20
Zophar in:
1-2 Job, ka thin pulhangtik ci,
na thu donleh ngawlin
um thei ma toh ing.
3 Na otsa mite hi mi zotsaknak
awnkam ngeh hi;
Mahnaven iti bangin don tung
tih cu thei ing a,
theihtupnak nei ing.
4 Na theih bangin, tanglaih pen panin,
leihumah mihing a um pat
laih haw pepan,
5 Mipha ngawl i lungdamnak cu
hun comno sung bek phat hi.
6 Khangto in, van a khongto
haw hei hihen,
a lu in van a tawngkha hei in hi.
7 Leivul bangin huihin mutvawk tuk hi;
A thei satu ten ilai ah kaw,
ti li haw tuk hi.
8 Zanmang bangin pai tuk hi;
Mang a muhmi bangin
ituk mahten muhleh um tukma toh.
9 A mutu tei mitin muleh
haw tukma toh hi;
A um meknak mun pen pai tuk hi.
10 Ca-ngah cimkham tei lak pen
a ngukmi nate cu,
A capa ten a neihmi sung haw pen
pia kikleh haw tuk hi.
11 Khangno lai a, a ngil zetmi
a pumpi cu,
ngei um ngawlin leivul suak tuk hi.
12 Thil pha ngawl cu hum zetin thei hi,
mah hangin a khenkhat cu
a kam sungah muam hi.
13 A leinuai ah ngeipi koihin,
a hum leita hangin
seleh nuam ma.
14 Mahnaven mah a neihmi cu,
a hapum sung pen kha hi;
Thihsi bangin kha hi.
15 Mi pha ngawlin a ngukmi na cu
law tulleh khawng hi;
Pathian in longlehin,
a hapum sungta hei pholhleh hi.
16 Mipha ngawl tei eihmi cu
ngulhang i ngu bang hi.
17 Tui bangin olif situi luang cu
mu tukma hi;
khuinawi le khuaihum
a luangmi vang mu tukma hi.
18 A nadeh man hempoh
ei lalthong khawngin,
a vawk kul tuk hi,
A hauhnakte nop zetin
mang kha man tukma.
19 Itahim titale ca-ngahte
nemsukin imah simsial ma hi.
Mitei inn saksate lonsak hi.
20 A hampumnak haw cu
bo tih nei ma naven,
a sunloihmi nate hei hup theihmi
imah nei cuang haw ma.
21 In le ei in, a khambang imah umma;
a hauhnak cu ngeican
ngawlin bo hi.
22 Lawhting zetin, a um laihtakin
bawngsiatnak heng hi.
Haksatnak le bawngsiatnak
nase zetin,
a lakah heng hi.
23 A duhzahin ei poh hen!
Pathian thinuknak cu
a lakah mei alh bangin alh tuk a
nguah bangin a humah
zutuk hi.
24 Thik ngalnam pen a luat nuam hei in,
Daal thalcangin kha in,
a thin sun kha leng hi.
25 Thalcang cu a pumah mutin,
mah thalcang cu
dawk ngah haw;
A de mi a zik hiam pen
thi cak khat
nung cak khat caksukin;
ama humah launak ngeh dim hi.
26 A khawlsa na hempoh cu
siatsuah khawng haw;
mihing i lap ngawlmi mei in
amah le a innkuate
kang khawng haw hi.
27 Hi pa i sualnak cu van pen
langtik hi;
Amah do tukin leipi cu tho hi.
28 Pathian thinuknak cu
tuihautung bangin
heng tuk a,
a hauhnak hempoh
a venghawngin
siatsuah tuk hi.
29 Mipha ngawl tei tawhmi cu
mah bang hi;
Amu ca in Pathian i laitek sa hi.