27
1 Mah ni ten tuipi thuanthum sungah a ummi ngulpi that tukin le a vialdunmi le a lauhuaimi Leviathan ngul bawlsia tukin Topa in, a ngil zetmi le mual nei zetmi a ngalnam mang tuk hi.Ref 27:1 Job 41:1; Saam 74:14; 104:26
2 Mah ni ten Topa in, a nop zetmi a sabit huan thu ah,
3 “Ka sabit huan cu keimah in cingin tui leih leleng ing. Kuamah i siatsuah tuk ngawlin a sun le zan cing ing.
4 Atu-in, ka sabit huan i humah thinuk lehma toh ing. Ling le so a um haw tale keimah in do tung a, halkang pilpial tung hi.
5 Mahnaven ka mitei ngal ten keima hup tuk a nuam haw tale keimah tuah lemdaihnak bawl haw tahen. Mahzuh hi, keimah tuah lemdaihnak bawl haw hen.”
6 Mah ni ten Israel mi, Jakob i casuante cu thingkung bangin zung saleh haw tuk; kuhkuum haw tuk a, pakleh haw tuk a, lei ah a ngah dim tuk hi.
7 Topa in Israel cu a ngalte bangin bawlsia tukma; a thi mite vang a ngalte zahin tam haw ma.
8 Topa in, a mite cu saltannakah kuatin bawlsia hi. Nisuahnak lam pen a theu mi huihsia in mut vawktik hi.
9 Umngawltu tei biaklandawh cu miphiu vam bangin a ngawivam laklawh, Asherah pathiannu ai-awh thing a phut haw mi le namtui halnak biaklandawh a um sungin Israel i sualnak cu ngaihdam hi tukma.
10 Khuapi kulhtiante cu siatsuah khawng zo haw! Hampa lak ngamkhing bangin khing diudeu hi. Nganhing tei tatnak ngamah cangin hampate ei li haw hi.
11 Thingkangte ko in, ek khawng hangin numei ten tuahthingin com haw hi. Itahim titale mihing ten imah a theihtup haw ngawl hangin amuhte semsuahtu Pathian in, a hum hawah lainatnak le hehpihnak neileh tukma toh hi.
12 Mah ni ten, Topa in Eufrates lui pen Izipt ngamngi tian a mihingte pa khat nung pa khat khawm tuk a, cang le cangsi a khen bang khen tuk hi.
13 Mah ni a hen ten Assiria le Izipt ngam saltangmi Israel mite sam tukin pengkul tum haw tuk hi. Hungin hi, Jerusalem khua mual thiang humah Topa bia haw tuk hi.