28
Saklam Uknak Ca Ngallin Piaknak
1 Israel uknak cu bothal zo hi! A sunloihnak cu a hotu zukham misil tei lu humah, pak tuah bawlmi kumpi lukhu a thim bangin thimta hi. A ultung zetmi a lu cu namtui noihli haw naven, thi awndiakin zu a kham haw hangin lumthong haw hi.
2 Topa in, amuhte cu dotu tukin a ngilmi le huham a nei zetmi pa khat teng zo hi. Mahpa cu ngialcak bangin caksuk tuk, huih le nguah bangin heng tuk hi, tuilun bangin siatsuahtu hengin, a ngam cu neh tuk hi.
3 A hotu zukham misil tei ultunnak cu ke tuah sihpek hi haw tuk hi.
4 A hotu mi ultung tei minthannak cu theipi ngah masabel a min bek le thawi in, a eih haw ten a bo bangin bo tuk hi.
5 Mah ni a hen ten Cungnungbel Topa cu ama mi a tang calam tei ca in pak tuah bawlmi minthannak kumpi lukhuhin cang tuk hi.
6 Cungnungbel Topa in, thukhentu tei lakah diknak lungmu pia tuk a, khuapi kongka dotu a ngalte hawlvawktu tei lakah ngalphatnak pia tuk hi.
Isaiah le Profet Zukham Misilte
7 Profet le thiampite tian zu cu khamin hoi kawkawi li haw hi. Sabittui le zuhang tam zetin haw a, mun tihkimah lu hai in buaipihzet haw hi. Profet cu zukhamin sil leita a, Pathian in muhnak a neitikmi hei a sullam thei haw ma toh; thiampite vang zukhamin sil leita haw a, amu lakah a hengmi thuson tuk hei sonleh thei haw ma toh.
8 A khunnakah a luak haw dim zengzungin, a thiangnak mun tong hei umma hi.
9 Ka humah phuciak haw lalaihin, “Hi pa hi kua zilh ing tin ngaisung nen tim? A thuhilhmi tale, nawitawp sem naupangno ca khawthu bek ma maw?
10 A hilh calam tale, a laicang a laicangin, a laituan a laituanin le, a thu pa khat nung pa khatin, hilhta laih sih! tin ti haw hi.”
11 Ka thuhilhmi na ngai nuam uh ma tale Pathian in, na theih uh ngawlmi ngamdang tei awn mangin zilhtik tuk hi.Ref 28:11-12 1Kor 14:21;
12 Amah in colhdamnak le nunnopnak pia na pi in, a thu cu ngai nuam ma uh ci.
13 Mah hangin Topa in, a laimal in, a laituanin le thu pa khat nung pa khatin, a hilh tumnak hi. Kal khat na kal uh sial ten bah tuk uh ci. Liamma pu tuk uh ci, thangin awk tuk a, ngalmatmi hi tuk uh ci.
Zion Ca In Innkil Suangpi
14 Jerusalem pen hi mite a uktu noh mi pualthaute, Topa i thuhilhmi hi ngai hem un!
15 Nohten, “Thihnak tuah thutepnak nei zo toh ung a, mithi khua Sheol tuah lungkimnak casuk bawl zo ung,” tin tuangkhawngta lalaih uh ci. Thilpha ngawl a hen ten luat tuk ung tin ngaisungin, thudik ngawl sonnak le mizolnak na muan uh hangin him tuk hung tin ngaisung uh ci.
16 Topa in, “Zion ah a khimzet le a kho zetmi inn taw pan ing a, mah inn taw innkilah tian cihmi suangpi koih ing. Mah innkil suangpi humah, A kho mi upnak cu a thinsau sih, tin ngan ing.Ref 28:16 Saam 118:22-23; Rom 9:33; 10:11; 1Pet 2:6;
17 Inn taw cam maw cam ma hum tih tehnakin dikcangnak mang tung hi. Mahnaven na muanzet uhmi zolthu sonte cu huihsia le nial ten siatsuah khawng tuk a, na himnak uhte cu tuihautungin siatsuah khawng tuk hi.”
18 Thihnak tuah thutiam na bawl uhmi cu siatsuah khawng hi tuk a, mithi khua Sheol tuah lungkimnak na bawl uhmi cu phiah khawng hi tuk hi. Thilpha ngawl a hen ten tuihautung bangin khuh khawng tuk hi.
19 Hi thil poimawh cu a hih tum khat bek hi tuk poh, na tih bek uhten a dang heng thuah lehleu tuk hi. Zing khat nung zing khatin heng pepelin, a sun a zan thuak tuk uh ci. Pathian i thu a thakin, a hengmi cu mulling hah ngeh tuk hi.
20 Thupaucapnak bangin zaunak com leita, silh tuk puan le neu leita a tih haw mi pa bang tuk uh ci.
21 Topa i, a bawl nuammi thil phundangzet abang hei in bawlsuak tuk; Perazim Mual le Gebion munlawn a do lih zo bangin a kul tale atu hei in do tuk hi. A patzomi a nadeh cu kimtik tuk; mah a nadehmi cu theih zawh ngawlmi na lamdangzet haw hi.Ref 28:21; Josh 10:10-12; 2Sam 5:20; 1Khang 14:11;
22 Na lakah ngallinnak thu ka hilhmi hi cekpan bang thong ngaisungin, nuihsan sihseh thong pahsun. Na nuihsan thong tale na luatnak tuk haksa dedeuh tuk hi. Cungnungbel Topa in hi ngam pumpi siatsuah tukin a ngaihsutsa mi cu thei zo toh ing.
Pathian Cihnak
23 Ka hilhmi thu hi ngai unna, nangmu lakah ka phuanmi hi phano in ngaisung un!
24 Akua nabang lobung pa hei in, a lobunnak sungah anci cinnak tuk ti in kumkhua cawlngawlin lobung awng ma hi.
25 A lobun phano a celh ten zira le lemmui ci vawh hi. Sangvut le barli sangvut phun khat cingin, a elkimte ah anci a dadang cing hi.
26 Lo nadeh dan vang thiam, itakaw titale Pathian in zilh hi.
27 Zira ci le lemmui ci a lak nuam ten tembek ngengpi tuah vat ma hi; tembek sangin a pha tawk tukmi ngolhkang neu deuh mang hi.
28 Sangvut a lak ten a siat khawng tian cawl ngawlin ngawi awng ma hi. Sangvut cang sia tuk ngawlin ngalling zetin khuileng tuah cilin, a khawthubekno in, cil thiam hi.
29 Hiti bang cihnak le thiamnak cu Cungnungbel Topa i piakmi hi. Pathian i cihnak tuah khuakhanmi a hih hangin lawhtinnak um leleng hi.