16
Moab Ca Muansan Tuk Um Ma
1 Philnel ngamah, a ummi Sela khua a, Moab miten Jerusalem khua a mi uk bawi tei lakah tuunote laksawngin kuat haw hi.
2 A bu pen hawlvawkmi vano bangin, tuptahmi hei nei cuam ngawl, Arnon lui mawkah hawhsuk tuak, hawhto tuakin ngak haw hi.
3 Judah mitei lakah, “Ikaw ka bawl tuk uh, hilh un! Sun nisa ah thing nilim nuai a colh uh bangin nangmu lim nuai ah cawltik zal un! Kohte hi ngaltaimi hi ung a, kuamah i muh theih ngawlnak munah sel zazal poh un!
4 Na ngam sungah umtik zazal unna, mi siatsuah nuam tei khut sung pen hup zazal poh un,” tin ngen haw hi.
(Bawlsiatnak le siatsuahnak cu bo tuk a, ngam pumpi siatsuahtute cu bo haw tuk hi.
5 David casuan pa kha khatin, kumpi dek tuk a, a mihingte cu itnak le muanhuai a hihnak tuah uk tuk hi. A dikmi bawl tuk cu manlangzet tuk a, thudik bek bawl tuk hi.)
6 Judah miten, “Moab tei pualthaunak cu a theih khawng uhmi hi! A ultung haw dan le mi a zotsak dan haw cu mi zapi i zakmi hi, mahnaven a tuangkhawnnak haw cu imah ma,” tin ti haw hi.
7 Moab mite cu a thuak haw mi haksatnak i hangin kap haw tuk hi. Kir Heres khua an uk a eih awng haw hei a ngaihsutleh haw ten a venghawng haw in thasia zetin kap haw tuk hi.
8 Heshbon khua el a, a lote le Sibmah sabit huan pen ngam uk bawite khamtiktu sabit suak hi. Hi mun a, sabit kungte cu phazet haw a, Jazer tian zam hi, nisuahnak lam pen philnel ngam tian, nitumnak lam pen Tuipi Thi i ngalkhat lam tian zam hi.
9 Atu cu Jazer khua ca ka kah bangin, Sibmah sabit kung ca kap ing. Itahim titale lungdamtiktu tukin an cop tuk nei haw ma.
10 Lo ngam cu phazet naven kuamah lungdam haw ma hi. Sabit huan sungah kuamah awn au hei um haw ma. La hei sa haw ma. Kuamah hei in, sabit suuk haw ma hi. Lungdamin awn aunak cu bo in, khing diudeu hi.
11 Moab le Kir Heres ca thasia in tau lawluang ing.
12 Moab mitei mualhum a, biaklandawh le a biakinn hawah thungen tukin a hawh lih haw cu a cawlthong haw; imah nemcuam tukma hi.
13 Hi thu hi a laih ngawlin Pathian in Moab lakah a hilhmi thu hi.
14 atu-in, Topa in, “Tu pepan kum thumnak cikcekah Moab ngam a, sum le pai, hauhnak hempoh cu bo khawng tuk hi. Mi tamzet haw naven demno bek nung haw tuk a, nawmtamzet haw tuk hi.”