58
A Manmi An Cannak
1 Topa in, “Nging zetin au un hi! Na aw neih hempoh uh tuah au un! Israel ka mihing tei lakah a sualdan haw hilh un.
2 A nisial bia in, ka dan zui in le a manmi bawl hengin ngaisung li haw hi. Amuhte thupha pia tukin le danpha pia tukin ngen haw,” ti hi.
3 Mipi ten, “ Topa in amu kha ngawl ahin, an a can lih uh hi i nemcuam heng? Imah a sumsialma tale itakaw an cangin, a thuak nuam lih uh?” tin dong haw hi.
Topa in amu lakah, a manno in, a son uh tale, an cannak cu nangmu deihmi zeinakin le na nadektute uh bawlsiatnakin mang uh ci.
4 Mi thi nai suahtik lau ma uh ci; sualdunin haudun si uh si. Hi bangin na an cannak uh i hangin na thungetnak uh a ngai tuk hengin maw na ngaihsut uh?
5 An na can uhten haksatnak piadun thong uh ci; Hampa kung bangin lu kun buabuai uh ci; na zaunak uhah thangkhau dip le vut phah uh ci. Mah cu maw ancang ung na tih uh? Mah humah ka lungdam tuk heng bawl uh cim?
6 “Kei i deihmi an cannak cu hi bangin hi. Thik taicin bangin na mi bawlsiatnak uh le kolhak bangin mi a delhtu a man ngawlin mi na bawlsiatnak uhte vawk khawng le uh ci, na bawlsiat uhte suakca haw toh hen.
7 Na tui le an uhte cu ngilkial mite tuah kawmin, na inn uh vang inn nei ngawl mi ca-ngah tei ca in, hong un. Puansilh tuk nei ngawlmi tei lakah puan pia unna, na u naupih uhte bop tuk phawk kha ngawlin um pahsuh un hi.Ref 58:7 Mt 25:35-36;
8 Mahten ka vaknak cu nangmu humah zinglam nisuak bangin vak tuk a, na meima uh vang manlang zetin dam tuk hi. Nangmu lakah um leleng tung a, pan tung hi.
9 Thu na nget uhten pia tung a, na sam uhten donleh tung hi.
“Mi na bawlsiatnak uhte vawk khawngin, mi na zotsaknak uh le na awn pha ngawl uh na botik bek uh hei tham ngawlin,
10 ngilkialte an pia in, a nei ngawlte a kulnak haw na pia uh tale nangmuh a kimtu khuathim cu sun ni vakin cang tuk hi.
11 Lamhuai leleng tung a, leihum na pha tuah dimtik tung hi. Damtik tung a, ngiltik tung. Tui a tam zetmi huandum bangin le a kang awng ngawlmi tuinak bang tuk uh ci.
12 A sia khawngmi le buakvawkin, a cang zo mi cu na mihing uhten a bul lun humah phutleh haw tuk hi. A cimsa mi a lemlehtu le a sia khawng sa mi salehtu tin theih lelengmi hi tuk uh ci,” ti hi.
Sabbath Ni Cannak
13 Topa in, “Sabbath ni cu ni zehsahah bawlin, nangmu deihmi zeinak ni-in mang ngawlin, mah ni ten khualzin ngawlin, nadek ngawlin le awn hahzau thong ngawlin um un hi. Ka ni hi thiangthotikin, na sunglawitik uh tale,
14 keima na nadehnak sung uh pen a tulmi lungdamnak cu co tuk uh ci. Leihum buppi ah mi i upatmi in bawl tung hi. Na pu uh Jakob lakah ka piakmi ngam cu lungdam thatui zetin luahtum tuk uh ci. Topa keimah in hilh zo toh ing,” ti hi.