33
1 Mah hangin Job aw,
ka ot tukmi hempoh hi
phano in ngai in hi.
2 Ka lungmu sung a, um mi cu
ka kam pen tul tuk hi.
3 Ka otmi hempoh hi
ka lungmu sung a,
ummi thungai thu hi;
cangcian kiuhkeuhin
hilh tung.
4 Pathian i hawvangin
kei cu bawlin,
Ihempoh tithei i haihawhin
nunnak pia hi.
5 Na don thei tale, na ot tukmi cu
ngaisung hamin!
zuamteh pah ni ci!
6 Nang le kei cu Pathian mai ah
bangten hung hi.
A pa nih uhin taklei tuah
bawl mite hung.
7 Mah hangin kei cu
lau nuam pahsun;
8 Na ot ka zakmi cu:
9 “Mawhnak nei mang,
thilpha ngawl imah
bawl mang;
Mawh nei ngawl ka hih hangin
sualnak pen luat ing.
10 Mahnaven Pathian in
kei a do nuam hangin
thu zei in,
a ngal bangin bawl hi.
11 Ka ke cu thik taicin tuah kenin,
ka ke kal hempoh vang
zociang cikcek hi,” ti ci.Ref 33:11 Job 13:27;
12 Mahnaven Job aw,
ciangkohin hilh ing;
khial ci!
Pathian cu iti bang
mihing sangin
ngeng saw hi.
13 Ita mihing tei phuknak
don awng ma hum tin,
Pathian cu siat ci?
14 Pathian cu mihing tei lakah
tu le atu-in awn hi,
mahnaven a otmi cu
imah simsial haw ma.
15 Mihing a hihbuh haw laihin,
a mang hawah mang le
muhnak tuah amu lakah awn hi.Ref 33:15 Job 4:13;
16 A otmi ngai tukin a beng haw
vaktikin hilh hi,
ngallinnak a hilhmi cu lau haw hi.
17 Sualnak bawlleh tuk ngawltohin le,
mi pualthau hi tuk
ngawlin hilh hi.
18 Khan khuk sungah hengtik ngawlin
thihnak pepan hi.
19 Pathian in mihing nun a hilh ten
natnak thuaktikin,
a taksa pumpi in natnak thuak hi.
20 Mi dam ngawl ten
an ei nap haw ma;
An ukbel hei a luak haw suak.
21 A taksa haw kiamsuk dedeuhin
a nguh haw bek tang hi.
22 Khan khuk lam zuan dedeuh haw a,
mithi khua heng pal
haw tuk hi.
23 Mihing dehvo hilhciangtu tukin
Pathian vancungmi
thawng tampi lak pen
pa khatno bek,
mah mihing bawm tukin le
a dikmi hilh tukin
hungkha tuk hi.
24 Vancungmi in hehpihnak
lungmu tuah
“Amah cu hah un!
Mithi khua ah hawh tukmi
kha ma hi;
Amah tatlehnak man
hilai ah um,” tin tituk hi.
25 A taksa cu dawnin,
a tha ngilleh tuk hi.
26 Thu a nget ten Pathian in
don tuk hi,
lungdamno in Pathian bia tuk a,
Pathian in ama ca in
tuangtung lehtik khawng tuk hi.
27 Amah in mipi mai ah,
“Sual ing, a dik ngawlmi
bawl naveng
Pathian in ka nunnak
khawih laih hi.
28 Khan khukah hawh phal ngawlin,
sun khuavakah
mu laih ing hi,” tituk hi.
29 Pathian in atu le atu-in,
nadek hi.
30 Mitei nunnak cu khaan khuuk
heng ngawlin panin,
a khansungah lungdamnak pia hi.
31 Job, atu-in ka hilhmi hi ngai in,
mengdenin um inna,
awn hih tung.
32 Mahnaven thuhilh tuk
na nei tale hilhin,
ngai tung hi;
Lungdam zetin
dik ci ti tung.
33 Mah ahimata daidenno in
um inna, ngai in hi;
cihnak thu na hilh nang.