40
1-2 Job aw,
Ihempoh tithei Pathian cu
eng ci,
atu ni cawl tuk ci maw,
don hemin?
Job i donlehnak:
3-4 Silhah zetin awn zo ing,
“ Topa, kei in itin kaw
ka don theih tuk?
Imah awnleh tukma toh ing,”
ti hi.
5 Ka ot tuk zah sangin
a valthau in, awn zo ing.
6 Topa in, simpei sung pen
Job lakah, hi bangin
7 Job aw, pasal bangin ding inna,
ka thudotmite don hemin hi.
8 A dikcang ngawlin
kei bawl tum cim?
Kei hi misualah koihin,
nangmah saw
a dikcangmi in ngaisung
duncop tum cim?
9 Keimah zahin, na tha ngil a maw?
Keimah zahin vanthum bangin
na aw nging bok a maw?
10 Mahtin ahi tale minthannak le
maiphatnak
na neihmi tuah ding inna,
Sunloihnak le huham
na neihmi tuah thuamin hi.
11 Mi pualthaute na zo hemin;
na thinuknak nase zetin
suah inna, zakcazet tukin
bawlin:
12 Hi zuh hi, zo inna, khesukin hi;
mipha ngawlte cu
a dinnak mun hawah
cil niknekin hi.
13 Leisungah phum khawng inna,
Mithi ngamah kencipin hi.
14 Mahti bangin na bawl thei tale,
nangmah a thangphat
masabeltu tuk cu
keimah hi tung.
Nangmah in neh cei ti tung hi.
15 Sahang Behemothnote 40:15 Behemoth Sai, ahimata Tuipi thuanthum sung a tui cipuh nganhing ngengpi hi tuk tin um haw hi. khi zo hemin;
nangmah ka bawl bangin
amah vang bawl ing,
khuicang bangin hampa pet hi.
16 Mahnaven a pumpi ah
iti zahin ngilnak um hum?
Iti bang ngilnak kaw a taksa
ah a um?
17 A mei cu sidar thingkung bangin
khohin, a kawngtha vang
ngilzet hi.
18 A nguh cu daal bangin khohin,
a kete vang thik tuanpi
bang hi.
19 Ka semsuahmi hempoh lak pen
a lamdangbelmi ngamsa hi;
Amah nehtu cu amah
semsuahtu bek um hi.
20 Sahang a tatnak haw mualsangah,
a eih tuk hampa po hi.
21 Lingkung nuai ah bokin;
Cikdup phaipheng lakah
ngelh hi.
22 Tuimawk a, lingkung le
paaknem kungin nilimtik hi.
23 Tuilun vang lau ma hi;
Jordan tuicawkin,
a mai a sep li hei in,
daidenno in um hi.
24 Akua in kaw a mit hupin,
a man thei tuk?
Akua in kaw a naal pen
sio tuah a awk thei tuk?