15
1 Hun ngei deuhin, sangvut cop hun kim ten, Samson cu a zi leng tukin hawhin, keel dawmno keng hi.
Samson in, “Ka zi zaunak khansungah tum nuam ing,” tin, a sungpa hilh hi. Mahnaven a sungpa in tumtik nuam ma.
2 A sungpa in, “Ka canu cu huazet ci tih ka up hang ven, na ngualcam pa i lakah na piak. Mahnaven a ngangai titale amah sangin a naunu mawi saw hi. Na deih tale amah saw huai in,” tin ti hi.
3 Samson in, “Tu tum cu Filistin tei humah siatnak ka bawl hei in mawhsiat hi tuk mang,” ti hi.
4 Mah hangin hawhin, cingne za thum man hi. Cingne cu a kop a kopin, a mei haw ken kawmin, a mei laklawhah meilah kencih hi.
5 Meilah cu alhtikin Filistin mitei sangvut lo lakah cingne cu hah hi. A copsa haw sangvut bek hi ngawlin lo sung a um laihmi sangvut tian kangtik khawng hi. Olif huan vang kang khawng hi.
6 Filistin miten hi bangin a bawltu akua him? tih kan haw in, Samson hi tih thei haw hi. Ita hi tih bangin bawl him titale Timnah mi a sungpa in, a zi longkikin, a ngualcam pa i lakah a piak hang hi. Mah hangin Filistin mite cu hawh haw in, mah numei nu cu mei tuah a haal hup haw ten a pa i inn vang haal khawng haw hi.
7 Samson in, “Hi tin maw na bawl uh? Tiamdun ing; na hum uhah phu ka lak laklawh cawl tuk mang,” ti hi.
8 Nasezet do in Filistin mi tampi thi haw hi. Mahnung ten hawhin, Etam liang a suanghol sungah um hi.
Samson In Filistin Mite Neh
9 Filistin mite cu hung haw in, Judah ngamah ngiahbuk samin, Lehi khua sim haw hi.
10 Judah miten, “Ita kohte do nge uh cim?” tin dong hi.
Filistin miten, “Samson ka mat nuam uh hang hi; keimu humah a bawl bangin bawlbok tuk ung,” tin ti haw hi.
11 Judah mi thawng thum cu Etam liang a suangholah hawh haw in, Samson lakah, “Filistin mite cu eimuh uktu haw tih thei ma cim? A hum uhah na hentikmi na hi zo kekin!” tin ti haw hi.
Samson in, “Ka humah a bawl haw bangin a hum hawah bawlbok hi poh ing,” ti hi.
12 Judah miten, “Nangmah keen ikekin, Filistin mitei lakah pia tukin hung ung hi,” tin ti haw hi.
Samson in, “Mah ahi tale kohten that tukma ung tin thutiam un,” ti hi.
13 “Hi zuh hi, a ken bek kenin, amu lakah pia tuk ung. That hihim tukma ung,” tin thutiam haw hi. Mah hangin khau thakno pa nih tuah kenin liang a suanghol pen tulpih haw hi.
14 Samson cu Lehi khua a hen ten, Filistin mite cu au thahin, a lakah zuan tawtok haw hi. Topa i hawvangin Samson cu nase zetin umpihin, a baan le a khut kennak khau cu baihno botcat khawng hi; a baih dan cu nimzang khat mei a haal tawng bangin cat khawng hi.
15 laak kha nguh pa khat Samson in mu in, a lak ceng ten mahmi tuah Filistin mi thawng khat vat hum hi.
16 Mah hangin Samson in lasa in,
“Laak kha nguh pa khatin mihing
thawng khat that hi,”
“Laak kha nguh pa khatin
mi luang a thuahin thuah,”
ti hi.
17 Mahnung ten laak kha nguh cu vawk hi. Mah mun cu Ramath Lehinote 15:17 Ramath Lehi tih cu Kha Nguh Mual tihnak hi. tin sam haw hi.
18 Samson cu a dangdum zetin Topa sam hi. “ Topa aw, na salpa kei hi ngalnehnak ngengpi pia zo ci. Tu hi dangdumin thi awn toh ing, hi tin maw dangdumin thi in, vuncep tan ngawl Filistin miten a mat haw tuk?” tin au hi.
19 Pathian in mahlai a, leisung pen kua awngtikin mahlai pen ciktui tultik hi. Mah tui cu Samson in, a in ten a tha dimlehin, ngilleh hi. Mah hangin mah cik cu Hakkore tin minsa haw hi. Tu ni tianin Lehi ah umlaih hi.
20 Filistin miten a ngam haw a uk haw laihin, Samson in Israel hotu kum sawm nih sung dek hi.