59
Mipi Sualnak Cu Profet In Siatson
1 Topa cu nangmuh pantu tukin va ngawl tin, ngaisung pahsuh un. Bopnak ngenin, na aunak uh thei tuk ngawl tianin, a bengbul ma hi.
2 Na sualnak uh i hangin thei ngawl le za ngawl hi saw hi. Amah biak tuk na tuptah uhten Pathian tuah nangmuh a khentu cu nangmu sualnak hi.
3 Zolthusonin thisan luangtik uh ci. Mi that uh ci; sual loli uh ci.
4 Thukhennak mun na hawh uhten diknak cu nangmu lamah umma hi. A neh nuamin zolthu saw muansan uh ci. Mite natik tuk nuamnak lungmu na neih uhmi cu dek suak loli uh ci.
5-6 Thusia bawl tuk tupnak na neih uhmi cu ngu nei ngulpi i tui bang hi. Pa khat vatkehin, na siatsuah thei uh vangin a dang pa khat tul leleu tuk hi. Mahnaven na tuptahnak uh cu noh ca in nemcuamnak imah nei ma hi. Maimomzang i bawlmi puan bang thong hi imah nemcuam ma.
7 A pha ngawlmi tuptahnak lungmu nei leleng uh ci a, mahmi dek suak tukin napzet uh ci! Sualnak nei ngawlte thahnak tukin zuancum awng ma uh ci. Na hawhnak hempoh uhah siatsuahnak le phat ngawlnak bek hengtik uh ci.Ref 59:7-8 Rom 3:15-17;
8 Na elkim uh a mihingte kuamah a himdam um haw ma hi. Na thil bawlmi hempoh uh cu a pha ngawlmi ngeh hi. Na hawhnak lampi uh cu kawiki in, mah lampi a zuitu hempoh ten lungnopnak mu hihim haw tukma hi.
Mipi Ten Sualsik Haw
9 Mipi ten, Itakaw Pathian in eimuh siatsuahtu tei khut pen a pat ngawl tih cu thei ngah zo hung. A hawhnak uh lampi vaktiktu tukin vaknak hi nave hung, thimnak bek umin,
10 mitcaw bangin vak hung. Sun ni vak naven, zan khuathim le mithi ngam khuathim mun bangin bahin lum hung.
11 Lauthawngnak tuah dimin, vancaukapin um hung. Bawlsiatnak le siatsuahnak lak pen pantu tukin Pathian kin zetmi nave hung kin man umma.
12 “Maw Topa na hum a ka sualnak uh tam ngangai. Ka sualnak uhin mawhsiat hi. Ka sualnak uh cu theicel khawng ung.
13 Nangmah do in, kik ung. Zui nap ma ung. Midangte bawlsia in, na humah langpang ung. Ka ngaihsutnak uh camcawi thei ma, ka ot uhmi vang zolthu ngeh.
14 Diknak cu hawlvawkin, thudikin nekleh thei ma toh. Mipi pumkhawmnak munah thutak cu bahin, dikcangnak ca in mun tong ma toh
15 Phatnak a dem leita hangin thilsia a bawl ngawltu cu in siatsuahnak tawk haw hi.”
Topa In A Mite Bawm Tum
Hihi cu Topa in, mu zo in diknak a um thei ngawl toh hangin a lungdam thawthong ma hi.
16 Nuainep mite bawmtu tukin kuamah um haw ngawl amuh ten amzet hi, mah hangin ama cahnak huham cu mang tuk a, nehtu hi tuk hi.Ref 59:16 Isa 63:5;
17 Diknak cu ngaldonak thik lumphaw bangin delh tuk a, nehnak cu thik lukhu bangin khu tuk hi. Bawlsiatnak thuaktu tei ai-in, phu laknak le dantat piaknak, dik ngawlmi dik tukin bawl nuamnak lungmu cu puan bangin khuh tuk hi.Ref 59:17 Efe 6:14, 17; 1Thes 5:8;
18 A ngalte cu ngam khawla ah a um haw hei in, a bawl sualnak haw bangin bawlsia tuk hi.
19 Nisuahnak pen ni tumnak tian mi hempoh ten amah le a huham cu lau haw tuk hi. Tui lun le huihpi bangin amah cu hung tuk hi.
20 Topa in, a mitei lakah, “Na sualnak uh pen a kiklehtu hempoh pan tukin, Jerusalem ah hung tung.Ref 59:20 Rom 11:26;
21 Nangmuh tuah thutepnak bawl ing: Ka huham le ka thuhilhnakte pia ing; tu pepan zui unna, nangmu khan, na ca tei khan le casuan tei khanah hei hihen, ka thu ngai tukin zilh leleng un,” ti hi.