3
Topa Hungleh Tukin Thutiam
1 Ka ih mite, himi hi nangmu lak a, ka kuatmi a vei nihnak lai hi. Ka laikuat a vei nih mahin, ka tuptahmi cu nangmuh tei lungmu sungah ngaihsutnak thiang um pan hen tih theilehtik nuam ing.
2 Nidang laihin, profet thiangtho tei a hilhsa mi le Nunpantu Topa i thupiakmi a hilh salawn tukin tiikmi tei thuphuan mite khi cing leleng un tih hi ka deihmi hi.
3 A masabelin, na theih tuk uhmi cu hun dawlbel ni ten amu tisa nopnak i ukmite in suak haw tuk hi. Mahten zawnsakin,Ref 3:3 Jud 18;
4 “Khrih in hungleh tung hi tin thutiamta hi ma maw? Atu-in i lai ah um kaw? A pu le pa uhte cu a thihnak haw ngeizet zo hi. Mahnaven leipi a semsuah pat pepan a tutianin ihempoh amu dan bang leleng haw hi!” tin ti haw tuk hi.
5 Ni dang laih cawngin Pathian in, a thu in lei le van semsuah hi, tih thei haw naven a thei ngawl bangin um haw tuk hi. Leipi cu tui sung pen semsuahmi hi a, tui tuah bawlmi hi.Ref 3:5 Pian 1:6-9;
6 Mahten tui leleng, tuihautungin leipi lun cu siatsuahta hi.Ref 3:6 Pian 7:11;
7 Mahnaven atu a ummi van le lei pi hi mei tuah siatsuah tukin, Pathian i thupiaknak lelengin, a khawih hihmi haw hi. Pathian a zawnsaktute cu thu a khen ni le siatnak a tawh haw tuk ni ca in khawih hihmi hi haw hi.
8 Ka ihmite thu pa khat hi phawkngil pahsuh un, Topa i zohdanin, ni khat cu kum thawng khat bangin le ni thawng khat cu ni khat bangin, ama mai ah bangve haw hi.Ref 3:8 Saam 90:4;
9 Topa cu a thutepmi kimtik tukin a zuancum hi, tin mi khenkhat ten a ngaisung haw hei in, a zuancum hi kha ma hi, nangmu humah thinsaunak a neih hang hi saw hi, itahim titale pa khatno hei siatnak tawk ngawlno in, mi hempoh a sualnak haw pen a kihleh theihnak haw tuk a deih hangin hi.
10 Mahnaven Topa i Ni cu phawhkhak ngawl pi in, nguca bangin heng tuk hi, mah ni ten van cu thum dudumin, paithong haw tuk a, van a ummi ni le aksi le hade vang kangin, sia khawng haw tuk hi, mahten leipi hum a ummi na hempoh pai khawng tuk hi.Ref 3:10 Mt 24:43; Lk 12:39; 1Thes 5:2; Mang 16:15;
11 Hitih bangin ihempoh a siat khawng tuk hangin na nunnak uh cu a thiangthomi, Pathian nelah piak tukmi hihen hi.
12 Vante cu mei in, a kang khawng ni le van a ummi hempoh meiling tuah a kangtuitik khawng ni cu hengpal nawnawm tahen tin, Pathian Ni na ngah lih uh laih takin nun thiangtho nei in, a phabelin nung tukin zuam un hi.
13 Mahnaven ohte cu Pathian i tepmi diknak umnak mun, van thak le lei thak ngak hung hi.Ref 3:13 Isa 65:17; 66:22; Mang 21:1;
14 Mah hangin ka ih mite mah Ni na ngak lih uh laihin, Pathian mai ah sualnak nei ngawl le a thiangmi hi tukin zuam unna, amah tuah a lemdunmi hi un.
15 A ihmi a unau uh Paul in, Pathian i piakmi cihnak tuah amuh tei lakah a ngatmi laikuat sung a um bangin Topa in eimuh tei hum a, thinsaunak a neihmi cu eimu nunpan tuk a deih hangin hi tin ngaisung un.
16 Laikuat a ngatmi hempoh sungah, hi thu le la a telnak mun hempoh ah mah ti bangin ngan mek hi. A lai kuatmi sungah thu le la khenkhat a ngatmi cu theih hakmi a hih hangin misil le lungmu kho ngawl ten, Lai Thiangtho a cang dadang tei sullam hilhciang dan a sual haw bang bokin a ping le pengin, hilh haw hi. Mahten amu humah siatnak hengtik cawm haw hi.
17 Mahnaven ka ih mite aw, nangmu ca in hi mi hi na theihsa uhmi hi. Mah hangin ngalling zetin um un, nohte daan nei ngawl tei pui sual ngawlnak tukin le himno in nangmu umnak mun pen na cak khak ngawlnak tuk uhin cingcai zetin um un.
18 Ohtei Topa le nunpantu Jesuh Khrih hehpihnak le amah theihnak sungah khangto sesemta un. Ama lakah sunloihnak cu atu le kumkhua in um leleng tahen! Amen.