theihnak tukin, na min hilhin,” ti hi.Ref 13:17-18 Pian 32:29;
18 Vancungmi in, “Ita ka min thei nuam cim? ka min kuamah i theih tuk kha ma hi,” ti hi.
19 Mah hangin Manoah in keel dawnno le an cang dawmno cawi in suang biaklandawh humah lamdang zetin nadektu Topa i lakah biakpiaknak bawl hi.
20 Biaklandawh pen mei alh cu Manoah le a zi in, a zoh laihtak haw in, mei alh lak pen Topa i vancungmi cu van a kai laih mu haw hi. Mahbek ten Manoah le a zi cu lei humah bok haw in,
21 vancungmi cu muleh haw ma toh hi. Topa i vancungmi hi tih cu Manoah in thei hi.
22 Manoah in, “Pathian amuh uh hangin thi loli tuk hung hi,” tin, a zi lakah ti hi.
23 Mahnaven a zi in, “ Topa in, a that nuam ngangai ahi tale biakpiaknak a bawl uhmi sang tukma hi; hi bangin nalamdangte lak tukma, hi bang hun ten a thei vang theitik tukma,” ti hi.
24 A zi in capa hingin, a min Samson sa hi. Nauno cu khangin, Topa in muicu pia hi.
25 Zorah le Eshtaol laklawh, Dan ngalkap tei ngiahbukah Samson cu Topa i huhamin, a tha ngiltik hi.