17
Pathian In Damaskas le Israel Dantat Tuk
1 Topa in, “Damaskas cu khuapi hileh tukma toh hi; a sia khawngmi buakvawk khawmnak mun hi tuk hi.Ref 17:1-3 Jer 49:23-27; Amos 1:3-5; Zek 9:1;
2 Siria ngam a, khuate cu kumkhua zammi khua hi haw tuk hi. Tuu le khui tei tatnak lenkolh hi tuk a, mah nganhingte cu kuamah in hawl haw tukma hi.
3 Israel cu sihsan khualnak nei ngawlin Damaskas tei zalennak cu pai tuk hi. Siria mi a nung calamte cu Israel mite bangin zakca le mualpho in um haw tuk hi. Keimah Cungnungbel Topa in hilh zo toh ing.”
4 Topa in, “Israel tei thawm a bonak ni heng pal tuk a; a hauhnak cu zawnnakin theksak tuk hi.
5 Israel cu an kung copsa lo bang hi haw tuk hi. An a laksa haw cu Refaim munlawn a, lo bangin kolh khawng tuk hi.
6 Mi demno bek nung haw tuk hi. Israel cu a ngah a lawh celh zo tohmi olif kung lekah pum nih pum thum laihno, a kangkakah pum li pum nga laih a tangmi bang haw tuk hi. Keimah Israel i Topa Pathian in hilh zo toh ing.”
7 Mah ni a hen ten miten amuh semsuahtu, Israel tei Pathian thiangtho i lakah bopnak deihin, zuanleh haw tuk hi.
8 Amu khut tuah bawlcopmi biaklandawhte cu muang khaleh haw tukma toh; amu khut thiamnak pen a suakmi Asherah pathiannu biaknak zehsah mi thingphut mite le meihal biaknak a dawhmi taitante hei muangleh kha haw tukma toh hi.
9 Mah ni a hen ten phano in, a up haw mi kulhtian cu zam khawng haw tuk a, Israel mite launak hangin a taitu Hiv mite le Amor tei khua bangin a khua haw cu zamsan khawng haw tuk hi.
10 Maw! Israel, suangpi bangin a belhnak le a humhimtu na Pathian cu phawkngil zo ci. Ngamdang pathian biak tukin huan thiangtho bawl tum ci.
11 Mahnaven na phut ni zing loli ah khangin, kuhkuumin, a pak hei in, an cop tuk cu nei cuang tukma ci. Haksatnak le a dam thei ngawlmi natnak bek um tuk hi.
Ngalte Sung Haw
12 A ngilzet ngamte cu buai susuih haw in, a buainak thawmvang cu tuipi thuanthum cawk thawm bangin le a nase zetmi tuicawk thumpi bang haw hi.
13 Ngalte cu tuicawk bangin mi nawk tutuh haw; mahnaven Pathian in, a liat ten nunglamah kik haw hi, mualhum a, huih i muhmi leivul bangin le simpei i lakmi cangkung kote bangin phathong hawta hi.
14 Zanlam ten lauhuaizet naven zinglam ten phathong khawng haw! Ka ngam uh a dotu hempoh ten mahti bang bok haw tuk hi.