39
1 Lianglak a, sathak tei
ca hin hun tuk thei awng cim?
Sazuk i ca hin laih mu awng a cim?
2 Ha i zong sung, ca pai haw kaw
tih thei cim?
Ituk ten hing haw tuk tih
hilh thei ni cim?
3 Ano hing tukin a nu lei ah
a bawhsuk hun tuk
son thei ni cim?
4 A canote hampa lakah khangin
pilzet haw;
a nu tei lak pen amu nuamnakah
hawhin, kikleh haw ma toh.
5 Hampalak a, laak cu
amu deih bangin
tat theihnak thu piatu akua kaw?
Hahin, amu nuamnakah
a vaktiktu akua kaw?
6 Mihing um ngawlnak phillawn cu
a inn haw tukin pia ing.
Hampa um ngawlnak ci
lawnlai ah umtik ing.
7 Thawmnging tamnak khuapi sungah
um nuam haw ma;
kuamah in khemin nadektik thei
haw ma hi.
8 Mualhum cu a hampa
eihnak haw mun hi;
Eih tukin a hing laihmi hempoh
zei haw hi.
9 Ngamsialin, na nadeh sak
nuam ni maw?
Na khui innah zan khat hei
cam nuam a ni maw?
10 Khau tuah khihin,
lei zalhnak doktik thei ni cim?
11 Na haksa dek saktu tukin,
a ngilnak muang thei ni cim?
12 Na cangcilnak pumah kikleh tuk hi
tin um cim?
Na pumah an khawmtik
thei ni cim?
13 Kalauk vano i ha khen cu
iti zahin manlang kaw?
Mahnaven iti bang kalauk vano hei in,
tititut bangin
leng thei ma hi.
14 Kalauk vano in, a tui cu
lei i lumtik tukin
leihumah zam hi.
15 Miten sikkeh sual haw kawn tih le
ngamsa hei in
cilkeh sual kawn,
tih hei thei zo ma hi.
16 A canote cu ama ca ngawl
bang bawlin;
a cimnak cu a thawnthong tuk hi
tih vang poitik ma hi.
17 Hiti bangin a siltiktu le
cihnak a pia ngawltu cu
Pathian hi.
18 Mahnaven nase zetin,
a tai vanglak ten
cipuh hum khungtu vang
a tih tham ngawlin
19 Job aw, cipuh a caktiktu cu
nangmah poh hi kha nen
ti cim maw?
A tuangmul cual zetin,
a potiktu cu
nangmah hi kha a cim?
20 Khaau bangin a dawk haw khi
nangmah in dawktik cim?
Mi thumin, a naal haw a phit haw khi
nangmah maw a phittiktu?
21 Thatho zetin munlawnah
a ke pek tawtok haw,
ngaldonak munah a tha neih tawp
tuah mainot haw hi.
22 Lau nei haw ma,
iti bang ngalnam
hei in kiktik thei ma.
23 Cipuh khungtu tei kenmi hiamnam:
Thalcang bawm,
cei le namte sudunin,
ni alin de zawzok hi.
24 Ngaldonak pengkul a tum haw ten
mengdenin,
umleh thei haw ma toh;
A tha haw tho in, mailamah
tai vingveng haw hi.
25 Pengkul a tumsial haw ten
a naal phit haw in;
Ngaldonak ngim cu ngam
khawlapi pen za haw,
ngalkap hotu bawipa i thupiaknak
aw vang za haw hi.
26 Muno cu na lak pen poh maw
lendan cung kha maw?
Hanglamah leng tukin a ha
a phalh ten?
27 Muvanlai in,
na thu ngai maw i kaw?
Mualsang humah bu a sak ten.
28 Suangkhan sangbelah bu bawlin,
suang hiam le
suangzumte cu
a ngal kulhtianin mang hi.
29 Mahlai mun pen thah tuk le
eih tuk cu a khawla le
a nai ah cuan kawkawi hi.
30 Sa luang umnakah mulukolhte
khawmkhawm haw,
a cano ten sa thi cu dut haw hi.Ref 39.30 Mt 24:28; Lk 17:37;