41
Pathian In Israel Thutiam
1 Pathian in, khawlapi
a ummi ngamte,
Daidenno in um unna,
ka sonmi hi ngai hem un!
Thukhennak mai ah na thu uh
hunpih hem un.
Na thu uh sonnak hun ngah tuk uh ci.
Hung unna akua kaw,
a dik tih ngaisung khawm ten nung.
2 Mi hempoh nehin nisuahnak lam pen
a puitultu akua kaw?
A hawhnak hempoh ah akua in kaw
nehnak a pia?
Miphun tampi le kumpi tampi humah
akua in kaw nehtu a hitik?
A nehmite cu leivul bangin
a ngalnam tuah satvawk!
Cang kungko cu huihin,
a muhvawk bangin,
A thalcangin khen khektik khawng!
3 A nung haw pen hilin,
himdamno in hawh ngut haw!
Lei hei tawng kha man ngawl
tihthamin manlang hi.
4 Hi bangin a ngaisungtu cu
akua hum?
Leihum tangthu ah cang tukin
a tumtu cu akua hum?
Topa keimah cu
a pattungin um zo toh ing.
Topa Pathian keimah cu
a tawpnakah hei in
um tung hi.
5 Lam khawlapi ngam ten,
ka thil bawlmi cu
mu zo haw hi;
Lau mahtakin thinsu in
can haw hi.
Mah hangin munkhatah
tawkdun khawm haw hi.
6 Khutzung thiamte cu bawmdunin,
pa khat le pa khat thapiadun
haw hi.
7 Lettama in sui sek thiam lakah,
‘Sui bawl thiamzet ci,’
tin ti.
Milim mam zetin, a zuttu in
thikpim tuah a kaikhawmtu cu
pak hi.
Mi pa khatin, “Na belhmi cu pha em,”
tin ti a,
khim zetin milim cu
a koihnak haw munah
8 Mahnaven nang Israel ka sila,
nang cu ka ten zo tohmi hi ci.
Ka ngual Abraham i casuante
hi uh ci.Ref 41:8 2Khang 20:7; James 2:23;
9 Leihum tawpnak pen pui ing;
Vanmawk deng pen sam ing a,
‘Nang cu ka sila ci,’ tin ti ing.
Nang lawl mang,
a teng saw ing.
10 Imah lau pahsun,
na lakah um ing.
Keimah cu na Pathian ing hi,
imah in lautik pahsuh hen.
Nangmah bawm tung a,
ngiltik tung;
Hup tung a, pan tung hi.
11 “Na hum a thinuktute cu
mualpho in, zahcak tawk
haw tuk hi.
Nangmah a dotute cu
thi haw tuk hi.
12 Catngawlin nangmah a dotute cu
leihum pen phathong khawng
ta haw tuk hi.
13 Keimah cu Topa
na Pathian ing hi;
Na tha ngiltik ing a,
‘Imah lau pahsun hi;
bawm tung hi.’ ”
14 Topa in, Israel nang cu
miphun neuno le thanem em hi ci.
Mahnaven imah lau pahsun,
keimah in bawm tung.
Israel i Pathian thiangtho
keimah cu nangmah
pantu pa ing.
15 Nangmah cu cang vahnak ngolh,
a thak, a hiammi ha nei bangin
bawl tung hi.
Mualsangte cilpek tuk ci a,
sia haw tuk;
Mualte vang leivulin
cang khawng haw tuk hi.
16 Vanah pikto tuk a,
huihin mutvawk tuk;
Huihsia in mun tihkimah
thehkeh khawng tuk hi.
Mahnaven keimah cu
na Pathian ka hih tak,
nang cu na lungdam tuk:
Israel i Pathian thiangtho cu
thangphat tuk ci.
17 “Ka mite lungbingin amthong haw tuk,
Dangko in, a dangdum haw ten,
Topa keimah in,
a thungetnak haw za tung;
Israel i Pathian keimah in
nunghek hihim tuk mang hi.
18 Mualkolh lak pen luituite put haw tuk,
Munlawn pen ciktui
thiangno luang tuk hi.
Phillawn cu ciktui in dimtik tung.
Ngamko cu ciktui luannakin
cangtik tung hi.
19 Phillawnah sidar thingkung
potik tung,
Thingha, Lemmui le olif thingte
potik tung.
Lenkolhah tupi umtik tung a,
mah tupi ah cakthing,
hual thing le caksan thing po tuk hi.
20 Mahmi cu mi in amuh haw ten,
Topa keima bawlmi
a hihlam thei haw tuk hi.
Israel i Pathian thiangtho in,
hi hempoh cu
cangtik hi tih thei haw tuk toh,”
ti hi.
Topa In Khuazingte Zuam
21 Israel kumpi Topa Pathian in;
miphun hempoh tei khuazingte,
Na thu la uhte cu son himpo
teh hem un!
Na thiam zah uhin son hem un!
22 Hilai ah hung unna,
thil a piang tukmi
hilh ham hem un;
Thil a piang zo tohmi tei
tihnuammi hilhciang hem un!
Mailam a, thil a piangmi
a um ten a tihnuammi a theih
theihnak tukin
Itih zawngin kim tuk hum tih
hilhciang hem un!
23 Mailam a heng tukmi thu la
hilh hem un;
pathian ngangai na hih uh
theiciang tuk ung hi.
Thilpha pa khat nih bek bawl un,
Mahma tale thihnak thu poimawh
hengtik hem un.
Launak le mulling hahin
dimtik hem un.
24 Nangmuh hihen,
na thil bawl uhmi hihen,
zolthu ngeh uh ci!
Nangmuh a biatute tale
ningdelhhuai ngeh haw sih hi.
25 “Nisuahnak lam a ummi
pa khat teng zo ing;
Saklam pen do tukin pui tung.
Mi uktute cu cinciak bangin
sikpek haw hi.
Beel bawltu pa i tungman
a sihpek bangin, sum sungah
huah niknek hi.
26 Hi thil piang tuk hi, tin,
a hilh ham theitu kua beek
um uh cim maw?
Dik ngai uh ci tih tukin
a kua beek um uh ci maw?
Mahti bang a awntu kuamah
umma si uh si;
kam khatno hei awn ma
si uh si,
Na awn uh a zatu pa khat hei
um haw ma si!
27 Keimah Topa cu
Zion lakah hi thuthang
a phuang masabeltu ing.
Jerusalem ah palai hah ing a,
‘Na mihingte hung li haw!
Innah pinleh haw tuk hi,’
tin ti ing.
28 Na pathian uhte ka zoh ten
pa khat hei in, awn haw ma si.
Ka thudotmi a don theitu
pa khat hei um haw ma si.
29 Hi khuazingte hi
phukthong ngeh haw hi.
A bawl theih haw mi imah umma.
A milimte hi thanem leita haw.
Huham nei ngawl
phukthong ngeh haw hi.”