41
1 Tuipi thuanthum sung a,
sahang Leviathan cu
sio tuah awk thei ni cim?
A lei cu khau tuah
khih thei ni cim?Ref 41:1 Saam 74:14; 104:26; Isa 27:1;
2 A naal vitin, khaukhih thei ni cim?
Thik kawipi tuah
a kha sunlet thei ni cim?
3 Hu hah zalin, ti ni maw?
Na lakah hehpih kun
ni maw?
4 Nangmah tuah lungkimnak bawlin,
kumkhua na nadek tukin
thutiam ni maw?
5 Na umlawh numei tei zoh nopnakin,
na inn a, na khawihmi
vano bangin khih thei ni cim?
6 A cik zuak tukin ngasa mantu ten
nepdun li haw tuk maw?
Sumbawl ten zuak tukin
a cik lem haw ni maw?
7 A vun cu ceipi tuah sunlet
thei ni cim?
A lu cu khau vawhmi ceipi tuah
sun thei ni cim?
8 Na khut tuah zen hemin;
nase zetin sualdun tuk uh ci;
Tu nungten ti ngamleh
tukma toh ci.
9 Leviathan cu amuh thawthong
haw hei ten lau leita in
leihumah lum pok haw hi.
10 A thin a pulhang ten lauhuai zet hi;
A mai ah a ding ngamtu
kuamah um haw tukma.
11 Leviathan do in, a himdam
um haw ni maw?
Leihumah kuamah um tukma hi.
12 Leviathan i kebeu tha le
a tha ngildan hilh ngawlin
um thei thong mang.
13 Kuamah in, a silhmi a angki
humta saw cu
duk thei haw tukma;
A thik angki vang sun pem
thei haw tukma.
14 A lauhuaimi a ha tuante tuah
akua kaw a kha
a botkek ngam tuk?
15 A ngumzaang a kep cu
ngal lumphaw tampi
thuah bangin, thuahdun teptup haw a,
suang bangin cang hi.
16 Pa khat le pa khat a pehdunnak
haw bing leita in,
huih hei tum thei bikbek tukma.
17 Khoh zetin, a pehdun haw taktoh cu
imah in dokcat thei tukma.
18 A hahthio ten al zawzok hi,
a mit cu zingtungno
nisuak bangin de selsul hi.
19 A kam sung pen mei alh tul
zuazuakin,
meithemte pok u-ung thong haw hi.
20 A naal sung pen meikhu tulin;
a so tawtokmi beel nuai a,
hampa kang khu bang hi.
21 A haihawhin mei alhtik zawzuakin,
a kam sung pen meiling
tul luluih hi.
22 A ngawng cu a ngil leita hangin,
cawl thei ngawl tha ngui
a neih khak hangin
a mutu hempoh ten
lau mahtak haw hi.
23 A vun a nemnak mun imah lai ah
umma, thik bangin cangin,
ektuah theih thawthong tuk
kha ma hi.
24 A lungmu cu suang bang
cang zetin
imah lau nei ma;
A cangmi le a kehthei ngawlmi
cangngawinak suang bang hi.
25 A thawh ten a ngilbelte
hei in lau haw;
Thinsu in, a lungmu haw
pai khawng hi.
26 A lin theitu tuk ngalnam umma,
a sun pem theitu tuk cei le
thal vang umma hi.
27 Ama lak pen thik cu
cangphol nem bang thong a,
daal cu thingmuat bang hi.
28 Thalcang hei in hawlvawk thei ma;
suang tuah sep vangin
ama ca in hampa ko tuah
seh bang thong hi.
29 Tembek cu ama lak pen
phaikung bang hi a;
Ceipi in, a khawh haw hei in
nuihsan thong.
30 A pum vun cu beelpei hiam bang hi.
A hawh thahin,
a kawtmi lei cu
leileh sa bangin
kuivawk khawng.
31 Suankang sung tuiso bangin
tuipi cu sotikin;
Situi beel let bangin tuipi cu
lettik hi.
32 A hawh ten a nunglam a,
tui cu de susulin;
Tuipi cu phultotikin, tuiphuanin,
suaktik khawng hi.
33 Leihumah amah tuah tehkip tuk
kuamah um haw ma hi;
Launak imah nei ngawl ngamsa hi.
34 A pualthaubel ngamsate hei
imah simsial ma hi;
Hampalak ngamsa hempoh tei
kumpi hi.