2
Tawpngawl Lemdaihnak
(Mik 4:1-3)
1 Pathian in, Amoz capa Isaiah lakah Judah le Jerusalem thu tuah pehdunin, hi bangin hilh hi:
2 Mailamah,
Biakinn a dinnak mual cu,
mual dang sangin sangbel tuk hi.
Miphun hempoh ten
mah mualah catngawlin
hung haw tuk a,
3 a mihing haw ten,
“ Topa i mualah
hawh nung;
Israel Pathian i Biakinn ah
zui tuk a deihmi cu zilh tukin,
a tensami a lampi ah
hawh tuk hung.
Topa i thu zilhmi cu
Jerusalem pen hungin;
Zion pen a mitei lakah hilh hi.”
4 Ngam ngengzet tei laklawhah
thukhenin, daitik tuk hi.
A ngalnam haw cu tumanin
su haw tuk hi.
A ceipi haw cu thinghiang heuhnak
namin su haw tuk hi.Ref 2:4 Joel 3:10;
Ngam khat le ngam khat
dodunleh haw tukma toh,
ngal doleh haw tukma toh hi.
5 Maw Jakob i casuante, Topa i piakmi vaknak sungah ngamta nung.
Pualthaunak Cu Siatsuah Hi Tuk
6 Maw Pathian aw, na mihing Jakob i casuante na nunghek hangin, a ngam haw cu nisuahnak lam le Filistin ngam a, mitzial le dawih thiamte dimin, ngamdang tei zui mi daante zui haw hi.
7 A ngam haw cu sui le ngun tuah dimin, a sum le pai haw cu bo tih ni umma hi. A ngam haw cu cipuh tuah dimin, a cipuhleng haw cu sialcelh ngawlin tam hi.
8 A ngam haw cu milim tuah dimin, a khut haw tuah a bawlcop haw mi bia haw hi.
9 A venghawngin, zotsak le naunehmi hi haw tuk a, zakca le mitmai sia in, um haw tuk hi. Maw Topa kuamah ngaidam pahsun.
10 Topa i thinuknak pen luat tukin le a sunloihnak le a ngilnak huham pen pial nuamin le leisungah khuk luatin, tum haw tuk a, mualhum suanghol sungah ngelh haw tuk hi.Ref 2:10 Mang 6:15; 2Thes 1:9;
11 Mihing tei uangthuannak cu bo in, mihing tei pualthaunak cu siatsuah khawng ni heng tuk hi. Topa bebek pahcoih hi tuk hi.
12 Mah ni ten Cungnungbel Topa in, thil tithei hempoh niamsuktik tuk a; mi uangthuang le mi pualthau hempoh cu nemsuk khawng tuk hi.
13 Lebanon a, sidar thing sangzette le Bashan ngam a, sasua kung hempoh siatsuah khawng tuk hi.
14 Mual sang hihen, mualniam hihen;
15 ngalvilnak inn sangzet hihen, khua kulhtian sangzet hihen, zazutin khe cim khawng tuk hi.
16 A ngengbel le a mawibel tuipi thuanthum humah a hawh thei Tarshish khua tinbaw vang nimtik khawng tuk hi.
17 Mihing tei uangthuannak le pualthaunak hempoh botik khawng tuk hi. Mah ni ten Topa bek cu a sangbelin, cawimawi hi tuk hi.
18 Milim hempoh vang pailal khawng haw tuk hi.
19 Topa in, leipi hing tukin a hun ten, a thinuknak pen luat tukin le a sunloihnak le a ngilnak huham pial nuamin lei co in, lut haw tuk a, mualhum suanghol sungah ngelh susuih haw tuk hi.
20 Mah ni a hen ngangai ten sui le ngun tuah a bawl haw mi milimte cu taisan khawngin, zuphul le baak tei lakah vawk khawng haw tuk hi.
21 Topa cu leipi hing tukin a henleh ten a thinuknak taisan tukin le a sunloihnak le a ngilnak huham pialin, mualhum a, lei kua le suangholah ngelh haw tuk hi.
22 Mihing muang toh pahsuh un. Muantak tukin i um kaw?