34
1-2 Noh micip le thu theite,
ka thu hilhmi hi ngai hem un!
3 An cu na tep uhten a uk le
uk ngawl thei uh ci;
Na beng uhin thu zain, thudik ahi le
hi ngawl khenkhuai
thei uh ci.Ref 34:3 Job 12:11;
4 Na thu cu thudik ahi le
hi ngawl teng nung;
thupha ahi le hi ngawl vang
ngaisung teh nung.
5 Job in, “Mawhnak nei mang;
ka humah Pathian in
camcawino in
thukhen ma.
6 Itin kaw khial ngai ing hi,
tin zolthu cu ka son theih tuk?
Ka meima hi dam theileh tukmi
hi kha ma toh,
mahnaven sualnak cu
nei mang,” ti hi.
7 Job bang milai mu awng uh cim?
Pathian zotsaknak cu
baihno in
son zuzung thong;
A ca in, tui in bangin baih hi.
8 Mipha ngawlte tuah
umkawm nuamin,
misualte tuah hawh
langkhat leleng haw hi.
9 Pathian i ngualcam pha hihnak cu
imah nemcuam kha ma,
10 Noh, theihtupnak a neite
ka thu hi ngai teh un!
Pathian in thil phatngawl bawl ni maw?
Ihempoh tithei in thil sual
bawl ngai ni maw?
11 Mihing cu a nadeh haw zui in,
Pathian in thaman pia hi.
A bawl haw mi a nunzia haw tuah
zui in, a hum hawah hentik
hi haw hi.Ref 34:11 Saam 62:12;
12 Ihempoh tithei Pathian cu
kuamah i hum hei ah
a dik ngawl bawl ma hi;
akua i hum hei ah
a man ngawlin um awng ma hi.
13 Midang akua bek pohin,
Pathian nelah thuneihnak
pia haw maw?
Lei hum buppi hi cingin hi,
tin, akua bekin dehvo
pia haw maw?
14 Pathian in, a hawvang la in
nunnak haihawh a laleh tale;
15 Nunnak nei hempoh
thi haw tuk a,
mihing hi leivulah
suakleh haw tuk hi.
16 Cihnak na nei ngangai uh tale
ngai hem un!
17 A dikmi le a nase mi Pathian
lawl uh cim?
Pathian in thudik a hua tale
itin kaw leipi
a uk theih tuk?
18 Pathian in, ngilo le
mipha ngawl ahi haw tale,
kumpi le hotute vang lawl hi.
19 Pathian in mi hempoh semsuahin,
kuamah deidan ma;
Uktu bawite pan ngawlin,
mi ca-ngahte hua in le
mihau tin deih cuang ma hi.
20 Mihing cu phawhkhak ngawlin
zan hei ah thi thei hi;
Pathian in vat humin pai vawk haw hi.
Mi ngilzet vang
imah tih tham ngawlin botik hi.
21 Pathian in mihing tei lampi zo hi,
mihing tei ke kal cu
zo cangcian hi.
22 Iti bangin khuathim ahi hei in,
misual mu tuk ngawlin
Pathian a lim theitu
thimnak umma hi.
23 Pathian mai ah mihing hawhin le
a thukhen tukin,
Pathian in, a hun tek kulma hi.
24 Hotute lawlin hotu dang koih tukin,
Pathian in, a thu haw
dotkan lih kulma hi.
25 Itahim titale a bawlmi haw
a neubel vang thei khawng hi;
Zanlam ten vawkin siatsuah
khawng hi.
26 Mipi tei muh theihnak munah
misualte bawl sia hi.
27 Itahim titale amah cu zui nuamleh
haw ma toh,
A thukham hempoh vang
imah sumsialleh
haw ma toh.
28 Amuh ten mi ca-ngah
a siatsuah haw hangin
huisa in kap haw;
mi ca-ngah tei bop ngetnak aw cu
Pathian in za hi.
29 Pathian in zamsan thong tukin
a ngaisung tale,
akua in kaw a mawhsiat thei tuk?
A mai a sel ten milai ten
ikaw a tih theih haw tuk?
30 Amuh uktu in Pathian thei ngawl,
mi nuainem thei
a koih vangin,
Ngamsung miten ikaw
a tih theih cuang haw tuk?
31 Job aw, Pathian nelah
na sualnak phuang toh cim?
Sualleh tuk ngawltohin,
thutiamdun toh cim?
32 Ka sualnak cu lak zalin,
tin ngen cim?
Thilpha ngawl bawl tuk ngawltohin
lungkim toh cim?
33 Pathian i nadehnak na el nungten
na deihmi bawlsak tukin
muansan laih cim?
Hi thu cu nangma khencat tukmi hi,
kei i khencat tuk hi ma hi!
Atu-in, na ngaihsutnak
hilh hemin!
34 Thu a ngaisung thiamte cu
a lungkim leng haw tuk poh;
Ka thu hilhmi a zatu micip ten
hi bangin ti bok
haw tuk poh hi.
35 Job in, hi thu le la
thei ciang ngawlin
awn sual ngam maw le!
A otmi hi sullam nei ngawl
na hi pah!
36 Job i awn hi phano in,
na ngaisung uh ahi tale,
mipha ngawl pa khat bangin awn hi,
tih cu mu tuk poh uh ci.
37 A sualnak i humah dodalnak bet hi,
Ka mitmuh uhah le
ka beng uh i zakin
Pathian nuihsanin zawnsak hi.