19
Job i donlehnak:
1-2 Ituk tiang lawlawm kaw
na ot uhmi tuah
kei na bawlsiat lih tuk laih uh?
3 Vei sialcelh ngawl tianin
zawnsak uh ci.
Hiti bangin kei na zotsak uh hangin
zahcak tuk hei
ngaisung ma uh ci.
4 Sualnak ka bawl ngai ahi hei in,
noh tei natnak tuk
ikaw a um?
5 Keimah sangin mipha deuhin
ngaisung cawm uh ci;
Ka thuaknak hangin mawh hi,
tin ngaisung uh ci.
6 Hi bangin a piangtiktu cu
Pathian hi tih
thei zo ma uh cim?
Keimah awk nuamin
thangsiah hi.
7 Thisan luangtik hi, tin
ka au hei in kuamah in
ngai haw ma.
Bopnak ngen naveng
a manno in
thukhentu kuamah
um haw ma.
8 Pathian in ka lampi khakin,
hawhleh thei ma toh ing;
ka lampi cu thimtik hi.
9 Ka sunloihnak hempoh
lonsak khawng zo;
ka minthannak hempoh
botik khawng zo.
10 Mun tihkim pen kei cu vat hi,
ka muansannak cu
thingkung bangin
a bul pen bong hi,
Thiim tuk le thi tukin
keimah zam hi.
11 Ka humah a thinuknak cu
mei bangin alh hi;
a ngal lauhuaibelin koih hi.
12 Keimah do tukin
a ngalkapte hah hi;
ngal buknak tukin khuk co in,
ka deubuk kil khawngin
panmun khual haw hi.
13 Pathian in sosuahin
ka unau ten
taisan khawng haw;
keimah a thei satu vang
mikhual suak khawng hawta.
14 Ka unaupih ten kei taisanin,
ka ngualcam ten
zamsan haw hi.
15 Ka inn a cam mek haw ten
kei cu phawkngil
khawng zo haw hi;
Ka umlawh numei ten
mikhual le
ngamdangmi in
ngaisung haw hi.
16 Ka umlawh sam naveng don ma;
bopnak ngenin
ka lem hei ten
ka lakah zuan nuam ma.
17 Ka zi in ka haihawh namsia
thuak thei ma;
Ka suahpih ka unau ten
ningdelh haw hi.
18 Naupang ten amuh haw ten
zawnsakin nuihsan haw hi.
19 Ka ngualcam phabelte hei in
ningdelh haw,
ka ihbel mite ka ngalin
suak haw hi.
20 Ka nguh humah
ka vun khai leih luih;
nung zo cacang ing.
21 Noh cu ka ngualcamte uh ci!
Hu hehpih zal un!
Pathian khutin vatvawk hi.
22 Pathian in kei a bawlsiat bangin
ita nohte vangin
kei bawlsia bok kam uh ci?
Hi zah na thuaktik uh hi
lungkim ma laih uh cim?
23 Hiti bangin ka otmi hi akua poh bekin,
a khum haw ahin, laisungah
a ngan haw ahin deih na veng!
24 Mahma tale cikut tuah
suangpeek humah nganin,
kumkhua kho tukin, ngan ahin
deih na vengin!
25 Mahnaven kei a pantu cu
a nung tih thei ing;
a tawpnak ten kei panpihleh tuk hi.
26 Natnakin ka vun cu
a ei khawng vangin,
hi ka taksa tuah
Pathian cu mu tung.
27 Ka mit loli tuah amah cu mu tung,
midang hi ngawlin
keimah cikcekin mu tung hi.
Mahmi cu ka lungmu in
ngakhelzet hi.
28 Itin kaw a bawlsiat theih tuk uh,
na tih uh hangin
ka tha neihmi hempoh bo khawng zo.
Keimah bawlsia nuamin
thudang zei uh ci.
29 Mahnaven atu-in ngalnam cu
lau toh un!
Sualnak hum a Pathian thinuknak
a hengtiktu ngalnam cu!
Mah tih bangin thukhentu
na um hi tih thei tuk uh ci.