12
Jefthah le Efraim Mi
1 Efraim mite hiamnam keng tukin samdun khawm haw a, Jordan ngun a kaltan nung haw ten Zafon ah heng haw in Jefthah lakah, “Ita Ammon mite do tukin na hawh laihin kohte zawm nuam ma kam? Na inn tuah nangmah haal tuk ung,” tin ti haw hi.
2 Mahnaven Jefthah in, “Keimah le ka mite cu Ammon mite tuah nase zetin thu eldunnak nei ung. Keimuh pan tukin nangmuh sam naveng kuamah hung ma uh ci.
3 Keimah pan tukin kuamah na hun uh ngawl ten ka nunnak hei ngaisung ngawlin, Ammon mite do ing. Topa in hehpihin neh ung. Ita keimah lehlam do tukin hung uh cim?” tin ti hi.
4 Jefthah in Gilead mite hempoh munkhatah samkhawmin, Efraim mite cu do in, neh haw hi. Itahim titale Efraim miten, “Efraim le Manasseh ngam a um, noh Gilead mite cu Efraim pen mi taivai poh si uh ci,” a tih leleng haw hang hi.
5 Gilead miten Efraim mite a taivawk ngawlnak haw tukin Jordan ngun kaltan theihnak mun hempoh pen khah khelh lo haw hi. Efraim mi luat nuamin ngun ngal lam hawhnak a nget haw ten Gilead ngalkap ten, “Efraim mi cim maw?” tin dong haw hi. “Efraim mi kha mang,” a titale,
6 Shibboleth ti hemin, a cangcianno hei lo thei ngawlin, “Sibboleth,” a tih haw ten Gilead ngalkap ten man haw a, mah mun Jordan Ngun kaltannakah pa khat nung pa khat that haw hi. Mah tumin, Efraim ngalkap thawng sawm li le thawng nih thi haw hi.
7 Gilead mi Jefthah in Israel thukhentu in kum luk sung dek hi. A thih ten Gilead ngam a khua ah vui haw hi.
Ibzan, Elon le Abdon
8 Jefthah thih nungten Israel mite cu Bethlehem khua mi Ibzanin lamhuai hi.
9 Ibzanin capa sawm thum le canu sawm thum nei hi. A canu sawm thum cu hinnam dangte pasal neitikin, a capa sawm thum vang hinnam dangte zi huaitik hi. Ibzanin Israel mi kum salih sung pui hi.
10 A thih ten Bethlehem khua ah vui haw hi.
11 Ibzan thih nungten Zebulun mi Elon in Israel cu kum sawm sung lamhuai hi.
12 Elon cu thi in Zebulun ngamsung Aijalon khua ah vui haw hi.
13 Elon thih nungten Pirathon khua mi Hillel i capa Abdon in Israel mi lamhuai hi.
14 Abdon in capa sawm li le tupa sawm thum nei in, laak sawm salih humah khung mek mite haw hi. Abdon in Israel cu kum liat sung lamhuai hi.
15 Abdon a thih ten Amalek mitei mualhum ngam, Efraim ngamsung a um Pirathon khua ah vui haw hi.