57
Israel Milim Biakinn Siatsonnak
1 Mipha cu thi haw naven kuamah in theihpih cuam ngawlin simsial kha haw ma. Mahnaven a thih haw ten siat theihnak thuak ngawlnak munah heng haw hi.
2 Ziaza pha a neitu cu lungnopnak ngahin, a thih haw ten colhnak ngah haw hi.
3 Misualte, na thu uh khen tukin hilai ah hung un hi. Mipolte, pasal ang sung pen lungmu dang nei le numei pha ngawlte sangin pha saw cuang ma uh ci.
4 Akuabel kaw nuihsuak bawlnakin, na man lihbel uh cu? Na kam uh ka pempumin, melsiat phenin, na bawl lih cu akuabel khi kaw?
5 Lei ngam phatiktu pathian dang bia hung tin, zehsah thingkung nuai ah nupa sualnak bawl uh ci. Lui el suangholte ah na ca uhte cu biakpiaknakin pia uh ci.
6 Mahlai a, ummi suangmamte cu la in, pathian dang tin bia uh ci! Mah suang ca in sabittui sungin, pia lalaih uh ci. Cangho vam biakpiaknak vang pia uh ci. Ka lungdam tuk hengin ngaisung uh cim?
7 Mual sang humah biakpiaknak pia tukin hawh uh ci a, nupa sualnak bawl tumsial uh ci.
8 A thacang bekin, a ummi na milim uhte cu na inn mai uh a, kongka limah koih den uh ci! Kei cu zam uh ci, na puan uhte dukin, na zaupih tukin sum thapin na mi ngaih uhte tuah zaunak zalpi humah zau uh ci. Mahlai ah na tisa nopnak uh thincim zetin bawl uh ci.
9 Na zimui uhte noihin, na sathau uhte thihsak dunin le Molek dawih bia tukin hawh uh ci. Biak tuk pathian dang zei tukin leihum khua le ngam hempoh ah mi hahin, mithi khua tian hah uh ci.
10 Ngam khawlazetah khual na zin uh hei in, thakiam awng ma uh ci. Zahcak nei ngawl na milim uhten ngilnak pia hi tin, na ngaihsut uh hangin a cawl hei cawl thei ma uh ci.
11 Topa in, “Na lungmu sung uhah launak a piangtiktu hi dawihte hi, a kuate kaw?” Mahti bangin na lau uh hangin, ka lakah zolthusonin kei cu phawkngil bikbek uh ci! Cingdenno in ka umden hangin maw kei na upatleh uh ngawl?
12 Ka bawl uhmi hi man poh tin maw na ngaih uh? Ngaisung nuam pahsuh un. Na bawl uhmi hi phuang khawng tung a, na milim uhten nohte hup thei tukma hi.
13 Bopnak ngenin, na au lih uhten na milim uhten bawm haw tahen, Vei khat huihtheu in, mutvawk khawng tuk hi. Mahnaven kei a muang mite cu ngam sungah um haw tuk a, ka Biakinn sung pen keimah bia haw tuk,” ti hi.
Pathian i Bopnak le Damtiknak
14 Topa in, ka mite cu ka lakah kikleh haw hen. A lampi hawah a khaktu hempoh cu vawk khawng un. Lampi bawl khawng unna, man theihsa hialin koih un hi!
15 Keimah cu kumkhua a nungmi Pathian, a sangmi le a thiangtho Pathian ing. A sang le a thiangthomi humah um ing; mahnaven niamkhiatnak le sihkiknak na neih lehnak tukin lungkham mi le lungnem mi lak hei ah um ing.
16 Ka mitei lakah nunnak pia naveng siatson ngawlin a hum hawah kumkhua in ka thinuk tuk mang.
17 A sualnak le a hampumnak haw hangin a hum hawah ka thinuk ing a, dantatin, nunghek ing. Mahti bang hei ten a lungmu haw khohin, amu deihnak lampi ah zui leleng thei nawm haw laih hi.
18 “A thil bawldan haw vang mu leng naveng damtik tung, pui tung a, bawm tung; thinkham lungsia mite cu nem tung.
19 Khawlapi ah a ummi hihen, naino ah ummi hihen, a venghawng haw i humah lemdaihnak pia ing. Ka mihingte cu damtik tung hi.Ref 57:19 Efe 2:17;
20 Mahnaven mipha ngawlte cu, a cawl awng ngawlmi tuicawkin cinciak le buak a tulpih lelengtu tuipi bang haw hi.
21 Misual tei ca in humhimnak umma,” ti hi.Ref 57:21 Isa 48:22;