32
Elihu i Otmi
1 Job i ngualcam pa thum ten, Job awn cu don nuamleh haw ma toh, itahim titale mawh nei ngawlin amah le mah ngaisungdun cop leita.
2 Job cu midikcangin, koihdunin, Pathian a mawhsiat hangin a el hawah a dingtu Elihu a tih haw pa cu thinuk zetin sup thei ma hi. Elihu cu Ram i hinnam Buz casuan Barakel i capa hi.
3 Elihu cu Job i ngualcam pa thum tei hum hei ah a thinuk, itahim titale Job i awn a donleh theih haw ngawl hangin Pathian cu khial hi tih tuah bangten hi.
4 Elihu cu nautabel a hih hangin midang tei ot a bo laklawh mengdenin um hi.
5 A ngualcam pa thum ten Job ot a donleh theih haw ngawl ten a thinso in hi tin ti hi.
Elihu in:
6 Kei cu naupang ing,
noh cu upa hi uh ci;
Mah hangin ka ngaihsutmi
hilh tukin nuam hihim mang.
7 Noh cu upa saw deuhte cu
a awn masa tuk uhmi ci,
tin ngaisung ing.
8 Mahnaven mihing lakah
hungin cihnak a piatu cu,
Ihempoh tithei Pathian i hawvang saw hi.
9 Mihing cu kum upa a hih hangin
cip hi ngawlin,
thudik vang thei saw
cuang haw ma hi.
10 Mah hangin ka thu hi
ngaibok tukin deih ing.
Ka ngaihsutmi hilh bok tung hi.
11 Na ot sung hempoh uh
thinsau zetin ngai ing,
cihnak awnkam na zei lih uh laihin
ngak leleng ing.
12 Phano in ka ngaih ten sung uh ci
tih za ing,
Job i otmite el thei ma uh ci!
13 Itin kaw cihnak neitu ung
na tih ngam uh?
Job a don theitu cu Pathian bek hi,
noh ten tileh thei ma
toh uh ci.
14 Job cu nangmu lak bekah awnin,
ka lakah awn ma hi;
Mahnaven a thu na don uh bangin
15 Job aw, amuh ten ot tuk
theileh haw ma toh,
na thu donleh thei haw ma toh.
16 Cingdenin, a um haw tian maw
ka ngah tuk?
Ot uk imah neileh ngawltohin
ding thong haw maw!
17 Mah kha ma hi, keimah in atu-in,
don tung a, ka ngaihsutnak
hilh tung.
18 Awn ngawlin um thei ma toh ing,
ka sungah ka ot tukmi
dim leita zo.
19 Otnak hun ka nei ngawl tale,
Sabittui thak a dimmi
saphaw thawl a keh bangin
pokkeh tung.
20 Ka ot hihim kul hi, mahbek ten
haihawh thei tung;
Ka kam pen hilh tul hihim tung.
21 Hi thu ah kuamah pat cuangmi
nei tuk mang;
Kuamah hei phatson
cuang tuk mang.
22 Mi phatson vang thiam mang;
Mi ka phatson ahi tale
manlang zetin Pathian in
bawlsia tuk hi.