JOHAN
Laikuat Vei Khatnak
(The First Letter of John)
Thulamsial
Johan laikuat vei khatnak in muibatmi pa nih nei hi. A pa khatnak cu laisialtu khi Pathian le a capa Jesuh Khrih tuah pawlkomnak nei in, a nun theihnak haw tukin sosuah hi. A pa nihnak cu mah pawlkomnak a siatik theitu zilhnak man ngawlte a um haw hangin ngallinnak tuk hilh hi. Mah zilhnak man ngawl cu ikaw titale; hi leihum i phatngawlnak lei tisa neitu hung a, leihum tuah a pehdunmi a hih uh hangin a hengmi hi. Mah hangin Pathian Capa Jesuh Khrih cu leimi bangin tisa ngangai nei ma hi, tin zilh haw hi. Nunpatnak tihmi cu hi leihum nunnak thu le la ah sehelhnak a neih uhmi pen luat khi hi, ti haw hi. Nunpatnak tihmi cu mipha le pha ngawl tihmi tuah sengkhadun ngawlin; midangte it le it ngawl tihte tuah vang sengdun kha ma, ti haw hi.
Hitih bang zilhnak dik ngawl a elnakin, laingantu pa i zilhmi cu Jesuh Khrih cu mihing tatak hi, Jesuh a umtu le Pathian a ittu ten pa khat le pa khat itdun haw tuk hi, tih hi thupi zetin hilh hi.
1
Nunnak Thu
1 A pat pepan a um sami nunnak Thu cu nangmu lakah lai tuah ngan ing. Mah thu cu za ung a, mit tuah ka muh cilcel uhmi le khut tuah ka zen uhmi loli hi.Ref 1:1 Jn 1:1;
2 Hi nunnak cu muhtheihin, a cansuak ten oh ten mu hung hi. Mah hangin mah thu cu nangmuh tei lakah son ung a, Pa tuah a ummi kumkhua nunnak, keimu tei lakah a theihtikmi Thu khi nangmu lakah hilh ung hi.Ref 1:2 Jn 1:14;
3 Pa le a Capa Jesuh Khrih tuah pawlkomnak a neih uhmi sungah na tel theihnak tuk uhin ka muh uhmi le ka zak uhmi cu nangmuh tei lakah phuang ung hi.
4 Ka lungdamnak uh kim hen tin, hilai hi nangmuh tei lakah ngan ung hi.
Pathian Cu Vaaknak Hi
5 A Capa i lak pen a theih uhmi thu le nangmu lakah ka phuan uhmi cu hi thu hihi; Pathian cu vaknak hi, a sungah thimnak umma hi.
6 Mah hangin amah tuah pawlkomnak nei hung ti thah lengin, thimnak sungah a um uh tale, a ot dan uh hihen, a deh dan uh hihen zolthu son hung hi.
7 Mahnaven amah cu vaknak sungah a um bangin, eimuhte vang vaknak sungah a um uh tale pa khat le pa khat pawlkomnak nei in, a Capa Jesuh Khrih i thisanin, a sualnak uh hempoh thiangtik zo hi.
8 Sualnak nei ma ung a ti uh tale eimuh le eimuh a zoldun copin a sung uhah thutak umma hi.
9 Mahnaven Pathian nelah a sualnak uh a phuang uh tale amah cu muantak le a dikmi a hih bangin a khelhnak uhte zah tuk a, a sualnak uh hempoh thiangtik tuk hi.
10 Mahnaven sualnak bawl ma ung a ti uh tale Pathian cu zolthusonin cangtik hung a, a thu cu ohtei sungah umma hi.