11
1 Gilead mi Jefthah cu ngalphazet ngalkap pa khat hi. A pa i min cu Gilead hi, a nu cu numei pha ngawl hi.
2 Gilead le a zi in capa tampi cawi haw in, a capa tei upat haw ten Jefthah lakah, “A pa uh lak pen, lo le lam ngah tuk nei ma ci; numei dang i capa ci,” tin ti haw in hawlvawk haw hi.
3 A unau tei lak pen Jefthah cu tai in, Tob ngamah um hi. Mah ngam cu mipha ngawl ten zui pepel haw in, mahte tuah mi thil laksak pepel haw hi.
4 Hun a ngei deuh ten Ammon miten Israel mite cu do haw hi.
5 Tob ngam pen kikleh tukin Gilead upa ten Jefthah zawm haw hi.
6 “Hungin hi, nangmah in ho inna, Ammon mite do tuk hung hi,” tin ti haw hi.
7 Mahnaven Jefthah in, “Kei cu hua in, ka pa i inn pen hawlvawk si uh si, ita vansan na tawh uh bek ten ka lakah hung uh cim?” tin ti hi.
8 Jefthah lakah, “Hi bangin vansan ka tawh uh hangin ven na lakah ka hunnak uh cu; keimu lakah hungin, Ammon mi do tukin deihzet ung hi. Gilead mi hempoh ho zazalin hi,” tin ngen haw hi.
9 Jefthah in, a lak hawah, “Na lak uhah hungin, Ammon mite do in Topa in nehnak a pia tale, keimah in uk tung hi, na lung uh kim ni maw?” tin dong hi.
10 Amuh ten, “Lungkim ung Topa cu a thu uh theihpihtu hi,” tin ti haw hi.
11 Mah hangin Jefthah cu Gilead puitute tuah hawhin, Gilead miten amuh uktu le hotu in koih haw hi. Mizpah pen Topa i mai ah a tepdunnak haw hempoh cu Jefthah in hilhleh khawng hi.
12 Jefthah in, Ammon kumpi lakah palai hahin, “Ita ka ngam uh do uh cim? Ka hum uhah lungkim ngawlnak nei uh cim maw?” tin dong hi.
13 Ammon kumpipa in Jefthah palai lakah, “Izipt ngam pen Israel mite a tul haw laihin Arnon ngun pen Jabbok ngun le Jordan ngun tian ka ngam la haw hi. Atu-in mahmi cu pontam ngawlno in pia kikleh un,” ti hi.
14 Jefthah in Ammon kumpi lakah palai hah lehin,
15 hitin don kikleh hi, “Hi cu man ma hi, Israel miten Moab ngam hihen, Ammon ngam hihen la awng haw ma hi.
16 Izipt ngam pen a tul haw laihin, phillawn lak pen hawh haw a, Tuipi San pen Kadesh heng haw hi.
17 Edom kumpipa i lakah palai hahin, a ngamsung hawah hawh theihnak tuk ngen haw hi. Mahnaven Edom kumpipa in phal ma. Moab kumpipa i lakah ngen leleu haw naven phal ma leng hi. Mah hangin Israel mite cu Kadesh ah um vawk haw hi.Ref 11:17 Mipum 20:14-21;
18 phillawn pen hawh haw in, Edom ngam le Moab ngam kimin hawh haw a, Moab ngam pen nisuahnak lam Arnon Ngun ngal lamah heng haw hi. Mah munah ngiahbuk bawl haw naven Arnon ngun kaltan haw ma hi; itahim titale Arnon ngun cu Moab tei ngam ngamngi hi.Ref 11:18 Mipum 21:4;
19 Israel miten Amor miphun Heshbon kumpipa Sihon lakah palai hahin, a ngamsung tawnin hawh theihnak ngen haw hi.Ref 11:19-22 Mipum 21:21-24;
20 Mahnaven kumpi Sihon in phal ma hi. A ngalkap hempoh samkhawmin Jahaz ah ngiahbuk bawlin, Israel mi doleh lamsang haw hi.
21 Mahnaven Topa, Israel i Pathian in Israel lakah nehnak pia in, Sihon le a ngalkap cu neh haw hi. Mah ngamsung a, um Amor mitei ngam hempoh cu Israel miten sut khawng haw hi.
22 Amor ngam hanglam, a Arnon pen saklam Jabbok tian, nisuahnak lam phillawn pen nitumnak lam Jordan tian, a venghawngin luah khawng haw hi.
23 Mah hangin ama miphun Israel mi ca in, Amor mite a hawlvawktu cu Topa, Israel i Pathian hi.
24 Mahmi cu lakleh tum cim maw? Na pathian Khemosh i piakmi hempoh na co tuk hihim hi. Mahti bang lengin, Topa ka Pathian i piakmi hempoh cu ka co tuk uh hihim bok hi.
25 Zippor i capa, Moab kumpi Balak sangin cuang saw ing tin ngaisung cim maw?Ref 11:25 Mipum 22:1-6;
26 Heshbon khua Aroer khua, a elkim a khua le Arnon ngun mawk a, khua hempoh cu Israel miten kum za thum sung cikcek luah haw hi. Kum hi zah sungin ita la kik awng ma uh cim?
27 Na humah bawl sualmi nei ma ung, nangmah saw in, na do hangin nangmah mawh ci. Topa cu thukhentu hi in, tuni in Israel mi le Ammon mi laklawhah thukhen tuk,” ti hi.
28 Mahnaven Jefthah i thucahmi cu Ammon kumpipa in imah sial ma hi.
29 Topa i hawvang cu Jefthah humah heng hi. Jefthah cu Gilead le Manasseh ngamsung pen tulin Gilead ngam Mizpah ah kikleh hi. Mahlai mun pen Ammon ah hawh pepel hi.
30 Jefthah in Topa i lakah, “Ammon mitei humah nehnak kei na pia ahi tale,
31 ka ngal nehnak pen ka kihleh ten keimah muak tukin ka inn pen a tul masabeltu cu meihal biakpiaknak tukin pia tung hi. Kua hei hihen na lakah biakpiaknakin pia tung hi,” tin thutiam hi.
32 Mah bangin Jefthah in, Ammon do tukin ngun cu kaltanin, Topa in nehnak pia ngangai hi.
33 Aroer pen Minnith elkim khua sawm nih cikcek nehin, Abel Keramin khua tian Ammon mite cu that pepel hi. Mi tampi thi haw in, Ammon mite cu Israel miten neh vawk haw hi.
Jefthah I Canu
34 Mah hangin Jefthah cu a inn Mizpah ah a pin ten a canu cu khuang tum le lam thahin, a pa muak tukin tul hi. Hi a canu cu a ca neihcalam hi; capa le canu dang nei ma hi.
35 A canu amuh ten Jefthah cu a lungsia in, a puan hempoh bot kekin, “Ai zaw! ka canu! Ka lung tamzantik ta ci maw! Ita ka thinnatiktu tukin nang um kha nge cim? Topa i lakah ama min salin thutepnak ka bawl zo hangin khelleh thei ma toh ing,” ti hi.Ref 11:35 Mipum 30:2;
36 A canu in, “Maw ka pa, Topa i lakah thutepnak na bawl zo toh ahi tale ka hum a bawl tukin na tihmi cu bawlin hi. Na ngal Ammon mitei humah phulaknak Topa in pia zo,” ti hi.
37 Mahnaven a pa i lakah, “Maw ka pa, thil pa khatno hi cu hehpih zalin, ha nih sung hah hih inna, khanglai laihin thi tuk ka hih tak, lungsia in mual le luamah ka ngualte tuah leng ngel hih tuk ung,” tin ngen hi.
38 A pa in, hawhta poh ni ci maw, tin, ha nih sung hah hi. A canu cu khanglai himin thi tuk a hih tak a ngualte tuah hawh haw in, lungsia lunglengin mual le kuamah vak haw hi.
39 Ha nih nungten a pa i lakah kiklehin, Topa i lakah a tepsa bangin a pa in bawl hi. Khanglai himin thita hi. Mahmi cu Israel ngam sungah daan bulpatnakin cang hi.
40 Gilead mi Jefthah i canu zunthuakin kum khatah ni li sung Israel numeite cu hampa lakah hawhin cang haw hi.