3
Pathian i Cate
1 Pathian, ohtei Pa i a ihdan hi ngaisung teh un! A ihnak cu nase ngangai in, Pathian cate tin sammi hung hi. Mahtin a tih bangin hi ngangai hung hi. Mah hangin hi leipi in ohte a theih ngawlnak cu! Pathian hei thei haw ma hi.Ref 3:1 Jn 1:12;
2 Ka ihmite aw, atu-in Pathian cate hi zo hung hi; mahnaven iti bang tuk laih kam hung tih cu ciang ma laih hi. Khrih a hunsuk ten amah bang tuk hung hi tih cu thei hung hi. Itahim titale ama hihnak bang loli in mu tuk hung hi.
3 Kua hei hihen Khrih sungah hitih bang muansannak a neitu cu Khrih a thianthoh bangin amah le mah cu thiangthono in, a cingkhawi cop hi.
4 Kua hei hihen a sualtu cu Pathian i daan pahbal hi. Itahim titale sual tihmi cu daan pahbal khi hi.
5 Khrih cu mihing tei sualnak thiangtik tukin hung hi tih cu thei uh ci a, a sungah sualnak umma hi.Ref 3:5 Jn 1:29;
6 Mah hangin Khrih sungah a ummi hempoh ten sualnak bawlleh haw ma toh hi. Sualnak a bawl lelengtu cu Khrih amu awng ngawltute haw hi.
7 Ka cate aw, kuamah in zol haw pahsuh hen, Khrih cu a dikcangmi a hih bang bokin, kua hei hihen diknak a bawltu hempoh cu midikcang hi bok haw hi.
8 Kua hei hihen sualnak a bawl lelengtu cu Satan ta hi. Itahim titale Satan cu a pat pepan sualnak a bawltu hi. Pathian Capa a hunnak cu Satan nadehnak siatsuah khawng tukin hi.
9 Kua hei hihen Pathian ca a himi in sualnak bawl leleng ma hi. Itahim titale Pathian nundan cu a sungah um hi. Pathian cu a Pa a hih hangin sualnak bawl leleng thei ma hi.
10 Pathian cate le Satan cate a dangdunnakbel cu hi bangin hi; a dikmi a bawl ngawltu le a unau a it ngawltu cu Pathian cate kha ma hi.
11 A pat pepan na zak leleng uhmi thu cu, “Pa khat le pa khat itdun un,” tih hi.Ref 3:11 Jn 13:34;
12 Kain bang hi kha pahsuh un; amah cu Satan i ca ah cangin, a nau Abel that hi. Ita Kain in Abel cu that him? Itahim titale a bawlmi khialin, a naupa i bawlmi cu a dik hangin hi.Ref 3:12 Pian 4:8;
13 Mah hangin u le naute, leihum miten a hua haw tale lamdangsa pahsuh un.
14 Ohte cu thihnak zamsanin, nunnak sungah tum zo hung; tih thei hung hi. Mahtibang a theihnak uh cu a unau uhte a ih uh hangin hi; itnak a nei ngawltu cu thihnak sungah a tang hih laihmi hi.Ref 3:14 Jn 5:24;
15 A unau a huatu cu mithat hi, mi thattu sungah kumkhua nunnak umma, tih cu thei uh ci.
16 Itnak ngangai iti bang him tih a theihnak uh cu hitih bangin hi. Khrih in eimu ca in, a nunnak pia hi; mahti bang bokin ohte vangin a nunnak uh hi a unau tei ca in, a pia bok tuk mite hung hi.
17 Mihau pa khatin, a tingsammi a unau khi mu leng naven simsial ngawlin a um tale Pathian it ing tin iti bang ti thei tuk him?
18 Ka cate aw, a itnak uh hi kam tuah bekin ih tuk kha ma hi. Itnak ngangai cu dehnak tuah lang tuk hi.
Pathian Mai Ah Ngalhannak
19 Mah hangin thutak sungah um hung hi tih a theihnak tuk uh le a lungmu uhin ohte a mawhsiat ten Pathian mai ah lungmuangno in, a umnak tuk uh cu hi bangin hi.
20 Pathian cu a lungmu uh sangin ngeng saw ngangai in, ihempoh theitu vang hi, tih thei hung hi.
21 Mah hangin ka ih mite aw, a thin sung uhin, a mawhsiat ma tale Pathian mai ah ngalhannak nei hung hi.
22 Ama lak pen a nget uhmi hempoh ngah hung hi. Itahim titale a thupiakmi zui in, a deihmi a bawl uh hangin hi.
23 Thu a piakmi cu Khrih i thupiakmi bangin, a Capa Jesuh Khrih umin, pa khat le pa khat a ihdun theihnak tukin hi.Ref 3:23 Jn 13:34; 15:12, 17;
24 Pathian thupiakmi a zuitu hempoh cu Pathian tuah umkawmin, Pathian vangin amu lakah um bok hi. Pathian i piakmi Hawvang hangin Pathian cu eimuh tuah umkawm tih thei hung hi.