3
Jerusalem Khua sung Buainak
1 Tu pepan, Topa Cungnungbel Topa in, mihing tei muanbelmi mihing le nate hihen, Jerusalem le Judah pen la khawng tuk hi. A muanbel haw mi a an le tui haw,
2 a mi ngilte le a ngalkapte, a thukhentute le profet, a thuhilh thiamte le khutdawh domthiamte,
3 a ngamuktu bawite le ngalkap bawite, a ngam uktute le mitzial thiamte la khawng tuk hi.
4 Topa in, a ngam haw cu naupang tualleng laihte uktik tuk hi.
5 Mi hempoh ten amu metnak tuk ahi tale, mi maisong nei haw tukma. Khangno ten a upate upat ngawltohin, mi nauta ten a humlam haw a bawite maisong haw tukma hi.
6 A heng tukmi hunah innkua pa khat sungah a unau haw pa khat cu, “Nang cu silh le cen tuk van na neih hangin hiti bang ka haksat hun uhten hotubel hi zalin,” ti haw tuk hi.
7 Mahnaven amah in, “Mah kha ma hi, noh hotu cu hi tuk mang. No bawm thei tuk mang. Ka inn sungah an umma, puansilh tuk hei nei mang. Nangmuh hotu tukin bawl pahsuh un,” tituk hi.
8 Hi zuh hi, Jerusalem cu lalthongta hei! Judah vang tau ua-uan thongta hei! Ihempoh a hilhmi le a bawlmite cu Topa i deih ngawl zawng ngeh hi. Pathian cu langpangin, zawnsak haw hi.
9 Mi deidat a neihnak haw cu amuh siatsuahtu tuk hi. Sodom khua mite bangin zahcaknak nei ngawlin a sual haw hangin bothal haw hei; a bawl haw bangkekin cawmleh haw hi.
10 Midikte cu mi lungdam hi haw tuk, a lampi haw hempoh tuangtungin, a thaman haw cu lungdam zetin ngah haw tuk hi.
11 Mahnaven mipha ngawlte cu bolal haw tuk hi; midang humah a bawl haw mite cu amu humah hengleh khawng tuk hi.
12 Ka mihingte cu sum coihtu ten bawlsia in, sum kepsaktu ten zol haw hi. Maw ka mihingte, na hotu uhten pui sualin, ilai lam saw zui tuk tih hei thei ma uh ci.
Topa In A Mihing Tei Humah Thukhen
13 Topa cu a mihing tei thuson tukin tuangtim hi. Timtuah cengin,
14 a uktute le hotute cu thusonnak munah henpih hi. Amu lakah, “Mitei sabit huante lonsak khawngin, na inn uh cu mi ca-ngah tei lak pen na lak uhmi tuah dim khawng hi.
15 Ka mihingte sihpek theihnak le mi ca-ngah tei covo lon theihnak thu imah nei ma uh ci. Keimah Cungnungbel Topa in hilh zo ing.”
Jerusalem Numeite Ngallin Piaknak
16 Topa in, “Jerusalem numei tei uangthuan dan hi zo hem un. A pualthau dan haw cu vandakin vak kawkawi li haw hi. Zahcak hei nei ngawlin, pano hum bebekah a mit hak tutuh haw hi. Tihsakzet le ultung zetin lamvak kawkawi thahin, a ke ah a khih haw mi khingte cu nging seseihtik haw hi.
17 Mahnaven bawlsia tung, a sam haw met tung a, lukolhin hah tung hi.”
18 Jerusalem numei tei lak pen a sunsakbel haw mi nate cu Topa i lonsak hun heng tuk hi. A lu le a ke hawah a khaih haw mi khingte, cangte, a ngawng le
19 a khut hawah a khih haw mi caute la khawng tung. A maikhuhnak puan pano,
20 a lukhute, a baan le a tai ah a khih haw mi aisannak baan khaih le taikhapte,
21 a khut zungbut le a naalkhaihte,
22 a puansilh phazette, a puante, angki cual le sumbawmte,
23 a pa zetmi a puansilhte, a pavuate, a ngawngvelhte le a lukhuhnak haw puan pano saupite cu sut khawng tuk hi.
24 Zimui mang haw tukma toh, ngimsiazet haw tuk; taikhap phapha ai-in, khauhual sesuak mang haw tuk, sam mawizet ai-in, a lu haw kolh khawng tuk; puansilh mawizet ai-in, puansia silhin, a mawinak haw cu a zahcaknak haw in suak tuk hi.
25 Khua sung panote, mi ngilbelte hei ngalkhutin thi haw tuk hi.
26 Khuapi kongkhahte kapin, kio ngungun haw tuk hi. A khuapi haw cu puansilh tuk nei ngawl lei lak a, khung numei bang tuk hi.