29
Jerusalem Tei Tawhmi Ngalte
1 Maw, Jerusalem, Pathian i biaklandawh, bothal zo cei! David khuapi cu bo tatak hi! Kum nih kum khat cu puai bawlnak le nopnakte tuah umhih tahen!
2 Mah hangin, “Pathian biaklandawh,” tihmi khuapi humah Pathian in thilpha ngawl hengtik tuk hi. Kahnak le taunak um tuk a, Jerusalem khua buppi cu thisan tuah a dimmi biakpiaknak biaklan dawhin cang tuk hi.
3 Pathian in hi khuapi cu a ngalin cangtikin do tuk a, umbing khawng tuk hi.
4 Jerusalem cu lei nuailam pen awntul tukin a tumtu thi-la bang le leivul lak pen a awntul cawcok thei mi awn bang tuk hi.
5 Maw, Jerusalem nangmah a dotu ngamdangte cu leivul bangin muhvawk khawng hi haw tuk, a lauhuaimi a ngalkapte cu cangkung ko bangin lengvawk khawng haw tuk hi. Thakhat thu in,
6 Cungnungbel Topa in, a nase zetmi huih le nguah, van thum le kekta, hiinhing tuah el pan tuk hi. Huihsia le a alh dudummi mei khiak suak tuk hi.
7 Jerusalem khuapi, Pathian i biaklandawh tihmi a dotu ngalkap hempoh, a hiamnam haw le a van haw le a cawi haw mi hempoh cu manglam bangin le zan laihin thu ngaihsut nei bangin paithong khawng haw tuk hi.
8 Jerusalem do tukin a khawmdunmi ngam hempoh cu ngilkialzet pa a mangin tui khamzetin in naven a khatlawh ten a ngilkialzet leleng bangin le dangdumzet pa a mangah tui kham zetin naven a khatlawh ten dangdumzet le dangkozet lelengin, a um bang bok hi haw tuk hi.
Thu Ngai Nuam Haw Ma
9 Hawh unna, misil hita hih pohpah ni uh ci! Na mit uh cu caw hih tapoh hen! Silnak zu inkha ngawlin khampek un! Zuhang cak khat hei in ngawlin hoi li poh un!
10 Topa in, thi awn veu in, a hihbuh uh suaktik hi. Profet cu mi zapi tei mit hi haw tuk naven Pathian in, a mit haw hup hi.Ref 29.10 Rom 11:8;
11 Profet tei muhmi langnak hempoh a sullam na theih thiam ngawlnak tuk uhin selin um tuk, tacik khet haw mi laizial bang hi haw tuk hi. Lai a sial thiam tei lakah hawhpih uh ci a, sialsak hemin, na ti uh hei in, sial thei mang, tacik khen haw si ti haw tuk hi.
12 Lai sial thiam ngawlmi lakah pia uh ci a, sialsak hemin, na ti uh hei in lai sial thiam ma si ung, tin ti haw tuk hi.
13 Topa in, “Himi ten bia haw naven a ot haw cu sullam nei ngawlin, a lungmu haw cu ilai lamah hum vakvai thong. Amu ca in biaknak tihmi cu mihing tei bawlcopmi dan noinang thial le thil tihdan thongpohte hi, zo ngawlin a sial haw mite hi.Ref 29.13 Mt 15:8-9; Mk 7:6-7;
14 A ngaihsut khak haw ngawlpi in, a humah haksatnak pa khat nung pa khat hengtik tung hi. Micipte cu misil suakin, a cihnak haw cu imah nemcuam tukma,” ti hi.Ref 29.14 1Kor 1:19;
Mailam Muansannak
15 Topa i lak pen tumtahnak a seltute cu ngei kho haw tukma. A tumtah kuh haw cu bawlin, “Kuamah in mu haw ma, kuamah in thei haw ma,” tin ti haw hi.
16 Thil hempoh linglettik khawng haw hi. Beel bawltu maw, beel bawlnak beel lei ikaw a thupi saw? Mihing i bawlmi na hi a bawltu pa i lakah, Ita bawl kam, ti thei a ni maw? Mahma tale, “Na bawlmi hi imah thei ma ci,” tin hilh thei a ni maw?Ref 29.16 Isa 45:9;
17 Tehkipnakah a um bangin a ngei ngawlin tupi ngaw zetmi cu lo ngamah cangin lo ngam cu tupi in cangleh tuk hi.
18 Mah ni a hen ten bengbul ten laibu sung a thute ngingzet a sialmi haw zain, hun ngeipi khuathim sungah a um zo tohmi mitcaw ten a mit haw hakto in khua mu thei haw tuk hi.
19 Mi ca-ngah le mi lungnem ten Israel Pathian thiangtho i piakmi lungdamnak cu coleh haw tuk hi.
20 midang a nautat, a bawlsiatu le Pathian a simsial ngawltute cu bo haw tuk a, misual hempoh siatsuah khawng hi haw tuk hi.
21 Pathian in midang a zawnsaktu, mipha ngawl bawlsiat a khamtu le mifelte a dikcangnak haw bangin thudik cotik nuam ngawlin zolthu a sontute cu siatsuah khawng tuk hi.
22 Mah hangin Israel i Pathian in haksatnak sung pen, Abraham a pantu Topa in, “Maw ka mihingte, mualpho in umleh tukma toh uh ci; zakca in, na mai uh sialeh tukma toh.
23 Ka piak tukmi casuante mu in, keimah hi Israel i Pathian thiangtho ka hihlam thei tuk uh ci. Upatnak pia in thasiahhuai kihcaknak tuah ka mai ah ding tuk uh ci.
24 Misil ten thil theihtupnak nei in, a phuciak lelengtute hei in lungdam zetin zilh theih hi haw tuk,” ti hi.