5
Leihum Nehtu Hung
1 Kua hei hihen, Jesuh cu Khrih hi tin, a umtu cu Pathian ca hi. Kua hei hihen Pa a ittu in, a cate vang it hi.
2 Pathian cate it hung hi tih a theihnak uh cu Pathian amah it in, a thupiakmite a zuinak uhin hi.
3 Itahim titale Pathian it hung a tih uh cu a thupiakmi zui hung tihnak hi. A thupiakmi cu ohtei ca in zui tuk haksa ma hi.Ref 5:3 Jn 14:15;
4 Itahim titale Pathian ca a himi hempoh ten hi leihum cu neh thei haw hi. Mahten a upnak uh hangin ohte cu leihum nehtu hi hung hi.
5 Leihum nehtute cu a kuate him? Jesuh cu Pathian Capa hi tin, a umtu hempoh cu leihum nehtute haw hi.
Jesuh Khrih Thu Theihpihtu
6 Jesuh Khrih cu tuiphumnak le thisan luangin thihnak tuah a hungmi hi. Tui tuah bekin hungmi hi ngawlin tui le thisan tuah a hungmi hi. Hitih bang a hunnak cu a dikmi loli hi tin Hawvangin theihpih hi; itahim titale Hawvang cu thutak hi.
7 Theihpihtu pa thum um haw hi:
8 Hawvang, tui le thisan hi haw in, a pa thum haw in, a theihmi haw thu cu pa khat hi.
9 Mihing tei thu theihpihmi cu um hung hi. Mahten Pathian i theihpihmi cu thupi saw laih hi. A Capa i thu a theihpihmi cu amah loli in langtik zo hi.
10 Mah hangin kua hei hihen Pathian Capa a umtu in ama lungmu sungah theihnak nei hi; mahnaven Pathian a umngawltu in, Pa in, a Capa thu a hilhmi a up ngawl hangin, Pathian khi zolthu sontik hi.
11 Mahten a theihtikmi cu hitih bangin hi. Pathian in kumkhua nunnak cu pia zo in, mah nunnak cu a Capa i sungah um hi.Ref 5:11 Jn 3:36;
12 Kua hei hihen Capa a neitu cu nunnak nei hi. Pathian Capa a nei ngawltu cu nunnak nei ma hi.
Kumkhua Nunnak
13 Pathian Capa a umtu ten kumkhua nunnak nei hung tih na theih theihnak tukin hi laikuat hi nangmu nelah ngan ing.
14 Kohte cu Pathian mai ah ngalhannak nei ung hi. Itahim titale ama deihnak tuah a ngen uh tale, a nget uhmi theihsak khawng hi tihmi theiciang ung hi.
15 Ama nelah a nget uh sial ten theihsak hi. Mahten theihpih hi tih a theih uh hangin a nget uhmi hempoh pia hi tihvang thei hung hi.
16 Na unau uh pa kha khatin, thihpihtak ngawlmi sualnak a bawl na mu tale Pathian nelah thunget sak inna, Pathian in luatnak pia tuk hi. Himi cu thihpihtak ngawlmi sualnak a bawltu tei ca in hi. Mahnaven thihpihtak sualnak umin, mahmi a bawltu tei ca in, Pathian nelah thunget sak un ti mang hi.
17 Bawl sualmi na hempoh hi sualnak hi. Mahnaven sualnak hempoh hi thihpih tak sualnak kha ma hi.
18 Pathian cate cu sualnak bawl leleng ma hi tih thei hung hi. Itahim titale Pathian Capa in hupin, Satan in siatsuah thei ma hi.
19 Leihum buppi cu Satan in uk naven ohte cu Pathian ta hung hi tih thei hung.
20 Pathian Capa hungsukin, ohtei nelah theihnak pia zo tih theih hung hi. Amah cu thuman tih thei hung a, ohte cu thuman sungah um hung hi. A Capa Jesuh Khrih sungah hei um hung hi. Himi hi kumkhua nunnak thuman hi.
21 Ka cate aw, milimte bia kha tuk ngawlin cingcaizet un hi.