30
Izipt Tuah Lungkimnak Bawl Tukma
1 Topa in, “Judah ngam uktute cu bo haw hi. Itahim titale keimah a dodaltu in cang haw hi. Keima khua khan ngawlmi zui in, ka lungkimnak tel ngawlin lungkimnak laikhet bawl haw; mahten sualnak pa khat nung pa khat bawl pepel haw hi.
2 Keimah siampih masa ngawlin bopnak ngah nuamin, Izipt ngamah hawh haw hi. Izipt in pan hen tih deihin, Izipt kumpi muangin um haw hi.
3 Mahnaven a kumpi haw in bawm thei tukma; Izipt i humhimnak cu pha thongin tawp tuk hi.
4 A ngam palaite cu Izipt ngam khuapi Zoan le Hanes ah heng zo haw naven,
5 bopnak a kulzet haw lai in, a bawm thei ngawltu ngam, muantak ahi ngawlmi ngam a muankhak haw mi cu Judah miten siklehzet haw tuk hi,” tin ti zo hi.
6 Hanglam phillawn ngam, ngamsa tei thu ah Pathian in hi tin hilh hi, “Ngam palaite cu lauhuainak ngam, kiosa le ngul ngu neite, a leng thei ngul tei umnakah khualzin haw hi. Bopnak a pia thei ngawltu tei ngamah laksawng pia tukin na manphazette cu a laak le a kalauk haw humah suanto nawnawm haw hi.
7 Izipt i bopnak cu imah ma hi. Mah hangin Izipt cu ‘Lau tak ngawl ngulpi,’ tin min pia zo toh ing,” ti hi.
Pathian Thu Ngai Ngawlte
8 Itih zahin mipha ngawl tih cu kumkhua melciknak tukin a thu le late lai sungah ngat tukin Pathian in keimah hilh hi.
9 Pathian dodaltu le zolthu sontu hi leleng haw in Pathian i zilhnak zui nuam hihim haw ma hi.
10 Profet hei cu, “Dapdenin um un, awn pahsuh un! Hihi man hi, mahmi cu man ma hi, tih hei hilh nuam pahsuh un! Ka zak nuam uhmi bek hilh un. Eimu um banglengno in um bok nung!
11 Kian hih hem un, ka lampi uh khak pahsuh un! Na Israel uh i Pathian thiangtho, thu cu a zak tuk hei nuam ma toh ung,” tin ti haw hi.
12 Mahnaven Israel i Pathian thiangtho in, “Ka hilhmi thu cu imah simsial ma uh ci, mizolnak le thisan luannak saw muansan uh ci.
13 Misual hihim uh ci. Kulhtian a humlam pen a nuailam tian a khi-keh ngutmi bang uh ci, muanmawh ngawlpi in, cimleh tuk uh ci.
14 Leibeel kehphel bang hi in, vut luahnak tuk le tuikuang pen tui suahnak tuk hei um ngawlin a keh khawng bangin keh khawngleh tuk uh ci,” ti hi.
15 Topa Israel i Pathian thiangtho in mipi tei lakah, “Kikleh unna, mengdenin keimah muang un. Dapdenno in um hi na ngilnak uh le na himdam tuk uh ci,” ti hi. Mahnaven mahtih bangin um cu nuam ma uh ci.
16 “Cipuh tai cakzette khungin ka ngal tei muh ngawlnakah tai tuk ung;” ti uh ci. Mahzuh hi, man uh ci; taivawk ngai tuk uh ci. A cipuh uhte cu cakzet poh, ti uh ci; mahnaven a hiltute cu nangmuh sangin cak saw haw tuk hi.
17 Na ngal uh pa khat na muh uhten nohte cu thawng khat tai tuk uh ci, na ngalte uh pa nga na mu uh tale noh cu na venghawng uhin tai khawng tuk uh ci. Na ngalkap hon sung uh pen pa khatno hei tang tukma uh ci; a tangmi cu mualkul humah amah bek lungleng zetin, a dingmi na alan khuam pa khat bek hi tuk hi!
18 Mahti hi naven Topa cu na hum uhah hehpihnak nei laih hi. Amah cu thudik bebek a bawl hangin nangmuh hehpih tukin ngak laih hi. Lungdamnak tatak cu Topa muansannak pen heng hi.
A Mihingte Muicu Pia Tuk
19 Jerusalem ah a umte aw, kapleh tukma toh uh ci. Topa cu lainatnak neitu hi, bopnak ngenin, a lakah na au uhten zain donleh tuk hi.
20 Topa in haksatnak le thuaknak sungah hengtik tuk naven na thuaknak mun uhah amah umin, nangmuhte zilhtu hi tuk hi, mahten amah cu na zei lih uh kul tukma hi.
21 Lamhai in, taklam le veilamah lamkak na zui uhten na nunglam uh pen a aw no tuah “Hilai pen hawh un; hilai ah lampi um pah cuh,” a tihmi cu thei tuk uh ci.
22 Sui le ngun tuah bawlmi na milim uhte cu buak bangin vawkin; “Muleh nuam ma toh ung,” tin tituk uh ci.
23 Anci na cin uhten Topa in nguah zutikin, phatik tuk a, an hau in, na ngan tei tatnak tuk ham dawnno tamzet tuk hi.
24 Na lo uh bungtu na khuicang uh le laak ten a phabel le a ukbel ngan i an ei haw tuk hi.
25 Mah ni cu hengin; na ngal tei ngal kulhtiante la in, a mihingte na thah uhten mualsang le mualniam, mun hempoh pen tui luang haw tuk hi.
26 Hade cu ni bangin vak tuk a, ni cu a satdan sang hei in let salihin al tuk; ni salih i vaknak cu ni khatah khawm ahin, mah bang tuk hi. A humah a piang tukmite cu Topa in, a mitei lakah a hentikmi meimate tuamsakin, a damtik hun ten kim khawng tuk hi.
Pathian In Assiria Bawlsia Tuk
27 Pathian i huham le sunloihnak cu khawlapi pen muh theih hi. Mei le meikhu ten a thinuknak langtik haw hi. Thuhilhin, a awn cu mei bangin alh zawzok hi.
28 Ihempoh a taipih theitu tuilun bangin a mai ah huih theutik hi. Mahmi huihin ngam tampi siatsuahin, a pha ngawlmi a tuptahnakte botik khawng hi.
29 Mahnaven noh Pathian i mite cu nipi ni puai bawl zanah lungdamin la na sak uh bangin lungdam lasa in um tuk uh ci. Israel a pantu Topa i Biakinn ah a hawh haw laihin, pheveu tumthahin lungdam zetin, a hawhtute bangin na lung uh dam tuk hi.
30 Topa in, a nase zetmi a aw cu mi hempoh zatikin, a thinuknak vang tawktik tuk hi. Mei-alh lekzet um tuk, huihpi theu in ngialzu tuk; nguah cu a leihin leih tuk hi.
31 Assiria miten Topa i aw a zak haw ten le a bawlsiatnak thawm a tawh haw ten a mulcang haw suak tuk hi.
32 Pathian in Assiria a bawlsiat dedeuh ten ama mihing ten khuang le tingtang awzawi zui haw tuk hi. Pathian amah loli in Assiria mite cu do tuk hi.
33 Meipi alhzet sung pen Assiria kumpi halnak tuk tin, ni dang lai pen mun pa khat cu ngaihsutsa in um zo toh hi. Mah mun cu thuk zetin, zalzet hi; thingte vang sangzet seh ham zo haw! Kaat mei tuah a bangvemi Topa i haihawhin haal tuk hi.