40
Muansannak Awnkam
1 A Pathian uhin,
“Ka mite hehnem un,
hehnemta un!
2 Jerusalem khua mite
hanthawn un.
Ngeipi thuak zo haw a,
a sualnak haw cu
atu-in ngaihdam hi zo hi.
A sualnak haw hempoh hangin
cangkim zetin dantat zo ing,”
3 Aw nging pa khatin,
“ Topa ca tukin,
Ngamkhing lakah lampi
bawlham un.
A Pathian uh ca tukin
phillawnah lampi sial un!Ref 40:3 Mt 3:3; Mk 1:3; Jn 1:23;
4 Luam hempoh dip khawng unna,
mualsang hempoh
cek kaih khawng un.
Mualte cu munlawn bangin
cang haw tuk a,
lei bingbo hempoh camcawino in
lem khawng hi tuk hi.
5 Topa i sunloihnak cu
lang tuk a, mi hempoh ten
mu haw tuk hi.
Topa amah loli in
thutiam zo toh hi.” Ref 40:3-5 Lk 3:4-6;
6 Aw nging pa khatin,
“Tangau in!” ti hi. Ref 40:6-8 James 1:10-11; 1Pet 1:24-25;
“Ikaw ka aupih tuk?”
tin dong ing.
“Mihingte cu hampa bang haw a,
ngam lak pak sangin
ngei kho cuang haw ma hi.
7 Topa in, a hum hawah
huih a theutik ten,
hampa cu thimin pak cu ziam hi.
Mihingte cu hampa bangthong
haw poh hi.
8 Mahzuh hi, hampa cu thimin
pak cu ziam haw;
mahnaven a Pathian uh i awnkam cu
kho leleng,” ti hi.
9 Maw Jerusalem, mualsang humah
kai inna,
Thuthangpha cu aupihin hi.
Maw Zion, nging zetin
au inna, thuthangpha cu
hilhin hi!
Phuang tul inna, lau him pahsun.
Judah ngam khuapi tei lakah,
na Pathian uh hung li zo tin
hilhin ti hi.’
10 Ihempoh tithei Topa cu,
a thawm ngengnak huham tuah
mi uk tukin hung li zo,
a patsuah mite pui tuk hi.Ref 40:10 Isa 62:11; Mang 22:12;
11 Tuucing bangin a tuute cu
cingkhawi tuk hi;
tuuhonte cu hulawmin,
a angsungah cawi tuk,
a pi haw cu demhetno in
hawhpih tuk hi.Ref 40:11 Ezk 34:15; Jn 10:11;
Tehkip Theih Ngawlmi Pathian
12 Akua kaw tuipi thuanthum khi
a khut tuah suumin,
van khi a khap tuah a teh thei?
Akua kaw leihum a,
leivul khi a khuathai sungah
thun khawngin,
mualsang le mualniamte
cuai tuah a khai thei?
13 Akua kaw Topa lakah
hi bangin bawlin tin
a hilh thei?
Akua in kaw Topa cu
zilhin, ngaihsutnak a pia thei?Ref 40:13 Rom 11:34; 1Kor 2:16;
14 Pathian in: na hempoh
itih bangin bawl tuk tihmi
a theih zawhnak tuk le
a thiam theihnak tukin
akua thu kuppih kaw?
15 Topa mai ah miphun cu
imah haw ma;
tui cak khat hei kim haw ma hi.
Ngam khawlapi a, tuikulh cu,
leinoi cang khat bangin
zangzet haw hi.
16 Lebanon tupi sung a,
ngamsa hempoh cu,
a Pathian uh biakpiaknak tukin
tham haw ma,
thingkung hempoh cu,
meihal biakpiaknak
tuahthing tukin dem leita hi.
17 Leihum a, miphun hempoh cu
ama ca in imah ma haw hi.
18 Pathian cu akua tuah
tehkip thei kam nung?
Akua tuah bang hum tih cu,
itin kaw a sonciang
theih tuk uh?Ref 40:18-19 Nung 17:29;
19 Khutzung thiam tei bawlmi,
thik seekthiam tei
sui tuah huhmi le
ngunkuang sungah
a koih haw mi
milim bang kha ma hi.
20 Sui le ngun a nei zo ngawltu hei in,
a muat thei ngawl
thingcang teng haw hi.
Khutzung thiam pa khat zei in,
atu tuk ngawlmi thing milim suitik hi.
21 Thei ma uh cim?
ngeipi laih cawngin
hilh hamsa
hi ma uh cim?
Itin leipi piang tih cu za zo toh
ma uh cim?
22 Lei humlam le vanmawk deng a,
ummi a kumpi khunnakah
a khungtu pa in bawl hi.
A nuai a, mihingte cu,
a mitmuhah miksi tia in
neu haw hi.
Van khi puanzak bangin,
umnak tuk puanbuk bangin
zak hi.
23 Amah in, a ngilzet uktu haw cu
khiasukin, imah ngawlin
bawl khawng hi.
24 A muh cu zung saih laih ngawl,
a tawtsem, thingkungno
bang haw hi.
Topa in huih a theutik ten,
ko khawng haw a,
cang kungko bangin;
mutvawk hi.
25 A thiangtho Pathian cu
kua tuah kaw a tehkip
theih tuk uh?
amah a bangtu kuabek
um haw maw?
26 Van khi zoto hem un!
Na muh uhmi aksi a bawltu,
akua kaw?
aksi ngalkap hon bangin
a hotu in, izah kaw tih thei in,
a min haw tekin sam hi.
A thawmngengmi, a huham hangin,
pa khatno hei
lalthong haw ma hi.
27 Maw Israel,
“ Topa in,
ka haksatnak uh
theihsak ma,
thuman ngawlpi in
ka thuaknak uhte
ngaihsak nuam ma,” tin itakaw
na phukciak lih uh?
28 Thei ma uh cim?
Za awng ma uh cim?
Topa cu a kumkhua kho mi
Pathian hi in,
leihum hempoh bawltu hi.
Amah cu cawlin,
cimkhamin
um awng ma hi;
a ngaihsutnak cu kuamah in
thei baan haw ma hi.
29 A cim le a cawlmi cak lehtik hi!
30 Khangnote hei cimin
cawl haw tuk a,
Tangval hei tha bo haw tuk hi.
31 Mahnaven Topa
a muangtute cu
a tha haw cak lehtikin,
Muvanlai bangin ha khengin,
lengto haw tuk a,
a tai haw hei in
cawl haw tukma hi;
lam a ciah haw hei in
cim haw tukma hi.