4
Hawvang Man le Man Ngawl
1 Ka ih mite, Hawvang nei ing a titu hempoh sang kha pahsuh un, a neihmi Hawvang cu Pathian lak pen a hungmi maw, kha ma him tih khingkhai masa un. Itahim titale profet man ngawlte cu mun hempoh ah heng zo haw hi.
2 Pathian Hawvang hi le hi ngawl cu hi bangin thei tuk uh ci; kua hei hihen Jesuh Khrih cu mihingin hung hi tin, a phuangtu cu Pathian lak pen a hungmi Hawvang neitu hi.
3 Mahnaven kua hei hihen mahti bang a phuang nuam ngawltu cu Pathian lak pen a hungmi Hawvang neitu kha ma hi. A neihmi hawvang cu Khrih i ngal lak pen a hungmi hi. Khrih i ngal cu hung tuk hi tin za zo uh ci, atu-in hi leihumah heng zo hi.
4 Mahnaven ka cate aw, nohte cu Pathian cate hi uh ci. Profet man ngawlte vang neh zo uh ci. Itahim titale nangmu sungah a ummi Hawvang cu leihum mitei sung a, hawvang sangin ngil saw hi.
5 Profet manngawl ten leihum i thu le la sonin lei pi in, a thu cu ngai haw hi; itahim titale leihum ta hi haw hi.
6 Mahnaven ohte cu Pathian ta hung hi. Pathian a theitu hempohin eimu thu ngai haw hi. Pathian ta ahi ngawlmi in eimu thu ngai haw ma hi. Mahten a dikmi Hawvang le a dik ngawlmi hawvang deidatnak cu mu thei hung hi.
Pathian Cu Itnak
7 Ka ih mite aw pa khat le pa khat itdun tuk hung hi. Itahim titale itnak cu Pathian lak pen a hungmi hi. Mi a ittu cu Pathian ca hi in, Pathian theitu hi.
8 Mi a it ngawltu cu Pathian thei ma hi. Itahim titale Pathian cu itnak hi.
9 Pathian in, a itnak cu a Capa neihcalam hi leihumah a piaksuknakin langtik hi. Amah hangin nunnak a co theihnak tukin hi.
10 Itnak tihmi cu hi bangin hi. Eimuh in Pathian it hung tih hi kha ma hi. Amah lam saw in it in, a Capa piasuk hi; mahmi cu eimu sual ngaihthiamnak tukin hi.
11 Ka ih mite aw, hitih bangin Pathian in it ahi tale, eimuhte vang pa khat le pa khat itdun bok tukmi hung hi.
12 Kuamah in Pathian cu a mit tuah mu awng haw ma hi. Mahnaven pa khat le pa khat a itdun uh tale Pathian pehzomdunnak tuah nungca in, a itnak cu eimu sungah cangkim hi.Ref 4:12 Jn 1:18;
13 A Hawvang eimu lakah a piak zo hangin Pathian cu eimu sungah umin, eimuhte vang a sungah um hung, tih ciang zetin thei hung hi.
14 Pa in, a Capa cu leihum nunpantu tukin hah hi, tihmi amutu le a hilhtu cu eimuhte hung hi.
15 Kua hei hihen Jesuh cu Pathian Capa hi tin, a phuangtu cu Pathian a sungah umin, Pathian sungah vang amah um bok hi.
16 Mahten eimuh loli in Pathian i eimuhte a itnak cu thei in um hung hi.
Pathian cu itnak hi a, itnak tuah a nungtute cu Pathian sungah a nungmi hi. Pathian vang ama sungah nung bok hi.
17 Thukhennak Ni ten ngalhannak a neihnak tukin itnak cu eimu sungah cangkimtik zo hi. Mahten leihum a nunnak uh cu Khrih nunnak bang a hih hangin mah ngalhannak cu nei loli tuk hung hi.
18 Itnak sungah thinsuk launak umma hi. Cangkim itnakin thinsuk launak cu botik khawng hi. Mah hangin launak a nei mitei sungah itnak cangkim umma laih hi, itahim titale thinsuk launak cu dantatnak tuah a pehdunmi hi.
19 Pathian a itnak uh cu amah in, a it masak hangin hi.
20 Kua hei hihen Pathian it ing ti thah leng na pi in, a unau a huatu cu zolthu son hi. Itahim titale mit a muhmi, a unau hei a it ma tale muh theih ngawlmi Pathian cu it thei tukma hi.
21 Khrih i piakmi thukham cu hi tih bangin hi. Kua hei hihen Pathian a ittu cu a unau vang it bok tuk hi.