2
Khrih Cu Bawmtu
1 Ka cate aw, sualnak na bawl ngawlnak tuk uhin hilai hi nangmuh tei lakah ngan ing. Mahnaven pa kha khatin sualnak a bawl tale, a dikcangmi Jesuh Khrih, eimu ai-awhin Pa Pathian nelah thu a hilhsak theitu nei hung hi.
2 Jesuh Khrih amah hangin a sualnakte uh ngaidam hi, eimu sualnak bek hi ngawlin mi hempoh tei sualnak vang ngaidam hi.
3 Pathian i thupiakmi a zui uh tale amah a theitute hung tih ciang hi.
4 Mi pa kha khatin, Pathian thei ing tin tituk naven a thupiakmi a zui ma tale zolthusonin, a sungah thutak umma hi.
5 Mahnaven Pathian thu a zuitu cu a sungah Pathian itnak cangkimin um tihnak hi. Pathian tuah pehzomdunnak nei hung hi tih a theihciangnak tuk uh cu hitih bangin hi.
6 A kuakua hei hihen Pathian tuah pawlkomnak nei ing a titu in, Jesuh Khrih bangin nung tuk hi.
Thupiak Thak
7 Ka ihmite aw, nangmu lak a, ka ngatmi thupiaknak hi a thak hi kha ma hi; a tung pepan na neih uhmi thupiaknak lun khi hi. Mah thupiak lun cu na theihsa uhmi thu hi.Ref 2:7 Jn 13:34;
8 Mahnaven atu nangmu lak a, ka ngatmi thupiaknak hi thupiaknak thak hi. Itahim titale hi thupiak cu thutak hi tihmi Khrih sung le nangmu sung pen muh theih hi; Itahim titale khuathim cu pai vawk pepel a, vaknak tatak cu lang zo hi.
9 A kuakua hei hihen vaknak sungah um ing, a ti vangin a u le nau a huatu cu khuathim sungah umlaih hi.
10 A kuakua hei hihen a unau a ittu cu vaknak sungah umin, midang sualtiknakb 2:10 Midang sualtik tihmi hi amah sualtik tihvang hi thei. a sungah imah umma hi.
11 Mahnaven a unau a huatu cu khuathim sungah a ummi hi; khuathim sungah vakvai in khuathimnakin, a mit a cawtik hangin ilai lam zuan hing ngim tih hei thei ma hi.
12 Ka cate aw, Khrih hangin na sualnak uh cu ngaihdam a hih zo hangin hi laikuat hi nangmu lakah ngan ing.
13 Pate aw, a pat pepan a um zo mi, na theih uh hangin hi laikuat hi nangmu lakah ngan ing. Khangnote aw, Satan na neh theih uh hangin hih laikuat hi nangmu lakah ngan ing.
14 Ka cate aw, Pa Pathian na theih uh hangin hi laikuat hi nangmu lakah ngan ing. Pate aw, a pat pepan a um zo mi na theih uh hangin hi laikuat hi nangmu lakah ngan ing. Khangnote aw mi ngil na hih uh hangin hi laikuat hi nangmu lakah ngan ing. Pathian thu na sung uhah umin, Satan vang neh zo uh ci.
15 Hi leihum le a sung a nate hi deih pahsuh un; hi leihum na deih uh tale Pathian itnak nei ma uh ci.
16 Leihum i na hempoh sualnak tisa i deihmi mihing tei muhmi le deihmi na, mihing tei ultung tuangkhawnnak hempoh hi pa khatno hei Pa i lak pen a hungmi kha ma hi. A venghawng haw in, lei pen a hungmi ngeh hi.
17 Leipi le a sung ummi na le mihing tei a deih tutun haw mite thamthong pepel zo hi. Mahnaven Pathian deihnak a bawltu cu kumkhua nung tuk hi.
Khrih i Ngal
18 Ka cate aw, hun dawlbel nai zo! Khrih i ngal hung tuk tih thei uh ci; atu-in Khrih i ngal tampi lang zo hi; mah hangin dawltabel hun nai zo tih thei hung hi.
19 Hite hi eimu mi ngangai a hih haw ngawl hangin taisan haw hi. Eimu sung a telmi tatak ahi haw tale pawlkom leleng haw tuk hi. Hitih bangin a tul sannak haw cu a muhte eimu pawl sung a, mihing ngangai hi haw ma hi tih langtik hi.
20 Mahnaven nohte cu Khrih in Hawvang thiangtho a buak zo hangin na venghawng uhin thutak theitu hi uh ci.
21 Nangmu lak a, laikuat ka ngatmi hi thutak na theih uh ngawl hang hi kha ma hi; thutak thei in, zolthu cu thutak pen hung awng ma hi tihvang na theih uh hangin hi saw hi.
22 Mah ahi tale, akua him zolthu sontu; Jesuh cu Khrih kha ma hi, a titu hempoh cu zolthu sontu hi; mahpa cu Khrih i ngalpa hi in, Pa le Capa a nialtu vang hi.
23 Itahim titale Capa a nialtu cu Pa vang nial bok hi. A kuakua hei hihen Capa a umtu cu Pa vang um bok tuk hi.
24 Mah hangin, a pat pepan na zak uhmi thu cu nangmu lungmu sungah komzetno in koih unna, pha zetin, na kem uh tale Pa le Capa tuah a pawlkomdun lelengmi hi tuk uh ci.
25 Mah kumkhua nunnak cu Khrih amah loli i thutiammi hi.
26 Nangmuh a zolnuam litu tei thu hangin hilai hi kuat ing.
27 Nohte cu Khrih in, nangmu humah a Hawvang a buak zo hangin mah a Hawvang cu nangmu sungah a um sungin midang tei zilh lih kulma toh uh ci. Itahim titale a Hawvangin ihempoh hilhin, a hilhmi cu zolthu kha ma, thuman hi; mah hangin Hawvang i zilhmi cu zui unna, Khrih tuah pehzomdun lelengin um un.
28 Mahzuh hi, ka cate aw amah tuah na pehzomdunnak uhah kho leleng un hi. Amah a hun ten ngalhannak tuah dim tuk hung a, a hen Ni ten zakca in ngelh lih kul tukma hi.
29 Khrih cu dikcang hi tih thei leng uh ci. Mah hangin akua hei hihen a dikmi a bawltu cu Pathian cate hi tih thei tuk uh ci.